ကြက်ခြေနီစေတနာလုပ်အားရှင်များအနေနဲ့ မိမိတို့နေထိုင်ရာ ဒေသအသီးသီမှာရှိကြတဲ့ ပြည်သူများ လိုအပ်နေတဲ့ လူမှုကရုဏာအကူအညီတွေကို စဉ်‌ဆက်မပြတ်ဆောင်ရွက် အကူအညီပေးနေကြပါတယ်။

တနင်္သာရီတိုင်းဒေသကြီး မြို့နယ်တွေရဲ့ ကြက်ခြေနီလှုပ်ရှားမှုသတင်းတွေကို ထားဝယ်မြို့မှ ဦးမြင့်နိုင်က ယခုလိုပေးပို့ထားပါတယ်။

နိုဝင်ဘာလ(၉)ရက်နေ့မှ နိုဝင်ဘာလ(၁၉)ရက်နေ့အတွင်းမှာ ထားဝယ်မြို့နယ်မှ ကြက်ခြေနီစေတနာလုပ်အားရှင်တွေက ကြက်ခြေနီလူနာတင်ယာဉ်နဲ့ လူနာ(၄၁)ဦးကို ဆေးရုံတက်ဖို့၊ ဆေးရုံပြောင်းရွေ့ဖို့နဲ့ ဆေးရုံဆင်းဖို့ အတွက် ကူညီပေးခဲ့ကြပါတယ်။ ဒါ့အပြင် အောက်စီဂျင်အိုး ရှာဖွေပို့ဆောင်ပေးတာတွေလည်း ပြုလုပ်ပေးခဲ့ကြပါတယ်။

ထားဝယ်မြို့ လေယာဥ်ကွင်းမှာ ဆိုက်ရောက်ခရီးသည်များ စာရင်းသွင်းခြင်း၊ ကိုယ်အပူချိန်တိုင်းတာခြင်းနဲ့ အရေးပေါ်ဆေးရုံပို့ရန်လိုအပ်ပါက အသုံးပြုနိုင်ရန် ကြက်ခြေနီလူနာတင်ယာဥ်(၁)စီး၊ ကြက်ခြေနီ‌စေတနာလုပ်အားရှင်(၅)ဦးတို့ဖြင့် ကူညီဆောင်ရွက်ပေးလျက်ရှိပါတယ်။

ထားဝယ်ဆေးရုံကြီးမှာ အရေးပေါ်သွေး လိုအပ်နေတဲ့ လူနာ‌အတွက် (B)သွေး (၂)လုံးနဲ့ (O)သွေး(၁)လုံးကိုတော့ ကြက်ခြေနီစေတနာလုပ်အားရှင် ဦးဝေယံနိုင်၊ ဦးအောင်မင်းဖြိုးနှင့်ဒေါ်ဆုစန္ဒီထွေး တို့က လှူဒါန်းခဲ့ကြပါတယ်။

သရက်ချောင်းမြို့နယ်မှ ကြက်ခြေနီစေတနာလုပ်အားရှင်များကလည်း ဆီတောကျေးရွာ ကျောင်းမှာ COVID-19 ရောဂါကာကွယ်နိုင်ဖို့ ပိုးသတ်ဆေးဖြန်း‌ပေးခဲ့ပြီးနှာခေါင်းစည်း၊ လက်ဆေးဂျယ််၊ မျက်နှာအကာများကို လှူဒါန်းခဲ့ပါတယ်။

ပုလောမြို့နယ်ကြက်ခြေနီစေတနာလုပ်အားရှင်များကတော့ အထက(၁)ခန်းမ COVID-19ရောဂါကာကွယ်

ဆေးထိုးစုရပ်နဲ့ ပိန်းတောကျေးရွာသို့ ကာကွယ်ဆေးထိုးအဖွဲ့သွားရောက်ရာမှာ ပါဝင်ကူညီခဲ့ကြပါတယ်။

