နေပြည်တော်၊ မေ မြန်မာနိုင်ငံကြက်ခြေနီအသင်းသို့ INNO (Group) မှ လှူဒါန်းသည့် လူနာတင်ယာဉ်လွှဲပြောင်းပေးအပ်ပွဲ အခမ်းအနားကို ၂၀၁၈ ခုနှစ် မေလ ၇ ရက်နေ့တွင် နေပြည်တော်ကောင်စီနယ်မြေ၊ ဒဏ္ခိဏသီရိမြို့နယ် မြန်မာနိုင်ငံကြက်ခြေနီအသင်း (၂၀၂) မိုင် ရှေးဦးပြုစုခြင်း စခန်းတွင် ကျင်းပခဲ့သည်။ အခမ်းအနားသို့ မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူ၊ အချိန်ပြည့်အလုပ်အမှုဆောင် ဦးကင်ဘွိုင်း၊ နေပြည်တော်ကောင်စီနယ်မြေ ကောင်စီဝင် ဦအေးမောင်စိန်၊ INNO (Group) မှ Chairman Mr. Seog Chang Son နှင့် တာဝန်ရှိသူများ၊ နေပြည်တော်ကောင်စီနယ်မြေ ကြက်ခြေနီကြီးကြပ်မှုကော်မတီ ဥက္ကဌ ဦးဇော်အောင်၊ ခရိုင်/မြို့နယ် ကြက်ခြေနီအသင်းခွဲများမှ ဥက္ကဌများနှင့် ဒုတိယ ဥက္ကဌများ၊ မြန်မာနိုင်ငံကြက်ခြေနီအသင်းမှ ညွှန်ကြားရေးမှူးများနှင့် ဝန်ထမ်းများ၊ ဒဏ္ခိဏသီရိမြို့နယ် အထွေထွေအုပ်ချုပ်ရေးမှူးနှင့် တာဝန်ရှိသူများ၊ ရန်ကုန် - မန္တလေး အမြန်လမ်း ရဲတပ်ဖွဲ့နှင့် မီးသတ်တပ်ဖွဲ့မှ တာဝန်ရှိသူများ၊ ကြက်ခြေနီသူနာပြုတပ်ဖွဲ့ဝင်များနှင့် ကြက်ခြေနီစေတနာလုပ်အားရှင်များ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြသည်။ အဆိုပါ အခမ်းအနားတွင် မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူက အဖွင့်အမှာ စကားပြောကြားခဲ့ရာ - ယခု လူနာတင်ယာဉ် လွှဲပြောင်းပေးအပ်ပွဲသို့ တက်ရောက်လာသော နေပြည်တော်ကောင်စီဝင် ဦးအေးမောင်စိန်၊ INNO (Group) မှ Chairman Mr. Seog Chang Son နှင့် တာဝန်ရှိသူများ၊ ဌာနဆိုင်ရာမှ တာဝန်ရှိသူများ၊ မြန်မာနိုင်ငံကြက်ခြေနီအသင်းမှ ဝန်ထမ်းများနှင့် ကြက်ခြေနီစေတနာ လုပ်အားများကို အထူးကျေးဇူးတင်ရှိပါကြောင်း၊ လူနာတင်ယာဉ် လှူဒါန်းပေးသည့် INNO (Group) ကိုလည်း ကျေးဇူးတင်ရှိပါကြောင်း၊ INNO (Group) မှ အသင်းသို့ လူနာတင်ယာဉ်လှူဒါန်းခြင်းသည် ဒုတိယ အကြိမ်ဖြစ်ပါကြောင်၊ ၂၀၁၇ ခုနှစ်တုန်းကလည်း INNO (Group)က (၂၀၂) မိုင် ရှေးဦးပြုစုခြင်း