၂၀၂၁ခုနှစ်၊ ဧပြီလ(၁၄)ရက်နေ့က ပြည်ထောင်စုနယ်မြေနေပြည်တော်မှ ကြက်ခြေနီစေတနာလုပ်အားရှင် (၅)ဦးသည် Mobile First Aid ဆောင်ရွက်နေစဉ် လှေခွင်းတောင်နှင့် ပေါင်းလောင်းဆည်သွားသည့်လမ်း၌ ဆိုင်ကယ်မတော်တဆဖြစ်ပြီး ထိခိုက်ဒဏ်ရာရသူ(၂)ဦးကို တွေ့ရှိရာ ရှေးဦးပြုစုနည်းဖြင့် ပြုစုစောင့်ရှောက်ပေးခဲ့ကြသည်။  

၂၀၂၁ခုနှစ်၊ ဧပြီလ(၁၄)ရက်နေ့ ညနေပိုင်းတွင် ကချင်ပြည်နယ် မြစ်ကြီးနားမြို့ အဝေးပြေးလမ်းမ၌ ယာဉ်မ‌ေတာ်တဆဖြစ်ပြီး ထိခိုက်ဒဏ်ရာရရှိသူအား ဒုတိယပြည်နယ်ကြက်ခြေနီတပ်ဖွဲ့မှူး ဦးအောင်ကျော်လင်းနှင့် ကြက်ခြေနီစေတနာလုပ်အားရှင်(၅)ဦး တို့သည် ရှေးဦးပြုစုပေးပြီး ဆေးရုံ သို့ အချိန်မီပို့ဆောင်ကူညီပေးခဲ့ကြပါသည်။

၂၀၂၁ခုနှစ် ဧပြီလ(၁၃)ရက်နေ့က မန္တလေးတိုင်းဒေသကြီး၊ အောင်မြေသာစံမြို့နယ်၊ ဥပုသ်တော်ရပ် မြောက်နွားခြံကုန်းတွင် ဖြစ်ပွားခဲ့သော မီးလောင်မှုကြောင့် အိမ်ထောင်စု(၄၀)စု ထိခိုက်ပျက်စီးခဲ့ရသဖြင့် ယနေ့ ဧပြီလ (၁၄)ရက်နေ့တွင် မန္တလေးတိုင်းဒေသကြီးကြက်ခြေနီကြီးကြပ်မှုကော်မတီဝင်ဦးယုတင်၊ အောင်မြေသာစံမြို့နယ်ကြက်ခြေနီအသင်းခွဲဥက္ကဌ ဦးသောင်းဌေး၊ မြို့နယ် ကြက်ခြေနီတပ်ဖွဲ့မှူးဦးတင်မိုးအောင်နှင့် ကြက်ခြေနီစေတနာလုပ်အားရှင်များက ထိခိုက်ခံစားရသော အိမ်ထောင်စုတစ်စုလျှင် တစ်ကိုယ်ရည်သန့်ရှင်းရေးသုံးပစ္စည်း(၁)စုံ၊ မီးဖိုချောင်သုံးပစ္စည်း(၁)စုံ၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း(၁)စုံ၊ စောင်(၁)ထည်၊ ခြင်ထောင်(၁)လုံးစီ တို့ကို အိမ်ထောင်စု (၄၀)စု အတွက် သွားရောက် ထောက်ပံ့ပေးအပ်ခဲ့ပြီး မီးဘေးသင့်မှုကြောင့် စိတ်ထိခိုက် ခံစားရသည့် ပြည်သူများအားစိတ်ပိုင်းလူမှုပိုင်းဆိုင်ရာ အားပေးကူညီခြင်းများ ပြုလုပ်ပေးခဲ့ကြပါသည်။

၂၀၂၁ခုနှစ်၊ ဧပြီလ(၁၃)ရက်နေ့ ည‌နေပိုင်းက မန္တလေးတိုင်းဒေသကြီး၊ အမရပူရမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်(၇)ဦးတို့သည် မြစ်ငယ်မြို့အနီး ဖြစ်ပွားခဲ့သည့် ဖြစ်စဉ်များကြောင့် သတိလစ်သူများနှင့် ထိခိုက်ဒဏ်ရာရရှိသူများအား ရှေးဦးပြုစုစောင့်ရှောက်ပေးခဲ့ကြသည်။