COVID-19 ရောဂါကာကွယ်ရေးနှင့် တုံ့ပြန်ဆောင်ရွက်ရေးလုပ်ငန်းများ ဆောင်ရွက်ရာတွင် အသုံးပြုနိုင်ရန်အတွက် Abercrombie & Kent Myanmar မှ PPE ဝတ်စုံ (၁၀၀)အား ၂၀၂၁ခုနှစ်၊ နိုဝင်ဘာလ ၁၆ရက်နေ့က ဘိုကလေးမြို့နယ်ကြက်ခြေနီအသင်းခွဲသို့ လာရောက်လှူဒါန်းခဲ့ကြရာ မြို့နယ်ကြက်ခြေနီတပ်ဖွဲ့မှူး ဦးသက်နိုင်က လက်ခံရယူပြီး ကျေးဇူးတင်စကားပြောကြားကာ ဂုဏ်ပြုမှတ်တမ်းလွှာအား ပြန်လည်ပေးအပ်ခဲ့ပါသည်။

ဘိုကလေးမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် အခြားပြည်နယ်၊ တိုင်းဒေသကြီး အသီးသီးမှ ကြက်ခြေနီစေတနာလုပ်အားရှင်များနည်းတူ COVID-19 ရောဂါစတင်ဖြစ်ပွားချိန်မှစတင်ကာ ရပ်ရွာလူထုအား အသိပညာပေးခြင်းများဆောင်ရွက်ခဲ့ကြပြီး တုံ့ပြန်ကာကွယ်ရေးလုပ်ငန်းများတွင်လည်း တက်ကြွစွာပါဝင်ဆောင်ရွက်ခဲ့ကြပါသည်။

အသွားအလာကန့်သတ်စောင့်ကြည့်ရေးစခန်းများတွင် လိုအပ်သည်များ ကူညီဆောင်ရွက်ပေးခြင်း၊ ပိုးတွေ့လူနာများအား ကုသရေးစင်တာများသို့ ပို့ဆောင်ပေးခြင်း၊ ဆေးဖြန်းပေးခြင်း၊ လူအများသွားလာတတ်သောနေရာများတွင် နှာခေါင်းစည်းများနှင့် လက်သန့်စင်ဆေးရည်များအခမဲ့ ဖြန့်ဝေပေးခြင်း၊ ကာကွယ်ဆေးထိုးလုပ်ငန်းများတွင် ကူညီဆောင်ရွက်ပေးခြင်းတို့ကိုလည်း နေ့စဉ်ဆောင်ရွက်ကူညီပေးလျှက်ရှိကြပါသည်။

ယခုကဲ့သို့ ကြက်ခြေနီလှုပ်ရှားမှုအား ယုံကြည်စွာဖြင့် ရောဂါကာကွယ်ရေးနှင့် တုံ့ပြန်ဆောင်ရွက်ရေးအတွက် လိုအပ်သည့် PPEဝတ်စုံများအား လာရောက်လှူဒါန်းပေးကြသော Abercrombie & Kent Myanmar အား မြန်မာနိုင်ငံကြက်ခြေနီအသင်းမှ ကျေးဇူးအထူးတင်ရှိပါသည်။

၂၀၂၁ ခုနှစ်၊ ကမ္ဘာ့ရှေးဦးပြုစုခြင်းနေ့အထိမ်းအမှတ်၊ ရှေးဦးပြုစုခြင်းဆိုင်ရာလုပ်ငန်းများတွင် ထူးချွန်ဆုရရှိသူများအား ဆုချီးမြင့်ခြင်းအခမ်းအနားကို ယနေ့ နိုဝင်ဘာလ (၁၆)ရက်နေ့နံနက်ပိုင်းက မြန်မာနိုင်ငံကြက်ခြေနီအသင်း ရန်ကုန်ရုံးခွဲ၌ပြုလုပ်ခဲ့ရာ အသင်းဥက္ကဌ ဒေါက်တာမောင်မောင်မြင့် တက်ရောက်ခဲ့ပါသည်။

အခမ်းအနားတွင် ရှေးဦးစွာ အသင်းဥက္ကဌ ဒေါက်တာမောင်မောင်မြင့်က အမှာစကားပြောကြားပါသည်။

