အကူအညီလိုအပ်နေသူများအတွက် တတ်စွမ်းသမျှပံ့ပိုးပေးနေတဲ့ မြန်မာနိုင်ငံကြက်ခြေနီအသင်းဟာ တိုင်းနှင့်ပြည်နယ်အသီးသီးမှာ စေတနာလုပ်အားရှင်တွေအင်အားနဲ့ လူမှုကရုဏာလုပ်ငန်းတွေကို ဖြန့်ကျက်ဆောင်ရွက်ပေးနေတာပါ။
ဇန်နဝါရီလ (၂၆)ရက်နေ့က ရှမ်းပြည်နယ်တောင်ပိုင်း တောင်ကြီး၊ညောင်ရွှေ၊ဆီဆိုင် မြို့နယ်တွေက နေရပ်စွန့်ခွာစခန်းတွေမှာရှိတဲ့အိမ်ထောင်စုတွေအတွက် လိုအပ်တဲ့ အသုံးအဆောင်ပစ္စည်းတွေကို အိမ်ထောင်စု (၃၅၅ စု)အတွက် မိသားစုတစ်ကိုယ်ရည်သန့်ရှင်းရေးသုံးပစ္စည်းများ(တစ်ပတ်စာ) (၁၃၅)စုံ၊ တစ်ကိုယ်ရည်သန့်ရှင်းရေးသုံးပစ္စည်းများ(အရေးပေါ်) (၂၂၀)စုံ၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၃၀၈)စုံ၊ နှာခေါင်းစည်း(၂၅၂)ဗူး၊ လက်သန့်စင်ဆေးရည် (၆၂၅)ဗူး၊ ပလပ်စတစ်အိတ်(၁၃၅)အိတ်၊ စောင် (၁၇၄)ထည်၊ ခြင်ထောင် (၁၆၁)လုံး၊ ရေချိုးဆပ်ပြာ (၁၇၃)ခု ကို နေရပ်စွန့်ခွာစခန်းတွေဆီ သွားရောက်ပေးအပ်ခဲ့ကြပါတယ်။
အသုံးအဆောင်ပစ္စည်းတွေ သွားရောက်ထောက်ပံ့ရာမှာ ရှမ်းပြည်နယ်(တောင်ပိုင်း) ကြက်ခြေနီကြီးကြပ်မှုကော်မတီဥက္ကဌ ဦးညီညီ၊ မြန်မာနိုင်ငံကြက်ခြေနီအသင်း၊ ဘေးအန္တရာယ်ဆိုင်ရာစီမံခန့်ခွဲရေးဌာန ညွှန်ကြားရေးမှူး ဒေါ်စန်းစန်းမော်၊ ပြည်နယ်ကြက်ခြေနီတပ်ဖွဲ့မှူး ဦးအေးချမ်းတို့နှင့်အတူ ကြက်ခြေနီစေတနာလုပ်အားရှင်များက နေရပ်စွန့်ခွာပြည်သူတွေကို အားပေးစကားပြောကြားခဲ့ကြပြီး စိတ်ပိုင်းလူမှုပိုင်းဆိုင်ရာအားပေးကူညီမှုတွေကိုလည်း ပြုလုပ်ပေးခဲ့ကြပါတယ်။
မြန်မာနိုင်ငံကြက်ခြေနီအသင်းရဲ့ ကြက်ခြေနီကွန်ယက်မှာ ပါဝင်လှုပ်ရှားကြသူတွေဟာ အသင်းရဲ့ ရည်ရွယ်ချက်ဖြစ်တဲ့ ရပ်ရွာလူထုခံစားနေရတဲ့ ဆင်းရဲဒုက္ခတွေ လျော့ပါးသက်သာစေဖို့ ကြိုးပမ်းအားထုတ်ဆောင်ရွက်နေကြတာပဲ ဖြစ်ပါတယ်။
