= = = ဘင်္ဂလားပင်လယ်အော်အရှေ့အလယ်ပိုင်းတွင် ဖြစ်ပေါ်နေသော မုန်တိုင်းငယ်သည် မြန်မာနိုင်ငံ ရခိုင်ကမ်းရိုးတန်းဒေသအတွင်း နောက်(၉)နာရီအတွင်း ဖြတ်ကျော်ဝင်ရောက်မည်ဟု မြန်မာစံတော်ချိန် (၁၄:၀၀)နာရီအချိန်တွင် မိုးလေဝသနှင့် ဇလဗေဒ ညွှန်ကြားမှုဦးစီးဌာနမှ အနီရောင်အဆင့် ထုတ်ပြန်ခဲ့ပါသည်။ ဖြစ်ပေါ်လာနိုင်မည့် မုန်တိုင်းအန္တရာယ်အတွက် မုန်တိုင်းသတိပေး အလံများလွှင့်ထူခြင်း၊ ပြည်သူလူထုများအား မုန်တိုင်းသတင်း လိုက်လံကြေညာခြင်းနှင့် ပိုစတာများကပ်ခြင်းတို့ကို ရခိုင်ပြည်နယ်တွင်းရှိ စစ်တွေ ၊ မာန်အောင် ၊မင်းပြား မြို့နယ်ကြက်ခြေနီအသင်းခွဲများမှ ကြက်ခြေနီစေတနာလုပ်အားရှင်များက ရပ်ရွာလူထု အန္တရာယ်ကင်းရှင်းနိုင်ရန်ကြိုတင်ပြင်ဆင် ဆောင်ရွက်လျက်ရှိသည်။

= = = ရန်ကုန်၊ မေ မြန်မာနိုင်ငံကြက်ခြေနီအသင်းနှင့် သြစတြေးလျကြက်ခြေနီအသင်းတို့ ပူးပေါင်းအကောင် အထည်ဖော်ဆောင်ရွက်သည့် မသန်စွမ်းသူများ ပူးပေါင်းပါဝင်မှု လုပ်ငန်း အတွေ့အကြုံ ရှင်းလင်းပွဲ အခမ်းအနားကို၂၀၁၈ ခုနှစ် မေလ ၂၉ ရက်နေ့တွင် Central Hotel ၌ ကျင်းပခဲ့ပါသည်။ ဖွင့်ပွဲအခမ်းအနားသို့ မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူ၊ အချိန်ပြည့်အလုပ် အမှုဆောင် ဦးကင်ဘွိုင်း၊ အချိန်ပြည့်အလုပ်အမှုဆောင် ဒေါက်တာ ဒေါ်အမယာမော်နိုင်၊ ဒုတိယ အထွေထွေအတွင်းရေးမှူး ဒေါက်တာ ဒေါ်ညိုညိုဝင့်၊ သြစတြေးလျကြက်ခြေနီအသင်းမှ Program Lead ဖြစ်သူ Mr. Htoo Lerနှင့် တာဝန်ရှိသူများ၊ ညွှန်ကြားရေးမှူးများနှင့် ဒုတိယ ညွှန်ကြားရေးမှူးများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြသည်။ အခမ်းအနားတွင် မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူက အဖွင့် အမှာစကားပြောကြားခဲ့ရာ - ယခု အတွေ့အကြုံရှင်းလင်းပွဲသည် မသန်စွမ်းသူများ လူမှုအသိုင်းဝိုင်းတွင် ပိုမိုပူးပေါင်းပါဝင်လာနိုင်ရေးအတွက် အထောက်အကူဖြစ်မည်ဟု ယုံကြည်ပါကြောင်း၊ လူမှုကရုဏာလုပ်ငန်းများတွင် မသန်စွမ်းသူများ ပိုမို ပါဝင်လာဖို့ လိုအပ်နေသေးပါကြောင်း၊ မသန်စွမ်းသူများ လူမှုပတ်ဝန်းကျင်နှင့် လူမှုကရုဏာလုပ်ငန်းများတွင် ပိုမိုပါဝင်လာစေရန် စီမံချက်များ အကောင်အထည်ဖော် ဆောင်ရွက်လျှက်ရှိပါကြောင်း စသည်ဖြင့် ပြောကြားခဲ့ပါသည်။ ဆက်လက်ပြီး သြစတြေးလျကြက်ခြေနီအသင်းမှ Country Manager ဖြစ်သူ Mr. David Stephens မှ နှုတ်ခွန်းဆက်စကား ပြောကြားခဲ့ပါသည်။ အဆိုပါ အတွေ့အကြုံရှင်းလင်းပွဲတွင် မသန်စွမ်းသူများ ပူးပေါင်းပါဝင်မှု ဖွံ့ဖြိုးမှုကို ရှုထောင့် (၄) ခုဖြစ်သော မတူကွဲပြားခြားနားမှုကို အသိအမှတ်ပြုခြင်း၊ ဆုံးဖြတ်ချက်ချရာတွင် ပါဝင်ခြင်း၊ အတားအဆီးများ ဖယ်ရှားခြင်း၊ ပုံစံတကျချဉ်းကပ်ခြင်းများကို အခြေခံပြီး ဆန်းစစ်ခြင်းများကို ဘားအံနှင့် လှိုင်းဘွဲ့မြို့နယ်များတွင် ပြုလုပ်ခဲ့ပြီး တွေ့ရှိချက်များ၊ ကြုံတွေ့ခဲ့ရသည့် စိန်ခေါ်များနှင့် လူမှုအသိုင်းဝိုင်းတွင် မသန်စွမ်းသူများ ပိုမို ပူးပေါင်း ပါဝင်နိုင် စေရန်အတွက် အကြုံပြုချက်များကို ရှင်းလင်း ဆွေးနွေးသွားမည်ဖြစ်ကြောင်း သတင်းရရှိပါသည်။

ရန်ကုန်၊ မေ မြန်မာနိုင်ငံကြက်ခြေနီအသင်း ကျန်းမာရေးဌာနနှင့် ဘေးအန္တရာယ်ဆိုင်ရာစီမံခန့်ခွဲမှုဌာနတို့ ပူးပေါင်း ဖွင့်လှစ်သည့် Epidemic Control for Volunteer Training (TOT) ဖွင့်ပွဲအခမ်းအနားကို ၂၀၁၈ ခုနှစ် မေလ ၂၈ ရက်နေ့တွင် ကျင်းပခဲ့ပါသည်။ ဖွင့်ပွဲအခမ်းအနားသို့ မြန်မာနိုင်ငံကြက်ခြေနီအသင်း ဒုတိယ ဥက္ကဌ ပါမောက္ခ ဒေါက်တာ ဒေါ်နန်းထွမ်းလှ၊ အချိန်ပြည့်အလုပ်အမှုဆောင် ဦးကင်ဘွိုင်း၊ ဒုတိယ အထွေထွေအတွင်းရေးမှူး ဒေါက်တာ ဒေါ်ညိုညိုဝင့်၊ ညွှန်ကြားရေးမှူးများနှင့် ဒုတိယ ညွှန်ကြားရေးမှူးများ၊ တာဝန်ရှိသူများနှင့် သင်တန်းသား/သူများ တက်ရောက်ခဲ့ကြသည်။ အခမ်းအနားတွင် မြန်မာနိုင်ငံကြက်ခြေနီအသင်း ဒုတိယ ဥက္ကဌ ပါမောက္ခ ဒေါက်တာ ဒေါ်နန်းထွမ်းလှက အဖွင့် အမှာစကားပြောကြားခဲ့ရာ - ယခု ဖွင့်လှစ်တဲ့သင်တန်းသည် အလွန်အကျိုးရှိပြီး စိတ်ဝင်စားစရာကောင်းသည့် သင်တန်းဖြစ်ကြောင်း၊ ကပ်ရောဂါအသွင်ဖြင့် ကျရောက်တတ်သော ရောဂါများကြိုတင်ကာကွယ် တားဆီးရေးဆိုင်ရာနှင့် ပတ်သက်သည့် အခြေခံအချက်အလက်များ၊ ကြိုတင်ပြင်ဆင်ရမည့်အချက်များနှင့် ဆောင်ရွက်ရမည့် အစီအစဉ်တို့အား အသေးစိတ် သင်ကြားပေးသွားမည်ဟု သိရှိရပါကြောင်း၊ အလွန်ကောင်းမွန်သည့် အစီအစဉ်ဖြစ်ပြီး ကြက်ခြေနီ၏ ကျေးရွာအရောက် ခရီးပေါက်ရမည် ဆိုသည့် ဆောင်ပုဒ်နှင့်အညီ ဆောင်ရွက်ကြမည်ဖြစ်သောကြောင့် အလွန်ပင် ဝမ်းသာပီတိ ဖြစ်မိပါကြောင်း၊ အသင်း၏ ရည်ရွယ်ချက်နှင့် အခြေခံမှုအတိုင်း လူမျိုးဘာသာ အဆင့်အတန်း မခွဲမခြားဘဲ ကျန်းမာရေး၊ လူမှုရေးလုပ်ငန်းတွေမှာ အတတ်နိုင်ဆုံး ကူညီ ဆောင်ရွက်ကြဖို့ မှာကြားလိုပါကြောင်း၊ သင်တန်းသား/သူများအနေဖြင့် အကျိုးရှိတဲ့ သင်တန်းဖြစ်သည့်အတွက် ကြိုးစား သင်ယူကြပြီး မိမိတို့ရပ်ရွာများကို ပြန်ရောက်တဲ့အခါ ပြည်သူလူထုရဲ့ ကျန်းမာရေး အသိပညာများ တိုးတက်လာအောင် ကြိုးစားလုပ်ဆောင်ပေးစေလိုကြောင်း တို့ကို ပြောကြားခဲ့ပါသည်။ သင်တန်းဖွင့်လှစ်ရခြင်း၏ ရည်ရွယ်ချက်မှာ ကြက်ခြေနီစေတနာလုပ်အားရှင်များအနေဖြင့် ကပ်ရောဂါအသွင် ဖြစ်ပွားနိုင်သည့် ရောဂါများ၏ ကာကွယ် နှိမ်နင်းရေး အစီအမံများကို မိမိတို့ကိုယ်တိုင် ရေးဆွဲ အကောင်အထည်ဖော်ပြီး ကြံ့ကြံ့ခံတုံ့ပြန်နိုင်သော၊ ဘေးကင်းလုံခြုံသည့် လူမှုပတ်ဝန်းကျင်တစ်ခု ဖန်တီးနိုင်စေရန်၊ လူထုအတွင်း ရုတ်တရက်ဖြစ်ပွားတတ်သည့် ကပ်ရောဂါများကို ကြက်ခြေနီစေတနာလုပ်အားရှင်များနှင့် လူထုတို့ပူးပေါင်းပြီး ကြိုတင်ကာကွယ်ရန် တုံ့ပြန်နိုင်ရန်နှင့် နောက်ဆက်တွဲ ဖြစ်ပေါ်လာသော ဆိုးကျိုးများအား လျော့ချနိုင်ရန်၊ လူထုအတွင်း ကျရောက်တတ်သော ကပ်ရောဂါများနှင့် နောက်ဆက်တွဲ ပြသ၁နာများ၏ ကာကွယ်ရေး၊ ထိန်းချုပ်ရေးနှင့် တုံ့ပြန်ရေး အစီအစဉ်များကို စနစ်တကျ ဆောင်ရွက်နိုင်စေရန် ရည်ရွယ်ကာ ဖွင့်လှစ်ခြင်းဖြစ်ပါသည်။ အဆိုပါ သင်တန်းကို ၂၀၁၈ ခုနှစ် မေလ ၂၈ ရက်နေ့မှ ဇွန်လ ၁ ရက်နေ့အထိ စနစ်တကျ လေ့ကျင့် သင်ကြားပေးသွားမည်ဖြစ်ပြီး အင်းစိန်မြို့နယ်၊ မရမ်းကုန်းမြို့နယ်၊ လှိုင်သာယာမြို့နယ်၊ မင်္ဂလာဒုံမြို့နယ်နှင့် ရွှေပြည်သာမြို့နယ်များမှ ကြက်ခြေနီစေတနာလုပ်အားရှင် (၃၄) ဦး တက်ရောက်လျှက်ရှိပါသည်။ သင်တန်းပြီးဆုံးပါက သင်တန်းသား/သူများအနေဖြင့် စီမံချက်ရပ်ကွက် (၄) နေရာနှင့် စာသင်ကျောင်း (၂၀) တို့တွင် ကူးစပ်ရောက်ဂါနဲ့ ပတ်သက်သည့် အသိပညာပြန့်ပွားရေး ဟောပြောပွဲနှင့် ဆွေးနွေးပွဲများကို ပြုလုပ်သွားမည်ဖြစ်ကြောင်း သတင်းရရှိပါသည်။

