မြန်မာနိုင်ငံကြက်ခြေနီအသင်း ဥက္ကဌ ဒေါက်တာမောင်မောင်မြင့်နှင့် အဖွဲ့ဝင်များသည် ၂၀၂၂ ခုနှစ်၊ မတ်လ (၁၀) ရက်နေ့ နံနက် (၉း၀၀) နာရီ အချိန်က အသင်းဌာနချုပ်၊ အပြည်ပြည်ဆိုင်ရာကြက်ခြေနီကော်မတီနှင့် ကရင်ပြည်နယ် ကြက်ခြေနီကြီးကြပ်မှုကော်မတီတို့ ပူးပေါင်းပြီး ကရင်ပြည်နယ်၊ ဘားအံမြို့၊ ပြည်နယ်ကြက်ခြေနီ ကြီးကြပ်မှုကော်မတီရုံးတွင်ပြုလုပ်သည့် စွမ်းဆောင်ရည်မြှင့်သင်တန်း ဖွင့်ပွဲအခန်းအနားကို အွန်လိုင်းမှ တက်ရောက်ခဲ့ပါသည်။
အခမ်းအနားဖွင့်ပွဲတွင် အသင်းဥက္ကဌမှ အသင်းအနေဖြင့် လက်တလောဖြစ်ပေါ်နေသည့် အခြေအနေများတွင် အများပြည်သူအတွက် အသင်းက ချမှတ်ထားသည့် ဆင်းရဲ ဒုက္ခနည်းပါးသက်သာစေရန် ဆိုသည့် ရည်ရွယ်ချက်အတိုင်း အတတ်နိုင်ဆုံး ကူညီထောက်ပံ့ပေးတဲ့လုပ်ငန်းတွေကို လုပ်ဆောင်ပေးလျက်ရှိ ပါကြောင်း၊ ဤကဲ့သို့ ဆောင်ရွက်ရာတွင် အသင်းဌာနချုပ်အနေနှင့် နည်းပညာပိုင်း ကူညီပေးလျက်ရှိပြီး မြေပြင်မှာ လက်တွေ့ အကောင်အထည်ဖော်နေသူများမှာ ကြက်ခြေနီစေတနာလုပ်အားရှင်များ ဖြစ်ပါကြောင်း၊ ထို့ကြောင့် မြေပြင်မှာ ကူညီဆောင်ရွက်ပေးနေကြတဲ့ ကြက်ခြေနီစေတနာလုပ်အားရှင်များ အနေဖြင့် လိုအပ်မည့် နည်းစနစ်တွေ အသိပညာ အတတ်ပညာတွေကို သိရှိ လိုက်နာ ဆောင်ရွက်နိုင်ဖို့အတွက် ယခုကဲ့သို့ သင်တန်းဖွင့်လှစ်ရခြင်း ဖြစ်ပါကြောင်း၊ ထို့ကြောင့် သင်တန်း တက်ရောက်လာကြတဲ့ ကြက်ခြေနီစေတနာ လုပ်အားရှင်များအနေနဲ့ သင်ကြားပေးတဲ့ နည်းစနစ်တွေကို သေချာသင်ကြားမှတ်သားကြပြီး ပြည်သူတွေအတွက် ကြက်ခြေနီက ဆောင်ရွက်မည့် လုပ်ငန်းများမှာ ပြန်လည်အသုံးချကြရန်တိုက်တွန်းပါကြောင်းစသဖြင့် ပြောကြားခဲ့ပါသည်။
ဆက်လက်ပြီး ကရင်ပြည်နယ်ကြက်ခြေနီတပ်ဖွဲ့မှူး ဦးမြင့်နိုင်မှ ကျေးဇူးတင်စကားပြန်လည်ပြောကြားခဲ့ပြီး အပြည်ပြည်ဆိုင်ရာကြက်ခြေနီကော်မတီ ဘားအံရုံးတာဝန်ခံ ဦးစစီးလွင်မှ နှုတ်ခွန်းဆက်စကား ပြောကြားခဲ့ပါသည်။
သင်တန်းဖွင့်ပွဲကို အသင်းဥက္ကဌနှင့်အတူ ဒုတိယဥက္ကဌ ဒေါက်တာ ဒေါ်အမယာမော်နိုင်၊ အချိန်ပြည့်အလုပ် အမှုဆောင် ဒေါက်တာတင်ညွန့်၊ အထွေထွအတွင်းရေးမှူး၊ ဒုတိယအထွေထွေ အတွင်းရေးမှူးများ၊ ကရင်ပြည်နယ်ကြက်ခြေနီကြီးကြပ်မှုကော်မတီ ယာယီဥက္ကဋ္ဌ ဒေါ်မြင့်မြင့်သိန်းနှင့် ကရင်ပြည်နယ် ကြက်ခြေနီတပ်ဖွဲ့မှူး၊ အပြည်ပြည်ဆိုင်ရာကြက်ခြေနီကော်မတီ၏ ဘားအံရုံးတာဝန်ခံ၊ အသင်းဌာနချုပ်မှ ညွှန်ကြားရေးမှူးများ၊ ဌာနမှူးများ၊ ဒုတိယညွှန်ကြားရေးမှူးများနှင့် ဝန်ထမ်းများ၊ ကြက်ခြေနီ စေတနာလုပ်အားရှင် သင်တန်းသား/သူများတက်ရောက်ခဲ့ပါသည်။
