မင်းတပ်၊ ဇွန်လ (၁၂)ရက်
============
မြန်မာနိုင်ငံကြက်ခြေနီအသင်း၊ အပြည်ပြည်ဆိုင်ရာကြက်ခြေနီကော်မတီနှင့် မကွေးတိုင်း ကြက်ခြေနီကြီးကြပ်မှုကော်မတီတို့ပူးပေါင်း၍ ၂၀၂၁ ခုနှစ်၊ ဇွန်လ (၁၂)ရက်နေ့က ချင်းပြည်နယ် မင်းတပ်မြို့နယ်အတွင်းရှိ တိုက်ပွဲရှောင်များထဲမှ အရေးပေါ်ကျန်းမာရေးစောင့်ရှောက်မှု လိုအပ်လျက်ရှိသည့် အသက် (၁၂) နှစ်အရွယ် ယောင်္ကျားလေး (၁) ဦး၊ အသက် (၁၀) နှစ်အရွယ် မိန်းကလေး (၁) ဦး နှင့် (၂) ရက်သား မွေးကင်းစအရွယ် ယောင်္ကျားလေး (၁) ဦး၊ စုစုပေါင်း ကလေးငယ်(၃) ဦးတို့အား ကျောက်ထုမြို့မှတစ်ဆင့် ပခုက္ကူဆေးရုံသို့ ပို့ဆောင်နိုင်ရေးအတွက် သက်ဆိုင်ရာအာဏာပိုင်များ၊ ဒေသခေါင်းဆောင်များနှင့် ညှိနှိုင်းခဲ့ပြီး ဒေသခံများ၏ အကူအညီဖြင့် လူနာကလေးငယ်များအား ကျောက်ထုမြို့အထိ ပို့ဆောင်ပေးခဲ့ကြပါသည်။
ထိုမှတဆင့် မကွေးတိုင်းဒေသကြီး၊ ပခုက္ကူမြို့နယ် ကြက်ခြေနီသူနာပြုတပ်ဖွဲ့မှ တပ်ခွဲမှူး ဇင်နိုင်ဦး ဦးဆောင်သော ကြက်ခြေနီစေတနာလုပ်အားရှင် (၄) ဦးတို့သည် ကြက်ခြေနီ လူနာတင်ယာဉ် (၂) စီးဖြင့် ကျောက်ထုမြို့တွင် လူနာကလေးငယ်(၃)ဦးအား လွှဲပြောင်းလက်ခံခဲ့ပြီး ပခုက္ကူဆေးရုံသို့ ညနေ (၅) နာရီအချိန်တွင် ဆေးကုသမှုခံယူနိုင်ရန် စနစ်တကျ လွှဲပြောင်းပေးခဲ့သည်။