အသက် ၇၈ နှစ်ရှိပြီဖြစ်သော ဦးမောင်ပိန်သည် ရခိုင်ပြည်နယ်၊ စစ်တွေမြို့ပြင် အနည်းငယ်အကွာတွင်ရှိသော ကြွီတဲကျေးရွာသား လယ်လုပ်သားဟောင်း တစ်ဦးဖြစ်သည်။ မြန်မာနိုင်ငံကြက်ခြေနီအသင်းက ဆောင်ရွက်နေသည့် ရခိုင်ပြည်နယ်အတွင်း ရေဘေး၊ အကြမ်းဖက်မှုတို့ကြောင့် ထိခိုက်ခံစား ရသူများကို အကူအညီပေးနေသည့် စီမံကိန်း၏ တစ်စိတ်တစ်ပိုင်းဖြစ်သည့် သူ၏ ကျေးရွာသို့ လာရောက်သည့် အပတ်စဉ် ရွေ့လျားကျန်းမာရေး ဆေးခန်းတွင် သောကြာနေ့ တိုင်းလာရောက်လေ့ရှိသည်။ “ အပတ်တိုင်း ကျန်းမာရေးစစ်ဆေးဖို့လာလေ့ရှိပါတယ်။ အဘမှာသွေးတိုးရောဂါ ရှိပါတယ်။ အခုလတ်တလောတော့ ချောင်းဆိုးတယ်။ ညဘက်ဆို အိပ်မပျော်ဘူး။” “ ဆရာဝန်ကသွေးပေါင်တိုင်းပေးတယ်။ သွေးတိုးအတွက် ဆေးလည်းပေးတယ်။ ချောင်းဆိုးပျောက်ဆေးလဲပေးတယ်။ ဗိုက်တာမင်ဆေးလုံးတွေလဲ ပေးတယ်။” “ ကြက်ခြေနီက ဒီလိုဆေးခန်းလေးသာ လာမဖွင့်ပေးခဲ့ရင် တစ်နာရီလောက်သွားရတဲ့ မြို့နယ်ဆေးရုံကိုပဲ သွားပြရမှာပါ။ ဦးလေးအသက်အရွယ်နဲ့ ဆေးရုံသွားဖို့ဆိုတာ ခက်ခဲပါတယ်။” “ ဒီဆေးခန်းလေးက ဦးလေးနဲ့ တစ်ရွာလုံးအတွက် တော်တော်အားကိုးရပါတယ်။ ဆေးရုံဆိုရင် ပိုက်ဆံလဲကုန်တယ်။ ဒီဆေးခန်းကတော့ အခမဲ့ကြည့်ပေးတဲ့အတွက် ဒီရွာက လူတိုင်းအတွက် အရမ်းပဲ အဆင်ပြေပါတယ်။”

အသက် ၅၇ နှစ်ရှိပြီဖြစ်တဲ့ ဦးမောင်ကျော်ဝင်းသည် ရခိုင်ပြည်နယ်၊ စစ်တွေမြို့ အထက်ဘက်ရှိ တံငါရွာ လေးဖြစ်သည့် မင်းလှကျေးရွာက ဒေသခံစေတနာလုပ်အားရှင်တစ်ဦး ဖြစ်သည်။ ဦးမောင်ကျော်ဝင်းသည် ရခိုင်ပြည်နယ်အတွင်း ကြက်ခြေနီက ဆောင်ရွက်နေတဲ့ လူမှုကရုဏာလုပ်ငန်းများတွင် ပါဝင်ကူညီ ဆောင်ရွက် ပေးလျက်ရှိသည်။ “ ဒေသခံစေတနာလုပ်အားရှင်တစ်ဦး အနေနဲ့ ကြက်ခြေနီနဲ့ ဒေသခံတွေကြားမှာ ဆက်သွယ်ဆောင်ရွက်ပေးရပါ တယ်။” “ ကြက်ခြေနီရဲ့ထောက်ပံ့မှုတွေက ဒေသခံတွေအတွက် အရမ်းကို ထိရောက်ပါတယ်။ ငါးဖမ်းတဲ့သူတွေကလဲ ပိုက်ကွန်တွေ ပိုဝယ်နိုင်လာပြီး တချို့ဆိုရင် အရင်က ပိုက်ကွန်တစ်ခုတည်းရှိရာကနေ အခုဆိုရင် သုံးခုတောင်ရှိလာပြီ။ ဒါ့ကြောင့် ဝင်ငွေလဲ သုံးဆလောက် ပိုရလာပြီပေါ့။” “ ငါးဖမ်းလုပ်ငန်းနဲ့ ရက်ကန်းလုပ်ငန်းမှာ ရင်းနှီးမြှပ်နှံတဲ့သူတွေရဲ့ ဝင်ငွေကတော့ သိသိသာသာ တိုးတက်လာတာ တွေ့ရတယ်။” “ အခုဆိုရင် သူတို့ရဲ့အခြေခံလိုအပ်ချက်တွေကို ဖြည့်ဆည်းလာနိုင်ပြီဖြစ်တယ်။ နေ့စဉ် ထမင်းနပ်မှန်အောင် စားသောက်နိုင်ပြီး အသားဟင်းတွေပါ စားနိုင်လာပါပြီ။ ဒါ့အပြင် နေမကောင်းလို့ ဆေးကုသရမယ့် စရိတ်တွေနဲ့ ကလေးတွေကို ကျောင်းအပ်နှံပေးဖို့ လိုအပ်ချက်တွေအတွက်ပါ သုံးလာနိုင်တာတွေ့ရပါတယ်။ အသက်မွေးဝမ်းကျောင်းဆိုင်ရာအထောက်အပံ့တွေက ရွာသူရွာသားတွေရဲ့ဘဝတစ်ခုလုံးအပေါ် အကျိုးသက်ရောက်မှုရှိပါတယ်။”

မြန်မာနိုင်ငံကြက်ခြေနီအသင်း၏ ၂၀၁၇ခုနစ်ထူးချွန်ဝန်ထမ်း(အမျိုသမီး)အဖြစ် ရွေးချယ်ခံရသော ဒေါ်လင်းအောင်အွယ် (အသက်- ၃၆) သည် လူမှုကရုဏာ လုပ်ငန်းများကို ချင်းပြည်နယ် မင်းတပ်မြို့နယ် ကြက်ခြေနီသူနာပြုတပ်ဖွဲ့အဝင်အဖြစ် ၂၀၀၄ ခုနှစ်မှ စတင်ပြီး ပါဝင်ဆောင်ရွက်ခဲ့သည်။ ၎င်းသည် မြန်မာနိုင်ငံကြက်ခြေနီအသင်းမှ ဦးစီးဆောင်ရွက်နေသော 3MDG/MNCH project တွင် ၂၀၁၄ ခုနှစ်မှစတင်ပြီး ကွင်းဆင်းကြီးကြပ်ရေးမှူးရာထူးဖြင့် မင်းတပ်မြို့နယ်တွင်းရှိ ကျေးရွာပေါင်း (၁၉၄) ရွာထဲမှ ဝေးလံခေါင်ပါးသောရွာများအထိပေးအပ်သည့်တာဝန်များကို ကျေပွန်စွာထမ်း ဆောင်ခဲ့ပါသည်။ ၂၀၁၄-၂၀၁၅ ခုနှစ်တွင်း ကျေးရွာပေါင်း (၃၀) ရွာ၊ ၂၀၁၆ ခုနှစ်တွင်ကျေးရွာပေါင်း (၂၂) ရွာ၊ ၂၀၁၇ ခုနှစ်တွင် ဝေးလံခေါင်ဖျား ကျေးရွာ (၁၂)ရွာ နှင့် ၂၀၁၈ ခုနှစ် လက်ရှိတာဝန်ယူဆောင် ရွက်ရ သည့်ကျေးရွာ ပေါင်း (၃၈)ရွာများတွင် Monthly Work Plan အတိုင်း လုပ်ငန်းတာဝန်များကို ကျေပွန်စွာထမ်း ဆောင်ရွက်နိုင်ခဲ့ပါသည်။ အထူးသဖြင့် မိုးတွင်းကာလ နှင့် ရောက်ရှိရန် ခက်ခဲသော ကျေးရွာများသို့ စီမံကိန်းလုပ်ငန်းများကို အောင်မြင်အောင် ခက်ခဲစွာ သွားရောက်ပြီး စွမ်းစွမ်းတမံ ကြိုးစားအကောင်အထည်ဖော် လုပ်ဆောင်နိုင်ခဲ့ခြင်းအတွက် ဒေါ်လင်းအောင်အွယ်အား မြန်မာနိုင်ငံကြက်ခြေနီအသင်းမှ ၂၀၁၇ ခုနှစ်အတွက် အမျိုးသမီး ထူးချွန်ဝန်ထမ်းအဖြစ် ရွေးချယ်လိုက်ရခြင်းဖြစ်သည်။