ထို့နောက် ရှေးဦးပြုစုခြင်းဆိုင်ရာလုပ်ငန်းများတွင် ထူးချွန်ဆုရရှိသူများအား ဆုများချီးမြင့်ရာ(နည်းပြ)သင်တန်းများဖွင့်လှစ်နိုင်သည့်ဆု၊ ရှေးဦးပြုစုခြင်းစီမံချက်လုပ်ငန်းများ အောင်မြင်စွာအကောင်အထည်ဖော်ဆောင်ရွက်နိုင်သည့်ဆု၊ ရှေးဦးပြုစုခြင်းသင်တန်းများအကြိမ်ရေအများဆုံး ဖွင့်လှစ်နိုင်သည့်မြို့နယ်ဆုနှင့် ရှေးဦးပြုစုခြင်းဖြင့် ကူညီဆောင်ရွက်ပေးနိုင်သည့်ကြက်ခြေနီစေတနာလုပ်အားရှင်များအား ဆုများနှင့် ဂုဏ်ပြုမှတ်တမ်းလွှာများ ပေးအပ်ချီးမြှင့်ခဲ့ကြပါသည်။

ဆက်လက်၍ ရှေးဦးပြုစုခြင်းဆိုင်ရာ လူငယ်စာစီစာကုံးပြိုင်ပွဲ(မြန်မာ၊ အင်္ဂလိပ်)၊ ဉာဏ်စမ်းပြိုင်ပွဲ၊ ပန်းချီပြိုင်ပွဲတို့တွင် ဆုရရှိခဲ့သည့်လူငယ်ကြက်ခြေနီစေတနာလုပ်အားရှင်များအား ဆုများ ပေးအပ်ချီးမြှင့်ခဲ့ကြပါသည်။

အခမ်းအနားသို့ အသင်းဥက္ကဌနှင့်အတူ အချိန်ပြည့်အလုပ်အမှုဆောင်ဒေါက်တာတင်ညွန့်၊ တိုင်းဒေသကြီး၊ ပြည်နယ်ကြက်ခြေနီကြီးကြပ်မှု‌ကော်မတီဥက္ကဌများ၊ ဒုတိယအထွေထွေအတွင်းရေးမှူးဒေါက်တာဒေါ်ညိုညိုဝင့်၊ တိုင်းဒေသကြီး/ ပြည်နယ်ကြက်ခြေနီကြီးကြပ်မှုကော်မတီဝင်များ၊ တပ်ဖွဲ့မှူးများ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများနှင့် ဖိတ်ကြားထားသူများ တက်ရောက်ခဲ့ကြပါသည်။

အဆိုပါအခမ်းအနားသို့ တိုင်းဒေသကြီး၊ ပြည်နယ်ကြက်ခြေနီကြီးကြပ်မှုကော်မတီများကonline ဖြင့်တက်ရောက်ခဲ့ပြီး ဆုရရှိသူများကို ဆုများချီးမြှင်ပေးအပ်ခဲ့ပါသည်။

နေပြည်တော်၊ နိုဝင်ဘာလ(၁၄)ရက်။

မြန်မာနိုင်ငံကြက်ခြေနီအသင်း ၊ အဖွဲ့အစည်းဆိုင်ရာဖွံ့ဖြိုးတိုးတက်ရေးဌာန၊ အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေးရှင်းနှင့် Generation Amazing တို့ ပူးပေါင်း ဆောင်ရွက်သော အပြုအမူကောင်းများ ပြောင်းလဲခြင်းဆိုင်ရာ လူငယ်ကိုယ်စားလှယ်များနှင့် ဘောလုံးအခြေပြု လူငယ်ဖွံ့ ဖြိုးတိုးတက်ရေး သင်တန်းဆင်းပွဲကို ယနေ့ နိုဝင်ဘာလ(၁၄)ရက်နေ့ ညနေပိုင်းက ပြည်ထောင်စုနယ်မြေ၊ နေပြည်တော်ရှိ Jade City Hotel တွင် ပြုလုပ်ခဲ့ရာ အသင်းဥက္ကဌဒေါက်တာမောင်မောင်မြင့် တက်ရောက်ခဲ့ပါသည်။