စခန်းဆောက်လုပ်ရန်အတွက် လှူဒါန်းခဲ့ပြီး ဖြစ်ပါကြောင်း၊ ကိုရီးယားနိုင်ငံနှင့် မြန်မာနိုင်ငံသည် နှစ်ပေါင်းရှည်ကြာစွာ ရင်းနှီးသည့် ဆက်ဆံရေးရှိခဲ့သည့် မိတ်ဖက် အာရှနိုင်ငံတွေ ဖြစ်ပါကြောင်း စသည်ဖြင့် ပြောကြားခဲ့သည်။ ဆက်လက်ပြီး INNO (Group) မှ Chairman Mr. Seog Chang Son က လူနာတင်ယာဉ် လှူဒါန်းရခြင်းအကြောင်း ရှင်းလင်းပြောကြားခဲ့သည်။ ထို့နောက် လူနာတင်ယာဉ်အား ဖဲကြိုးဖြတ်ဖွင့်လှစ် လွှဲပြောင်းပေးအပ်ခဲ့ပြီး၊ မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူက INNO (Group) မှ Chairman Mr. Seog Chang Son အား ဂုဏ်ပြုမှတ်တမ်းလွှဲနှင့် အမှတ်တရ ပစွည်း ပြန်လည်ပေးအပ်ခဲ့သည့်။ ထို့အပြင် အမှတ်တရ စုပေါင်းမှတ်တမ်းတင် ဓါတ်ပုံရိုက်ကူးကာ လှူနာတင်ယာဉ် လွှဲပြောင်းပေးအပ်ပွဲအခမ်းအနားကို အောင်မြင်စွာ ကျင်းပခဲ့ပါသည်။        

မန္တလေး၊ ဧပြီ ၂၀၁၈ ခုနှစ် မဟာသင်္ကြန်ကာလတွင် မန္တလေးမြို့၌ မြန်မာ့ရိုးရာသင်္ကြန်ကို ပါဝင်ဆင်နွဲကြသော အများပြည်သူများအား ရှေးဦးပြုစုခြင်းနှင့် ကျန်းမာရေးဆိုင်ရာကူညီစောင့်ရှောက်မှုများ ပေးနိုင်ရန် ၊ ထိခိုက်ဒဏ်ရာရရှိသူများအား ဆေးရုံဆေးခန်းများသို့ အချိန်မှီညွှန်းပို့နိုင်ရန် တို့အတွက် မြန်မာနိုင်ငံကြက်ခြေနီအသင်း မန္တလေးတိုင်းဒေသကြီး ကြက်ခြေနီကြီးကြပ်မှုကော်မတီ၊ မန္တလေးတိုင်း ဒေသကြီး ကြက်ခြေနီသူနာပြုတပ်ဖွဲ့တို့မှ ဦးဆောင်၍ ရေကစား မဏ္ဍာပ်နေရာများတွင် ကူညီ ဆောင်ရွက် သွားမည်ဖြစ်ပါသည်။ ၂၀၁၈ ခုနှစ် မဟာသင်္ကြန်ရေကစားမဏ္ဍာပ်နေရာများတွင် ရှေးဦးပြုစုခြင်းနှင့် ကျန်းမာရေး ကူညီစောင့်ရှောက်မှုများပေးသွားမည့် မဏ္ဍာပ်နေရာများနှင့် မြို့နယ်အလိုက် ဆက်သွယ်နိုင်ရန် ဖုန်းနံပါတ်များကို အောက်ပါအတိုင်း ဖော်ပြအပ်ပါသည်။ ဗဟိုမဏ္ဍာပ်နှင့် ၂၆ လမ်းမှ လမ်း ၈၀ အထိ ဦးသိန်းနိုင် (ကြက်ခြေနီတပ်ဖွဲ့မှူး)                             ၀၉ ၇၉၇၂၄၆၂၁၇ လမ်း ၈၀၊ ၂၆ လမ်းမှ ၁၂ လမ်း အထိ ဦးတင်မိုးအောင် (ကြက်ခြေနီတပ်ဖွဲ့မှူး)              ၀၉ ၂၅၇၀၈၂၂၁၅ ၁၂ လမ်း၊ လမ်း ၈၀မှ ၆၆ လမ်း အထိ ဦးသုဝဏ် (ဒု-မြို့နယ်ကြက်ခြေနီတပ်ဖွဲ့မှူး)         ၀၉ ၇၉၆၅၁၅၁၀၀ ၆၆ လမ်း၊ ၁၂ လမ်းမှ ၂၆ လမ်း အထိ ဦးမိုးကျော် (မြို့နယ်ကြက်ခြေနီတပ်ဖွဲ့မှူး)           ၀၉ ၄၀၂၆၃၅၄၅၀ ၆၆ လမ်း၊ မနော်ရမံကွင်း ဦးသန့်ဇင်ဦး (ကြက်ခြေနီတပ်ဖွဲ့မှူး)                  ၀၉ ၄၄၄၀၁၁၁၆၁ ကန်တော်ကြီးပတ်လည် ဦးမြင့်သိန်း (ကြက်ခြေနီတပ်ဖွဲ့မှူး)                   ၀၉ ၂၅၉၁၈၈၈၂၅ အမရပူရ၊ တောင်သမန်အင်း ဦးညွှန့်ဝင်း (ကြက်ခြေနီတပ်ဖွဲ့မှူး)                    ၀၉ ၄၀၂၆၀၂၅၀၀ တိုင်းကွပ်ကဲရေးအဖွဲ့၊ တိုင်းရုံး           ၀၉ ၄၀၂၅၃၉၈၅၆ အဆိုပါနေရာဒေသအလိုက် ကူညီစောင့်ရှောက်မှုပေးခြင်းများကို မန္တလေးတိုင်းဒေသကြီးကြက်ခြေနီ သူနာပြုတပ်ဖွဲ့  ခရိုင်ကြက်ခြေနီတပ်ဖွဲ့မှူးများနှင့် မြို့နယ်ကြက်ခြေနီတပ်ဖွဲ့မှူးများ၊ တပ်ဖွဲ့ဝင်များ စုစုပေါင်း အင်အား (၁၇၀) ကျော်ဖြင့် ကူညီဆောင်ရွက်သွားမည် ဖြစ်ပါသည်။

ရန်ကုန်၊ ဧပြီ ၂၀၁၈ ခုနှစ် မဟာသင်္ကြန်ကာလတွင် ရန်ကုန်မြို့၌ မြန်မာ့ရိုးရာသင်္ကြန်ကို ပါဝင်ဆင်နွဲကြသော အများပြည်သူများအား ရှေးဦးပြုစုခြင်းနှင့် ကျန်းမာရေးဆိုင်ရာကူညီစောင့်ရှောက်မှုများ ပေးနိုင်ရန် ၊ ထိခိုက်ဒဏ်ရာရရှိသူများအား ဆေးရုံဆေးခန်းများသို့ အချိန်မှီညွှန်းပို့နိုင်ရန် တို့အတွက် မြန်မာနိုင်ငံကြက်ခြေနီအသင်း ရန်ကုန်တိုင်းဒေသကြီး ကြက်ခြေနီကြီးကြပ်မှုကော်မတီ၊ ရန်ကုန်တိုင်း ဒေသကြီး ကြက်ခြေနီသူနာပြုတပ်ဖွဲ့တို့မှ ဦးဆောင်၍ ရေကစား မဏ္ဍာပ်နေရာများတွင် ကူညီ ဆောင်ရွက် သွားမည်ဖြစ်ပါသည်။ ၂၀၁၈ ခုနှစ် မဟာသင်္ကြန်ရေကစားမဏ္ဍာပ်နေရာများတွင် ရှေးဦးပြုစုခြင်းနှင့် ကျန်းမာရေး ကူညီစောင့်ရှောက်မှုများပေးသွားမည့် မဏ္ဍာပ်နေရာများနှင့် မြို့နယ်အလိုက် ဆက်သွယ်နိုင်ရန် ဖုန်းနံပါတ်များကို အောက်ပါအတိုင်း ဖော်ပြအပ်ပါသည်။ ဗဟိုမဏ္ဍာပ်၊ မြို့တော်ခန်းမ ဦးတင်ကိုကို (ဦးစီးမှူး(ဒုတိယတန်း))                ၀၉ ၅၅၀၀၄၉၀၊ ၀၉ ၃၂၂၄၈၉၉၉ ရန်ကုန်အနောက်ပိုင်းခရိုင်၊ အင်းလျားကန်ဘောင်၊ IBC ၊ ပြည်လမ်းနှင့် မြကျွန်းသာပန်းခြံ၊ ကမ္ဘာအေးစေတီလမ်း ဦးမောင်မောင်ဦး (ခရိုင်ကြက်ခြေနီတပ်ဖွဲ့မှူး)       ၀၉ ၅၀၅၃၃၅၆ ရန်ကုန်အရှေ့ပိုင်းခရိုင်၊ သုဝဏ္ဏအားကစားကွင်း၊ ရခိုင်မဏ္ဍာပ်၊ ကန်တော်ကြီးမျှော်စင်ကျွန်း ဦးခင်သန်း (ယာယီခရိုင်ကြက်ခြေနီတပ်ဖွဲ့မှူး)      ၀၉ ၄၂၁၁၀၉၆၇၅ ရန်ကုန်တောင်ပိုင်းခရိုင်၊ သံလျှင်မြို့မဈေးအနီး ဦးနေလင်းထွန်း (ခရိုင်ကြက်ခြေနီတပ်ဖွဲ့မှူး)        ၀၉ ၄၂၁၁၀၉၆၉၇၊၀၉ ၇၉၉၄၄၃၀၁၁ ရန်ကုန်မြောက်ပိုင်းခရိုင်၊ အင်းစိန်၊ လှော်ကားဥယျာဉ် ဦးထိန်လင်း (ခရိုင်ကြက်ခြေနီတပ်ဖွဲ့မှူး)             ၀၉ ၇၃၀၄၂၇၉၇၊ ၀၉ ၂၆၁၈၀၄၀၈၅ အဆိုပါနေရာဒေသအလိုက် ကူညီစောင့်ရှောက်မှုပေးခြင်းများကို ရန်ကုန်တိုင်းဒေသကြီးကြက်ခြေနီ သူနာပြုတပ်ဖွဲ့ ဒုတိယတိုင်းဒေသကြီးကြက်ခြေနီတပ်ဖွဲ့မှူး ဦးအောင်မင်းမင်းကိုမှ ဦးဆောင်ကွပ်ကဲ၍ သက်ဆိုင်ရာ ခရိုင်ကြက်ခြေနီတပ်ဖွဲ့မှူးများနှင့် မြို့နယ်ကြက်ခြေနီတပ်ဖွဲ့မှူးများ၊ တပ်ဖွဲ့ဝင်များ စုစုပေါင်းအင်အား (၁၀၀) ကျော်ဖြင့် ကူညီဆောင်ရွက်သွားမည် ဖြစ်ပါသည်။

ရန်ကုန် မတ်လ ၂၀၁၈ ခုနှစ် မတ်လ ၃၀ ရက်နေ့ နံနက် ၀၉ နာရီ ၁၅ မီနစ်အချိန်တွင် မင်္ဂလာဒုံမြို့နယ် ပြည်လမ်း ဗိုလ်ခြံမှတ်တိုင်အနီးတွင် မော်တော်ဆိုင်ကယ်နှင့် ကား မတော်တဆ ယာဉ်တိုက်မှု ဖြစ်သွားခဲ့သည်။ အဆိုပါ ယာဉ်တိုက်မှုကြောင့် ဆိုင်ကယ်သမားသည် အခင်းဖြစ်ပွားရာနေရာတွင် လဲကျသွားခဲ့ရာ မြန်မာနိုင်ငံကြက်ခြေနီအသင်း လှည်းကူးမြို့နယ် ကြက်ခြေနီသူနာပြုတပ်ဖွဲ့မှ ကြက်ခြေနီစေတနာလုပ်အားရှင်မောင်ရဲဦးထက်က ထိခိုက်အနာတရ ဖြစ်သွားသော ဆိုင်ကယ်သမားအား ရှေးဦးပြုစုခြင်းများနှင့် လိုအပ်သည်များကို ကူညီပြုစုဆောင်ရွက်ပေးခဲ့သည်။ ထို့အပြင် အဆိုပါလူနာအား မြန်မာနိုင်ငံ ယာဉ်ထိန်းရဲတပ်ဖွဲ့ ယာဉ်ထိန်းရဲနှင့် ပြည်သူတချို့၏ကူညီမှုဖြင့်အတူ ဆေးရုံသို့ အချိန်မှီ ပို့ပြီး ဆေးကုသမှုခံယူနိုင်ရန် ကူညီဆောင်ရွက် ပေးခဲ့ကြောင်း သိရှိရပါသည်။ Credit; ဇော်မိုးအောင် (SO)

ညောင်လေးပင်၊ မတ်လ ၂၀၁၈ ခုနှစ် မတ်လ ၂၃ ရက်နေ့တွင် မြန်မာနိုင်ငံကြက်ခြေနီအသင်း ပဲခူးတိုင်းဒေသကြီး ညောင်လေးပင်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ၂၀၁၈ ခုနှစ်၊ မေလ ၈ ရက်နေ့တွင်ကျရောက်မည့် ကမ္ဘာ့ကြက်ခြေနီနေ့ကိုကြိုဆိုဂုဏ်ပြုသောအားဖြင့် ညောင်လေးပင်မြို့နယ်၊ ဇီးကုန်းကြီး အထက်တန်းကျောင်းတွင် ပတ်ဝန်းကျင်သန့်ရှင်းရေး ပြုလုပ်ခဲ့ကြပါသည်။ အဆိုပါကျောင်းပတ်ဝန်းကျင်သန့်ရှင်းရေးကို မြန်မာနိုင်ငံကြက်ခြေနီအသင်း ပဲခူးတိုင်းဒေသကြီး၊ ညောင်လေးပင်မြို့နယ် ကြက်ခြေနီအသင်းခွဲမှ မြို့နယ်တပ်ဖွဲ့မှူး ဦးစိုးဝင်း ဦးဆောင်၍ တပ်ဖွဲဝင်များ၊ ဇီးကုန်းကြီး အထက်တန်းကျောင်းမှ ဆရာ/ဆရာမများနှင့် ကျောင်းကြက်ခြေနီ အခြေခံရှေးဦးပြုစုခြင်းသင်တန်း (၁/၂၀၁၈)မှ သင်တန်းသား/သူများ စုစုပေါင်းအင်အား (၁၀၀) ဦးတို့က ဇီးကုန်းကြီး အထက်တန်းကျောင်းတွင်း ဆောင်ရွက်ခဲ့ကြောင်း သိရသည်။ Credit; ခင်အောင်လှိုင်(ညောင်လေးပင်)

အမ်း၊ မတ်လ မြန်မာနိုင်ငံကြက်ခြေနီအသင်း အမ်းမြိ့နယ်ကြက်ခြေနီအသင်းခွဲမှ ရခိုင်ပြည်နယ်၊ ဘူးသီးတောင်၊ မောင်တောမြို့နယ်များမှ ပြောင်းရွေ့လာသော သက် တိုင်းရင်းသားလူမျိုးများအား ထောက်ပံ့ပစွည်းများ ပေးအပ်ပွဲကို ရခိုင်ပြည်နယ်၊ အမ်းမြို့နယ်၊ ကိုးကန်တန်းကျေးရွာ၊ ဘုန်းတော်ကြီးကျောင်းတွင် ကျင်းပပြုလုပ်ခဲ့ပါသည်။ ရခိုင်ပြည်နယ် အမ်းမြို့နယ်၊ ပုဏ္ဏားဝအုပ်စု၊ ကိုးကန်တန်းကျေးရွာသို့ ပြောင်းရွေ့လာသော ဘူးသီးတောင်၊ မောင်တောမြို့နယ်များမှ သက် တိုင်းရင်းသားလူမျိုး စုစုပေါင်း အိမ်ထောင်စု (၁၉) စု၊ လူဦးရေ(၈၄)ဦးအတွက် မြန်မာနိုင်ငံကြက်ခြေနီအသင်း အမ်းမြို့နယ်ကြက်ခြေနီအသင်းခွဲမှ ထောက်ပံ့ပစွည်းများနှင့် အများပြည်သူများ၏ ထောက်ပံ့ငွေနှင့် လှူဒါန်းပစ္စည်းများကို ၂၀၁၈ခုနှစ် မတ်လ(၂၀)ရက်နေ့တွင် သွားရောက် ထောက်ပံ့ ပေးအပ်ခဲ့ပါသည်။ အဆိုပါ ထောက်ပံ့ပစ္စည်းများပေးအပ်ပွဲအခမ်းအနားသို့ အမ်းမြို့နယ်အထွေထွေအုပ်ချူပ်ရေးမှူးဦးကိုကိုမြတ်၊ မြန်မာနိုင်ငံကြက်ခြေနီအသင်း အမ်းမြို့နယ်ကြက်ခြေနီအသင်းခွဲ အမှုဆောင်အဖွဲ့ ဒုတိယ ဥက္ကဌ ဦးသာညွန့်နှင့် အဖွဲ့ဝင် ဦးစိုးစံ၊ အမ်းမြို့နာရေးကူညီမှုအသင်း နာယကနှင့် အတွင်းရေးမှူးများ၊ မြို့နယ်ကြက်ခြေနီသူနာပြုတပ်ဖွဲ့မှူး ဦးတင်မင်းမင်းဖြိုးနှင့် တပ်ဖွဲ့ဝင်(၅)ဦးတို့မှ ထောက်ပံ့ပစွည်းများ တက်ရောက် ပေးအပ်လှူဒါန်းခဲ့ပါသည်။ Credit; အမ်းမြို့နယ်ကြက်ခြေနီသူနာပြုတပ်ဖွဲ့

ရန်ကုန်၊ မတ် ၂၀၁၈ ခုနှစ် မတ်လ ၂၀ ရက်နေ့တွင် မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူသည် အင်ဒိုနီးရှားကြက်ခြေနီမှ Deputy Central Treasurer ဖြစ်သူ Mr. J. Dwihartanto နှင့် အဖွဲ့အား မြန်မာနိုင်ငံကြက်ခြေနီအသင်း ရန်ကုန် (ရုံးခွဲ) ဧည့်ခန်းမဆောင်တွင် တွေ့ဆုံခဲ့ပါသည်။ တွေ့ဆုံစဉ် မြန်မာနိုင်ငံကြက်ခြေနီအသင်းနှင့် အင်ဒိုနီးရှားကြက်ခြေနီအကြား အတွေ့အကြုံများ ဖလှယ်ခြင်းနှင့် လူမှုကရုဏာလုပ်ငန်းများတွင် ပူးပေါင်းဆောင်ရွက်ရေး ကိစ္စရပ်များကို ရင်းနှီးပွင့်လင်း စွာ ဆွေးနွေးခဲ့ကြပါသည်။ တွေ့ဆုံပွဲသို့ မြန်မာနိုင်ငံကြက်ခြေနီအသင်းအချိန်ပြည့် အလုပ်အမှုဆောင် ဦးကင်ဘွိုင်း၊ အချိန်ပြည့်အလုပ်အမှုဆောင် ဒေါက်တာဒေါ်အမယာမော်နိုင်၊ အထွေထွေအတွင်းရေးမှူး ဦးခင်မောင်လှ၊ ဒုတိယအထွေထွေအတွင်းရေးမှူး ဒေါ်ရွှေစင်မြင့်၊ ဒုတိယအထွေထွေအတွင်းရေးမှူး ဒေါ်ညိုညိုဝင့်၊ ညွှန်ကြားရေးမှူးများ၊ အင်ဒိုနီးရှားကြက်ခြေနီမှ Head of PMR and Volunteer, Mr. Muhammad Muasနှင့် တာဝန်ရှိသူများ၊ မြန်မာနိုင်ငံဆိုင်ရာ အင်ဒိုနီးရှားသံရုံးမှ တာဝန်ရှိသူများ တက်ရောက်ခဲ့ကြပါသည်။

မော်လမြိုင်၊ မတ်လ (၄၄) နှစ်မြောက် မွန်ပြည်နယ်နေ့ အခမ်းအနားတွင် မြန်မာနိုင်ငံကြက်ခြေနီအသင်း၊ မွန်ပြည်နယ်ကြက်ခြေနီ ကြီးကြပ်မှုကော်မတီနှင့် မြန်မာနိုင်ငံကြက်ခြေနီအသင်း၊ ဘေးဒုက္ခစီမံခန့်ခွဲရေးဌာန၊ မိုင်းအန္တရာယ် အသိပညာပေးခြင်းလုပ်ငန်း အစီအစဉ်တို့ ပူးပေါင်းပြီး ကြက်ခြေနီအသိပညာပေးပြခန်း ခင်းကျင်း ပြသခဲ့ပါသည်။ အဆိုပါအခမ်းအနားသို့ ပြည်ထောင်စုတိုင်းရင်းသားရေးရာဝန်ကြီး နိုင်သက်လွင်၊ မွန်ပြည်နယ်ဝန်ကြီးချုပ် အေးဇံနှင့် ဝန်ကြီးများ၊ ပြည်နယ်လွှတ်တော် ဥက္ကဌ၊ ဒုတိယ-ဥက္ကဌနှင့် အဖွဲ့ဝင်များ၊  ပြည်နယ်အဆင့် ဌာနဆိုင်ရာရုံးများ၊ ပြည်နယ်ကြက်ခြေနီကြီးကြပ်မှုကော်မတီဥက္ကဌ ဦးမျိုးဝင်းနှင့် အမှုဆောင်အဖွဲ့ဝင်များ၊ ပြည်နယ်ကြက်ခြေနီတပ်ဖွဲမှူး ဗဟိုကောင်စီဝင်ဦးကျော်မြင့်၊ မွန်ပြည်နယ် မြို့နယ်များမှ မြို့နယ်တပ်ဖွဲ့မှူးများနှင့် တပ်ဖွဲ့ဝင်များ၊ NGO/INGO အဖွဲ့အစည်းများမှ တာဝန်ရှိသူများ၊ ပြခန်းတာဝန်ခံများ တက်ရောက်ကြပါသည်။ မြန်မာနိုင်ငံကြက်ခြေနီအသင်း ကြက်ခြေနီအသိပညာပေးပြခန်းတွင် ကြက်ခြေနီလူမှုကရုဏာ လုပ်ငန်းများနှင့် ပတ်သက်သော ပစွည်းများ၊ စာအုပ်စာတမ်းများ၊ ဓါတ်ပုံများကို ဂုဏ်ယူဝင့်ကြွားစွာဖြင့် ခင်းကျင်းပြသပါသည်။ ထို့အပြင် (၄၄) နှစ်မြောက် မွန်ပြည်နယ်နေ့အခမ်းအနားသို့ တက်ရောက်လာသော ဧည့်သည်တော်များထဲမှ ကြက်ခြေနီလှုပ်ရှားမှုအကြောင်း သိလိုသူများကို ရှင်းလင်းပြောပြခဲ့ကြပါသည်။ ကြက်ခြေနီအသိပညာပေးပြခန်းကို ၂၀၁၈ ခုနှစ် မတ်လ ၁၈ ရက်နေ့ မှ ၂၃ ရက်နေ့ အထိ (၆) ရက်တိုင်တိုင် မော်လမြိုင်မြို့၊သံလွင်ဥယျာဉ်ပန်းခြံတွင် ခင်းကျင်းပြသသွားမည်ဖြစ်ကြောင်း သိရပါသည်။ Credit; ရတနာထွန်း (DM)

ဟားခါး၊ မတ်လ ၂၀၁၈ ခုနှစ် မတ်လ ၁၈ ရက်နေ့တွင် မြန်မာနိုင်ငံကြက်ခြေနီအသင်း ဟားခါးမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ၂၀၁၈ ခုနှစ်၊ မေလ ၈ ရက်နေ့တွင်ကျရောက်မည့် ကမ္ဘာ့ကြက်ခြေနီနေ့ကိုကြိုဆိုဂုဏ်ပြုသောအားဖြင့် ဟားခါးမြို့ ပြည်သူ့ဆေးရုံကြီးတွင် ပတ်ဝန်းကျင်သန့်ရှင်းရေးပြုလုပ် ခဲ့ကြပါသည်။ အဆိုပါ ပတ်ဝန်းကျင်သန့်ရှင်းရေးကို မြန်မာနိုင်ငံကြက်ခြေနီအသင်း၊ ဟားခါးမြို့နယ် ကြက်ခြေနီအသင်းခွဲမှ တပ်ဖွဲ့မှူးနှင့် ကြက်ခြေနီစေတနာလုပ်အားရှင်း စုစုပေါင်း (၃၀) ဦးတို့က ဟားခါးမြို့ ပြည်သူ့ဆေးရုံကြီးတွင်း ဆောင်ရွက်ခဲ့ကြကြောင်း သိရှိရပါသည်။ Credit; ကျဲအိုလျန်ကျုံး (SO)