၂၀၁၇ ခုနှစ် မြန်မာနိုင်ငံကြက်ခြေနီအသင်း၏ ထူးချွန်ဝန်ထမ်း(အမျိုးသား)အဖြစ် ရွေးချယ်ခံရသော ဦးဇော်တင့် (အသက်- ၄၀) သည် လူမှုကရုဏာ လုပ်ငန်းများကို ဧရာဝတီတိုင်းဒေသကြီး လပွတ္တာမြို့နယ် ကြက်ခြေနီသူနာပြုတပ်ဖွဲ့ အဝင်အဖြစ် ၁၉၉၁ ခုနှစ်မှ စတင်ပြီး ပါဝင်ဆောင်ရွက်ခဲ့သည်။ ၎င်းသည် နာဂစ်ပြန်လည်ထူထောင်ရေး ကာလများတွင်လည်း မြန်မာနိုင်ငံကြက်ခြေနီအသင်း လပွတ္တာမြို့နယ်ရုံးခွဲမှာ အသက်မွေးဝမ်းကြောင်း ဆိုင်ရာ နည်းပညာရှင် (Livelihood Technician) အဖြစ်လည်း တာဝန်ထမ်းဆောင်ခဲ့သည်။ ၂၀၁၄ စက်တင်ဘာလမှ စတင်ပြီး မြန်မာနိုင်ငံကြက်ခြေနီ အသင်း ရခိုင်ပြည်နယ်အထူးဒေသစီမံချက် (Rakhine Special Programme) တွင် အသက်မွေးဝမ်းကြောင်း ဆိုင်ရာ ကွင်းဆင်းအရာရှိ (Livelihood Field Officer) အဖြစ် တာဝန်ထမ်းခဲ့ဆောင်ပြီး ၂၀၁၆ ခုနှစ် ဇွန်လတွင် စီမံကိန်း ညှိနှိုင်းရေးမှူး (program coordinator ) အဖြစ် ရာထူးတိုးမြှင့် ခံခဲ့ရသည်။ ၂၀၁၇တွင် Community Resilience Program ၌ အသက်မွေးဝမ်းကြောင်းဆိုင်ရာ (Livelihood), ရေနှင့် သန့်ရှင်းရေး (WASH), DRRနှင့် ကျန်းမာရေး အသိပညာပေးခြင်း (HEALTH Education) များကို တာဝန်ယူ ဆောင်ရွက်ခဲ့သည်။ ၂၀၁၇ ခုနှစ် အတွင်းမှာပင် မင်းပြားနှင့် မောင်တော ဒေသများရှိ ကျေးရွာများအားဆန်းစစ်လေ့လာခြင်းများပြုလုပ်ပြီး စီမံချက် ကျေးရွာများကို ရွေးချယ်ပေးနိုင်ခဲ့ပြီး လုပ်ငန်းများအောင်မြင်အောင်ဆောင်ရွက်နိုင်ခဲ့သည်။ ၂၀၁၇ ခုနှစ်အတွင်းတွင် ဖြစ်ပွားခဲ့သော ပဋိပက္ခများအကြားကာလများတွင်လည်း ရခိုင်အထူးစီမံချက်မှ စီမံကိန်းလုပ်ငန်းများကို အောင်မြင်အောင် စွမ်းစွမ်းတမံ ကြိုးစားအကောင်အ ထည်ဖော် လုပ်ဆောင်နိုင်ခဲ့ခြင်းအတွက် ဦးဇော်တင့်အား မြန်မာနိုင်ငံကြက်ခြေနီအသင်းမှ ၂၀၁၇ ခုနှစ်အတွက် ထူးချွန်ဝန်ထမ်း အဖြစ် ရွေးချယ်လိုက်ရခြင်းဖြစ်သည်။