အခမ်းအနားတွင် အသင်းဥက္ကဌ ဒေါက်တာမောင်မောင်မြင့်နှင့် နေပြည်တော်ကြက်ခြေနီကြီးကြပ်မှုကော်မတီဥက္ကဌ ဦးအောင်ချို တို့က အမှာစကားများပြောကြားခဲ့ပါသည်။ ထို့နောက် သင်တန်းဆင်းလက်မှတ်များနှင့် ထူးချွန်ဆုရရှိသူများအား ဆုများကိုပေးအပ် ချီးမြှင့်ခဲ့ကြပါသည်။

အခမ်းအနားသို့ အသင်းဥက္ကဌနှင့်အတူ အဖွဲ့အစည်းဆိုင်ရာဖွံ့ဖြိုးတိုးတက်ရေးဌာန ညွန်ကြားရေးမှူး ဒေါက်တာဒေါ်လင်းလင်းသက်၊ စီမံရေးရာဌာန ဌာနမှူး ဦးမြင့်ထွန်းဟန်နှင့် လက်ထောက်ညွှန်ကြားရေးမှူး ဦးစိုးနိုင်၊ နေပြည်တော်ကြက်ခြေနီကြီးကြပ်မှုကော်မတီဥက္ကဋ္ဌနှင့်အတူ ဒုတိယဥက္ကဋ္ဌ ဒေါ်ဖြူဖြူမြင့်၊ အတွင်းရေးမှူး ဦးစိုးလင်းဦး၊ ဥတ္တရခရိုင်ကြက်ခြေနီကြီးကြပ်မှုကော်မတီ ဥက္ကဋ္ဌ နှင့် အတွင်းရေးမှူး၊ နည်းပြဆရာ/ဆရာမများ၊ သင်တန်းသား/သူများ တက်ရောက်ခဲ့ကြပါသည်။

အဆိုပါသင်တန်းကို လေ့ကျင့်ပေးထားသော လူငယ်နည်းပြဆရာ/ဆရာမ(၅)ဦးက ဆင့်ပွားသင်တန်းအဖြစ် ပုပ္ပသီရိမြို့နယ် ဘောလုံးအားကစားကွင်းတွင် သင်တန်းကာလ(၈)ရက် ကြာပြုလုပ်ခဲ့ခြင်းဖြစ်ပြီး သင်တန်းသား/သူ (၄၄)ဦး တက်ရောက်ခဲ့ပါသည်။

“Uniting Through the Power of YABC and Football in Myanmar” စီမံချက်မှ ဦးဆောင်ပြုလုပ်ခြင်းဖြစ်ပြီး နေပြည်တော်၊ ရန်ကုန်၊ မန္တလေး၊ ကရင်၊ မွန်၊ ရှမ်းပြည်နယ်တို့တွင် စီမံချက်လုပ်ငန်းအနေဖြင့် အကောင်အထည်ဖော် ဆောင်ရွက်လျက် ရှိပါသည်။

နေပြည်တော်၊ နိုဝင်ဘာလ (၁၃) ရက်။

မြန်မာနိုင်ငံကြက်ခြေနီအသင်းဥက္ကဌ ဒေါက်တာမောင်မောင်မြင့်သည် ယနေ့ နိုဝင်ဘာလ (၁၃) ရက်နေ့တွင် ပြည်ထောင်စုနယ်မြေ နေပြည်တော်ရှိ နေပြည်တော်ကြက်ခြေနီကြီးကြပ်မှုကော်မတီရုံး၌ နေပြည်တော်ကြက်ခြေနီကြီးကြပ်မှုဥက္ကဌနှင့် ကော်မတီဝင်များ၊ ခရိုင်ကြက်ခြေနီကြီးကြပ်မှုကော်မတီနှင့် မြို့နယ်ကြက်ခြေနီအသင်းခွဲများမှ တာဝန်ရှိသူများနှင့် တွေ့ဆုံခဲ့ပါသည်။

