တနင်္သာရီတိုင်းဒေသကြီးတွင် ကြက်ခြေနီစေတနာလုပ်အားရှင်များက လူမှုကရုဏာအကူအညီများအား ဆောင်ရွက်ပေးလျက်ရှိကြရာ ၂၄နာရီ လူနာတင်ယာဉ်ဖြင့် လူနာများအား ဆေးရုံဆေးခန်းများသို့ အချိန်မီဆေးကုသမှုခံယူနိုင်ရန် ပို့ဆောင်ကူညီပေးခြင်းကိုလည်း နေ့စဉ် ကူညီဆောင်ရွက်ပေးလျက်ရှိကြပါသည်။

၂၀၂၂ခုနှစ်၊ ဇန်နဝါရီလ (၂၀)ရက်နေ့က တနင်္သာရီတိုင်းဒေသကြီး၊ သရက်ချောင်းမြို့နယ်၊ ကနက်သီရိ ကျေးရွာမှ ယာဉ်မတော်တဆမှုကြောင့် ထိခိုက်ဒဏ်ရာရရှိသူ (၂)ဦးအား ရှေးဦးပြုစုပေးပြီး ရငဲတိုက်နယ်ဆေးရုံ၊ ထို့မှတဆင့် သရက်ချောင်းမြို့နယ် ပြည်သူ့ဆေးရုံသို့လည်းကောင်း၊ ရေဖြူမြို့နယ်၊ ဇီးကျကျေးရွာမှ ကိုယ်ဝန်ဆောင်မိခင် အမျိုးသမီး(၁)ဦးအား နေအိမ်မှ မယ်ဒီလန်းဆေးရုံသို့လည်းကောင်း၊ ဇန်နဝါရီလ (၁၉)ရက်နေ့က သရက်ချောင်းမြို့နယ်၊ မယ်ဒီလန်းဆေးရုံမှ ဆေးကုသခြင်းခံယူပြီးသည့်လူနာအား ကျွဲမင်းကုန်းကျေးရွာ နေအိမ် သို့လည်းကောင်း၊ ဇန်နဝါရီလ (၁၈)ရက်နေ့က ထားဝယ်မြို့ ဆန်းချီရပ်ကွက်နေ ကိုယ်ဝန်ဆောင်အမျိုးသမီး တစ်ဦးအား နေအိမ်မှ ထားဝယ်မြို့ဆေးရုံသို့လည်းကောင်း၊ ထားဝယ်ပြည်သူ့ဆေးရုံကြီးတွင် ဆေးကုသမှုခံယူပြီးသော အမျိုးသားတစ်ဦးအား နေအိမ်သို့လည်းကောင်း၊ ကြက်စားပြင်ရပ်ကွက်တွင် မတော်တဆမှုကြောင့် ဒဏ်ရာရရှိခဲ့သော အမျိုးသားတစ်ဦးအား ထားဝယ်ဆေးရုံကြီး သို့လည်းကောင်း၊ အနောက်မြို့တွင်းရပ်ကွက်မှ ချောင်းဆိုးရင်ကြပ် ဝေဒနာခံစားနေရသော အမျိုးသားတစ်ဦးအား နေအိမ်မှ မယ်ဒီလန်းဆေးရုံသို့ လည်းကောင်း၊ ဇန်နဝါရီလ (၁၁)ရက်နေ့က ကျွဲမင်းကုန်းကျေးရွာမှ ဗိုက်အောင့်ဝေဒနာ ခံစားနေရသော ဝေဒနာရှင်တစ်ဦးအား ရငဲတိုက်နယ်ဆေးရုံသို့လည်းကောင်း၊ ရငဲတိုက်နယ်ဆေးရုံမှ ဆေးကုသမှုခံယူနေသော လူနာတစ်ဦးအား လွှဲပြောင်းလူနာအဖြစ် ထားဝယ်မြို့ မြင့်မိုရ်ဦး ဆေးရုံသို့လည်းကောင်း အသီးသီးပို့ဆောင်ကူညီပေးခဲ့ကြပါတယ်။

ကြက်ခြေနီစေတနာလုပ်အားရှင်များသည် ထိုကဲ့သို့ လူမှုကရုဏာလုပ်ငန်းများဆောင်ရွက်ရာတွင် မြို့နယ်ကြက်ခြေနီအသင်းခွဲများအလိုက် ဆောင်ရွက်ကြခြင်းဖြစ်ကြီး ရပ်ရွာလူထုအတွက် လိုအပ်သည့် အခြားသော လူမှုကရုဏာလုပ်ငန်းများကိုလည်း အင်တိုက်အားတိုက် ဆက်လက်ဆောင်ရွက်လျက်ရှိကြပါသည်။

မြန်မာနိုင်ငံကြက်ခြေနီအသင်းနှင့် ဆွီဒင်နိုင်ငံကြက်ခြေနီအသင်းတို့ပူးပေါင်းပြီး ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)မြို့နယ်ရှိ နွမ်းပါးပြီး မသန်စွမ်းရှိသည့် အိမ်ထောင်စုများကို ဆန်များ ဖြန့်ဝေလှူဒါန်းခြင်းကို ၂၀၂၂ခုနှစ်၊ ဇန်နဝါရီလ(၂၁)ရက်နေ့က ပြုလုပ်ခဲ့ပါ

သည်။

ထိုသို့ဖြန့်ဝေလှူဒါန်းရာတွင် အဆိုပါမြို့နယ်အတွင်းရှိ နွမ်းပါးပြီး မသန်စွမ်းရှိသည့် အိမ်ထောင်စု (၃၂၁) စုအား အိမ်ထောင်စု(၁)စုလျှင် ၂၅ပြည် ဆန်(၁)အိတ်စီ ဖြန့်ဝေလှူဒါန်းခဲ့ပါသည်။