နေပြည်တော်၊ မေ မြန်မာနိုင်ငံကြက်ခြေနီအသင်း (ဌာနချုပ်)သို့ မင်းဘူးခရိုင်ကြက်ခြေနီကြီးကြပ်မှုကော်မတီမှ ခရိုင်ဦးစီးမှူး ဒုတိယတန်း ဦးလှတိုးနှင့် မြို့နယ်တပ်ဖွဲ့မှူး ဦးတင်ညွှန့် ဦးဆောင်သော ကြက်ခြေနီသူနာပြုတပ်ဖွဲ့ဝင်များသည် ယနေ့ မေလ ၈ ရက်နေ့တွင် ကျရောက်သော ကမ္ဘာ့ကြက်ခြေနီနေ့ အထိမ်းအမှတ်အဖြစ် မြန်မာနိုင်ငံကြက်ခြေနီအသင်း (ဌာနချုပ်)သို့ လေ့လာရေးခရီးစဉ် လာရောက် လေ့လာခဲ့ကြသည်။ အဆိုပါ လေ့လာရေးခရီးစဉ် လာရောက်ကြသော ကြက်ခြေနီ စေတနာလုပ်အားရှင်များအား မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူ၊ အချိန်ပြည့်အလုပ်အမှုဆောင် ဦးကင်ဘွိုင်း၊ ညွှန်ကြားရေးမှူးများနှင့် တာဝန်ရှိသူများက လက်ခံတွေ့ဆုံခဲ့ကြသည်။ ဆက်လက်ပြီး မြန်မာနိုင်ငံံကြက်ခြေနီအသင်း ဥက္ကဌမှ လေ့လာရေးခရီးစဉ် လာရောက်ကြသော မင်းဘူးမြို့နယ် ကြက်ခြေနီအသင်းခွဲမှ ကြက်ခြေနီသူနာပြုတပ်ဖွဲ့ဝင်များကို အမှာစကားပြောကြားခဲ့ရာ - အသင်းဌာနချုပ်သို့ လေ့လာရေးခရီးစဉ် လာရောက်ကြသော ကြက်ခြေနီစေတနာလုပ်အားရှင်များကို လှိက်လဲှစွာ ကြိုဆိုပါကြောင်း၊ ကြက်ခြေနီစေတနာလုပ်အားရှင်များသည် အသင်းကြီး၏ အင်အားလည်းဖြစ်ပါကြောင်း၊ ကြက်ခြေနီလူမှုကရုဏာလုပ်ငန်းများကို ယခုထက်ပိုမို အားသွန်ခွန်စိုက် လုပ်ဆောင်ကြရန် တိုက်တွန်းလိုပါကြောင်း၊ အခြား လူမှုရေး အသင်း/အဖွဲ့များနှင့် ချိတ်ဆက်ပြီး လူမှုကရုဏာလုပ်ငန်းများကို ဆောင်ရွက်စေလိုပါကြောင်း စသည်ဖြင့် တိုက်တွန်း ပြောကြားခဲ့သည်။ ထို့နောက် မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူက လေ့လာရေးခရီးစဉ် လာရောက်ကြသော ကြက်ခြေနီ စေတနာလုပ်အားရှင်များအား အမှတ်တရပစွည်းများ ပေးအပ်ခဲ့ပြီး စုပေါင်းမှတ်တမ်းတင် ဓါတ်ပုံရိုက်ကူးခဲ့ကြသည်။ မြန်မာနိုင်ငံကြက်ခြေနီအသင်း မင်းဘူးခရိုင်ကြက်ခြေနီကြီးကြပ်မှုကောမတီမှ ခရိုင်ဦးစီးမှူး ဦးလှတိုး (ဒုတိယတန်း)နှင့် မြို့နယ်တပ်ဖွဲ့မှူး ဦးတင်ညွှန့် ဦးဆောင်သော ကြက်ခြေနီသူနာပြုတပ်ဖွဲ့ဝင်များသည် မြန်မာနိုင်ငံကြက်ခြေနီအသင်း ဌာနချုပ်ရှိ ဌာနများကို လေ့လာခဲ့ကြပြီး သက်ဆိုင်ရာ တာဝန်ရှိသူများက သိလိုသည်များကို ရှင်းလင်းပြောကြားခဲ့ပါသည်။