တွေ့ဆုံပွဲ၌ အသင်းဥက္ကဌက ကြက်ခြေနီ လူမှုကရုဏာလုပ်ငန်းများ ဆောင်ရွက်ရာတွင် ကြက်ခြေနီ အခြေခံမူ(၇)ချက်နဲ့အညီ လုပ်ဆောင်ကြရန်နှင့် လုပ်ဆောင်မှုတိုင်းတွင် တာဝန်ယူမှု၊ တာဝန်ခံမှု ရှိကြစေရန်၊ ပွင့်လင်းမြင်သာစွာ အလုပ်ဖြင့် သက်သေပြနိုင်ရေးအတွက် အားလုံးဝိုင်းဝန်း ကြိုးစားပေးကြဖို့ မှာကြားခဲ့ပါသည်။

ထို့နောက် နေပြည်တော်ကြက်ခြေနီကြီးကြပ်မှုကော်မတီဥက္ကဌနှင့် ခရိုင်ကြက်‌ခြေနီကြီးကြပ်မှုကော်မတီ ဥက္ကဌများက ဆောင်ရွက်လျက်ရှိသည့် လုပ်ငန်းများနှင့်ဆက်လက်လုပ်ဆောင်မည့် လုပ်ငန်းများနှင့်စပ်လျဉ်း၍ တင်ပြခဲ့ကြပါသည်။

အဆိုပါတွေ့ဆုံပွဲသို့ အသင်း ဥက္ကဌနှင့် အတူ နေပြည်တော်ကြက်ခြေနီကြီးကြပ်မှုကော်မတီ ဥက္ကဌ ဦးအောင်ချို၊ အဖွဲ့အစည်းဆိုင်ရာဖွံ့ဖြိုးတိုးတက်ရေးဌာန ညွှန်ကြားရေးမှူး ဒေါက်တာဒေါ်လင်းလင်းသက်၊ စီမံ‌‌ရေးရာဌာန ဌာနမှူး ဦးမြင့်ထွန်းဟန်၊ လက်ထောက်ညွှန်ကြားရေးမှူး ဦးစိုးနိုင်တို့တက်ရောက်ခဲ့ပြီး နေပြည်တော်ကြက်ခြေနီကြီးကြပ်မှုကော်မတီဥက္ကဌနှင့်အတူ ဒုတိယဥက္ကဌ

ဒေါ်ဖြူဖြူမြင့်၊ အတွင်း‌‌ရေးမှူး ဦးစိုးလင်းဦးနှင့် ကော်မတီဝင်များ၊ ခရိုင်ကြက်ခြေနီကြီးကြပ်မှုကော်မတီ ဥက္ကဌနှင့်ကော်မတီဝင်များ၊ မြို့နယ်ကြက်ခြေနီအသင်းခွဲ ဥက္ကဌများနှင့် ကြက်ခြေနီတပ်ဖွဲ့မှူးများ၊ ကြက်ခြေနီစေတနာလုပ်အားရှင်များတက်ရောက်ကြခဲ့ပါသည်။

မြန်မာနိုင်ငံကြက်ခြေနီအသင်းနှင့် ကုလသမဂ္ဂ ကမ္ဘာ့စားနပ်ရိက္ခာအစီအစဉ်တို့ ပူးပေါင်းဆောင်ရွက်သည့် ဆန်ဖြန့်ဝေခြင်းလုပ်ငန်းကို ဒုတိယအကြိမ်အဖြစ် ၂၀၂၁ ခုနှစ်၊ နိုဝင်ဘာလ (၈) ရက်နေ့မှစ၍ ရန်ကုန်တိုင်းဒေသကြီး၊ ဒဂုံမြို့သစ်(ဆိပ်ကမ်း)မြို့နယ်ရှိ ရပ်ကွက် (၃) ခုတွင် ဆက်လက်ဆောင်ရွက်ခဲ့ပါသည်။

