၂၀၂၁ ခုနှစ်၊ ဧပြီလ ၈ ရက်နေ့က လတ်တလောဖြစ်ပေါ်နေသည့် အခက်အခဲများကြောင့် ရှမ်းပြည်နယ် (မြောက်ပိုင်း)၊ လားရှိုးမြို့သို့ ရောက်ရှိလာသည့် ယာယီနေရပ်စွန့်ခွါအိမ်ထောင်စု (၉) စု လူဦးရေ (၆၂) ဦးအတွက် အရေးပေါ်လိုအပ်နေသည့် စောင် (၆၂) ထည်နှင့် ခြင်ထောင် (၆၂) လုံးတို့အား မြို့နယ်ကြက်ခြေနီအသင်းခွဲဥက္ကဌ ဒေါ်နီလာငယ်နှင့် ကြက်ခြေနီစေတနာလုပ်အားရှင်(၅) ဦးတို့က သွားရောက် ထောက်ပံ့ပေးအပ်ခဲ့ကြသည်။

ရန်ကုန်တိုင်းဒေသကြီးအတွင်းရှိ မြို့နယ်အသီးသီးတွင် သက်ဆိုင်ရာမြို့နယ်ကြက်ခြေနီအသင်းခွဲများအလိုက် ကြက်ခြေနီစေတနာလုပ်အားရှင်များက ရွေ့လျားရှေးဦးပြုစုခြင်းစခန်းငယ်များဖွင့်လှစ်ကာ ထိခိုက်ဒဏ်ရာရရှိသူများ၊ အရေးပေါ်ဆေးကုသမှုခံယူရန်လိုအပ်သူများအတွက် အရေးပေါ်ရှေးဦးပြု စုပေးခြင်း၊ ဆေးရုံဆေးခန်းသို့ ပို့ဆောင်ပေးခြင်းတို့ကို နေ့စဥ်ကူညီဆောင်ရွက်ပေးလျက်ရှိကြပါသည်။

ဒဂုံမြို့သစ်တောင်ပိုင်းမြို့နယ်ကြက်ခြေနီအသင်းခွဲမှ မြို့နယ်အတွင်းရှိ အရပ်ဖက်လူမှုအဖွဲ့အစည်း (၈) ဖွဲ့သို့ CDA မှ လာရောက်လှူဒါန်းထားသည့် ရှေးဦးပြုစုခြင်းဆေးအိတ်များဖြစ်သော FA Kit များ နှင့် MRCS Trauma FA Booklet များကို ၂၀၂၁ ခုနှစ်၊ ဧပြီလ (၄) ရက်နေ့က ထောက်ပံ့ပေးအပ်ခဲ့ကြသည်။

၂၀၂၁ခုနှစ်၊ ဧပြီလ ၃ ရက်နေ့က ထိုင်း-မြန်မာအမှတ်(၂)ချစ်ကြည်ရေးတံတားမှတစ်ဆင့် ရှမ်းပြည်နယ်အရှေ့ပိုင်း၊ တာချီလိတ်မြို့သို့ ပြန်လည်ဝင်ရောက်လာကြသော နေရပ်ပြန်ပြည်သူများအား တာချီလိတ်ခရိုင်/မြို့နယ်ရှိ ကြက်ခြေနီစေတနာလုပ်အားရှင်များက COVID-19 ရောဂါကာကွယ်ရေးအသိပညာပေးခြင်း၊ ကိုယ်အပူချိန်တိုင်းပေးခြင်း၊ စိတ်ပိုင်း၊လူမှုပိုင်းဆိုင်ရာ အားပေးကူညီခြင်း၊ မိသားစုနှင့်ပြန်လည်ဆက်သွယ်ပေးရေးအတွက် ကိုယ်ရေးမှတ်တမ်းများရယူခြင်းနှင့် နေရာထိုင်ခင်းစီစဥ်ပေးခြင်းတို့ကို ကူညီဆောင်ရွက်ပေးခဲ့ကြသည်။

၂၀၂၁ခုနှစ်၊ ဧပြီလ(၁)ရက်နေ့က မန္တလေးတိုင်းဒေသကြီး ပြည်ကြီးတံခွန်မြို့နယ်၊ နံ့သာရပ်ကွက်၌ မီးလောင်ကျွမ်းခဲ့ရာ ယာယီဖွင့်လှစ်ထားသော မီးဘေးကယ်ဆယ်ရေးစခန်းတွင်ထိခိုက်ဒဏ်ရာရရှိခဲ့ကြသော ပြည်သူများအား‌ရှေးဦးပြုစုနည်းဖြင့် အနာဆေး‌ခြင်း၊ ဆေးထည့်ပတ္တီးစည်းပေးခြင်းနှင့် မီးဘေးကယ်ဆယ်ရေးစခန်းအတွင်း ခြင်ဆေးဖျန်းခြင်းတို့ကို ပြည်ကြီးတံခွန်မြို့နယ်နှင့် အမရပူရမြို့နယ်တို့မှ ကြက်ခြေနီစေတနာလုပ်အားရှင်များသည် ဧပြီလ(၅)ရက်နေ့က ပူးပေါင်းဆောင်ရွက်ခဲ့ကြပါသည်။