ဒဂုံမြို့သစ်(ဆိပ်ကမ်း)မြို့နယ်ရှိ (၇၉)၊ (၉၁)နှင့် (၂) ရပ်ကွက်အတွင်းရှိ ရပ်ရွာလူထုအတွက် အိမ်ထောင်စုတစ်စုလျှင် ဆန် (၂၅) ပြည်နှုန်းဖြင့် အိမ်ထောင်စုပေါင်း (၂၄၅၈) စုအား ဆန်အိတ်ပေါင်း(၂၄၅၈) ကိုဖြန့်ဝေပေးနိုင်ခဲ့ပါသည်။ ဆက်လက်ပြီး မြို့နယ်အတွင်းရှိ ကျန်ရပ်ကွက်များကိုလည်း ဖြန့်ဝေနိုင်ရန် စီစဉ်ဆောင်ရွက်လျက်ရှိပါသည်။

ရန်ကုန်၊ နိုဝင်ဘာလ (၈)ရက်။

မြန်မာနိုင်ငံကြက်ခြေနီအသင်းနှင့် ကုလသမဂ္ဂ ကမ္ဘာ့စားနပ်ရိက္ခာအစီအစဉ်တို့ ပူးပေါင်းဆောင်ရွက်ပြီး ရန်ကုန်တိုင်းဒေသကြီး၊ ရွှေပြည်သာမြို့နယ်ရှိ ရပ်ကွက် (၃) ခုတွင် နေထိုင်သည့် လက်လုပ်လက်စား ပြည်သူများအား ဆန်ဖြန့်ဝေခြင်းကို ပြုလုပ်ခဲ့ပါသည်။

ထိုသို့ဆောင်ရွက်ရာတွင် ၂၀၂၁ ခုနှစ်၊ နိုဝင်ဘာလ(၅) ရက်နေ့က ရွှေပြည်သာမြို့နယ်ရှိ ရပ်ကွက်အမှတ် (၂)၊ (၃) နှင့် (၄) တို့ရှိ အိမ်ထောင်စု(၂,၅၄၄)စုအား အိမ်ထောင်စုတစ်စုလျှင် ၅၀ kg ဆန် (၂၅) ပြည်နှုန်းဖြင့် ဆန်အိတ်ပေါင်း (၂,၅၄၄)အိတ်ကို ဖြန့်ဝေပေးခဲ့ပါသည်။

ဆက်လက်ပြီး မြို့နယ်အတွင်းရှိ ကျန်ရပ်ကွက်များတွင်လည်း ဖြန့်ဝေနိုင်ရန် စီစဉ်ဆောင်ရွက်လျက်ရှိပါသည်။ အဆိုပါ ဆန်ဖြန့်ဝေခြင်းကို ပြီးခဲ့သည့် ဇွန်လနှင့် ဇူလိုင်လအတွင်းကလည်း ဒဂုံမြို့သစ်(ဆိပ်ကမ်း)မြို့နယ်ရှိ ရပ်ကွက်များရှိ ပြည်သူများအား ဆန်ဖြန့်ဝေခြင်းကို ဆောင်ရွက်ခဲ့ပါသည်။

မြန်မာနိုင်ငံ ကြက်ခြေနီအသင်း ဥက္ကဌ ဒေါက်တာ မောင်မောင်မြင့် ဦးဆောင်သော အဖွဲ့သည် ယနေ့ နိုဝင်ဘာလ (၈) ရက်နေ့က မန္တလေးတိုင်းဒေသကြီး ပြည်သူ့ကျန်းမာရေး/ ကုသရေးဦးစီးဌာနရှိ အစည်းအဝေးခန်းမတွင် တိုင်းဒေသကြီး ကြက်ခြေနီကြီးကြပ်မှုကော်မတီဝင်များ၊ တာဝန်ရှိသူများနှင့် တွေ့ဆုံခဲ့ပါသည်။

အဆိုပါတွေ့ဆုံပွဲတွင် အသင်း ဥက္ကဌနှင့် အတူ အချိန်ပြည့်အလုပ်အမှုဆောင် ဒေါက်တာတင်ညွန့်၊ ကြက်ခြေနီဗဟိုကောင်စီဝင် ပါမောက္ခဒေါက်တာမြင့်ဟန်၊ တာဝန်ရှိသူများ တက်ရောက်ခဲ့ကြပြီး မန္တလေးတိုင်းဒေသကြီးမှ တိုင်းဒေသကြီးကြက်ခြေနီကြီးကြပ်မှုကော်မတီ ဥက္ကဌ ဒေါက်တာသိန်းထွန်းဆောင်နှင့် ကော်မတီဝင်များ၊ ခရိုင်ကြက်ခြေနီကြီးကြပ်မှုကော်မတီဝင်များ၊ မြို့နယ် ကြက်ခြေနီအသင်းခွဲ ဥက္ကဌများနှင့် ကြက်ခြေနီတပ်ဖွဲ့မှူးများ၊ ကြက်ခြေနီစေတနာလုပ်အားရှင်များတက်ရောက်ခဲ့ပါသည်။

ယင်းသို့ တွေ့ဆုံရာတွင် အသင်းဥက္ကဌက လူမှုကရုဏာစောင့်ရှောက်မှုလုပ်ငန်းများဆောင်ရွက်ရာတွင် အသင်း၏ အခြေခံမူ (၇)ချက်နှင့်အညီ စည်းလုံးညီညွတ်စွာဖြင့်တာဝန်ယူမှုတာဝန်ခံမှုရှိစေရန်၊ ပွင့်လင်း မြင်သာစွာဖြင့် အလုပ်ဖြင့်သက်သေပြနိုင်ရေးအတွက် ဝိုင်းဝန်းကြိုးပမ်းဆောင်ရွက်ကြရန်မှာကြားခဲ့ပါသည်။

ထို့နောက် တိုင်းဒေသကြီး ကြက်ခြေနီကြီးကြပ်မှုကော်မတီဥက္ကဌက တိုင်းဒေသကြီးအတွင်းဆောင်ရွက်လျက်ရှိသည့် လူမှုကရုဏာလုပ်ငန်းများနှင့် ဆက်လက်ဆောင်ရွက်မည့် လုပ်ငန်းများကို အသေးစိတ်တင်ပြဆွေးနွေးရာ အသင်းဥက္ကဌက လိုအပ်သည်များကို ဖြည့်ဆည်းမှာကြားခဲ့ပါသည်။

ဆက်လက်၍ အသင်းဥက္ကဌနှင့် အဖွဲ့ဝင်များက မန္တလေးတိုင်း ဒေသကြီးအတွင်းရှိ ခရိုင်/မြို့နယ်များအတွက် လူမှုကရုဏာ စောင့်ရှောက်မှုလုပ်ငန်းများတွင် အသုံးပြုရန် အတွက် လိုအပ်သည့် ထောက်ပံ့ရေးပစ္စည်းများကို ပေးအပ်ခဲ့ရာ ကိုဗစ်-၁၉ ရောဂါကာကွယ်ထိန်းချုပ်ရေးအတွက် Oxygen Concentrator များအား မန္တလေးတိုင်းကြက်ခြေနီ ကြီးကြပ်မှုကော်မတီ ဥက္ကဌမှ လည်းကောင်း၊ လူနာတင်ယာဉ်များအတွက် ပစ္စည်းများအား ပျော်ဘွယ်မြို့နယ်ကြက်ခြေနီအသင်းခွဲ ဥက္ကဌ နှင့် ကြက်ခြေနီတပ်ဖွဲ့မှူးတို့မှလည်းကောင်း ၊ ရှေးဦးပြုစုခြင်းစခန်း ဆောင်ရွက်ခဲ့သည့်မြို့နယ်များအတွက် ယာယီတဲများကို ကျောက်ဆည်ခရိုင် ဥက္ကဌ နှင့် ဒုတိယခရိုင်ကြက်ခြေနီတပ်ဖွဲ့မှူး တို့မှ လည်းကောင်း၊ ကြက်ခြေနီစေတနာလုပ်အားရှင်များအတွက် တီရှပ်များကို ချမ်းမြသာစည်မြို့နယ်ကြက်ခြေနီတပ်ဖွဲ့မှူး ဦးမြင့်သိန်း မှ လည်းကောင်း အသီးသီး လက်ခံရယူခဲ့ကြပြီး အခမ်းအနားကို နေ့လည် ၁၂:၃၀ တွင် အောင်မြင်စွာ ကျင်းပပြီးမြောက်ခဲ့ပါသည်။