တနင်္သာရီတိုင်းဒေသကြီး၊ မြိတ်မြို့နယ်ကြက်ခြေနီအသင်း(ခွဲ)သည် ရပ်ရွာလူထုအတွက် COVID-19 ရောဂါကာကွယ်ရေးအသိပညာပေးလုပ်ငန်းများကို စဉ်ဆက်မပြတ် ကူညီဆောင်ရွက်လျက်ရှိသည့်အပြင် ကျန်းမာရေးစောင့်ရှောက်မှုလုပ်ငန်းများတွင်လည်း ပူးပေါင်းဆောင်ရွက်ပေးနေပါသည်။

၂၀၂၂ ခုနှစ်၊ ဇန်နဝါရီလ (၁၆) ရက်နေ့ကလည်း မြိတ်မြို့ အခမဲ့ဖျားနာဆေးကုခန်း (Fever Clinic)တွင် တာဝန်ရှိ ဆရာဝန်များ၊ ပရဟိတအဖွဲ့များနှင့် ပူးပေါင်းကာ ကျေးရွာများမှ ပြင်ပလူနာ (၉၈)ဦးအား COVID-19 စည်းကမ်းချက်များနှင့်အညီ အခမဲ့ကြည့်ရှုကုသပေးခဲ့ပါသည်။

ကြက်ခြေနီစေတနာလုပ်အားရှင်တွေဟာ ရပ်ရွာလူထုခံစားရတဲ့ ဘေးဒုက္ခတွေကို လျော့ပါးစေဖို့ ဆောင်ရွက်ကြရတဲ့အခါ တချိန်တည်းမှာပဲ ထိရောက်တဲ့ အကူအညီအထောက်အပံ့တွေဖြစ်ဖို့ ကြိုးပမ်းအားထုတ်ကြရပါတယ်။

ကယားပြည်နယ်က ကြက်ခြေနီစေတနာလုပ်အားရှင်တွေကတော့ ဇန်နဝါရီလဆန်းပိုင်းကတည်းက ကျေးရွာတွေမှာ ရွှေ့ပြောင်းဖို့လိုအပ်နေသူပြည်သူတွေကို တိုက်ပွဲရှောင်စခန်းတွေဆီ လုံခြုံစွာရောက်ရှိနိုင်ဖို့ စတင်ဆောင်ရွက်ခဲ့ကြပါတယ်။

ဇန်နဝါရီလအတွင်းမှာ ကယားပြည်နယ် ဘုရားဖြူ၊ ဒီမော့ဆို၊ ဒေါနိုးကူး၊ မင်းစု၊ ရေယို၊ နမ့်ကွတ်၊ ဒေါတမ၊ ဧက(၅၀၀)၊ နာနတ်တော၊ ရတနာမြေ တို့မှ တိုက်ပွဲရှောင်သူ (၁၀၆)ဦးကို ရှမ်းကယားနယ်စပ် ထီးစဲခါးဂိတ်သို့လည်းကောင်း၊ နမ့်ဘော်ဝမ်ရပ်ကွက်နှင့် ဒေါတမရပ်ကွက်တို့မှ တိုက်ပွဲရှောင်သူ (၁၈)ဦးအား မိုးဗြဲသို့လည်းကောင်း၊ စက်မှုဇုံ၊ ကျောက်တောင်၊ သတ္တပလူ၊ ဒေါဆော်ဘီး၊ မင်းစု တို့မှ တိုက်ပွဲရှောင်(၇၄)ဦးအား ရှမ်းကယားနယ်စပ် ထီးစဲခါးဂိတ်သို့လည်းကောင်း၊ ဟော်ကြီးကျောင်းနှင့် မင်းစု မှ တိုက်ပွဲရှောင်(၅၆)ဦးအား ရှမ်းကယားနယ်စပ် ထီးစဲခါးဂိတ်သို့လည်းကောင်း၊ ရွှေကျောင်းဘုန်းတော်ကြီးကျောင်း မှ ဆရာတော်သံဃာတော်များ နှင့် တိုက်ပွဲရှောင် မိဘပြည်သူများအား ဖယ်ခုံမြို့သို့လည်းကောင်း၊ ဆေးရုံကြီးမှ တိုက်ပွဲရှောင်ပြည်သူ (၁၉)ဦးတို့အား လွိုင်လင်နှင့်ဆင်ဖြူသို့လည်းကောင်း၊ သင်္ဂဟမှ ထီးစဲခါးသို့လည်းကောင်း၊ ထပ်မံ၍ တိုက်ပွဲရှောင်ပြည်သူ (၁၉)ဦးအား သီတဂူကျောင်း မှ မြို့ပြင်ဂိတ်သို့လည်းကောင်း၊ ထို့နောက် ဆေးရုံကြီးနှင့် မင်းစုမှ တိုက်ပွဲရှောင်ပြည်သူ (၁၈)ဦးအား လေဆိပ်သို့လည်းကောင်း၊ လောဓမနှင့် ဒေါမူကလားမှ တိုက်ပွဲရှောင်များအား ထီးစဲခါးဂိတ်သို့လည်းကောင်း၊ မိုင်းလုံးရပ်ကွက်၊ ရွာတန်းရှည်၊ထူဒူငံသ၊စိုက်ကွင်း(၃)၊ ပန်ကန်းနှင့် ဒေါဆန်းဘွန်းကျေးရွာများမှ ပြည်သူ (၅၅)ဦးအား ဘေးလွတ်ရာသို့လည်းကောင်း၊ ထပ်မံ၍ မိုင်းလုံးရပ်ကွက်၊ ရွာတန်းရှည်၊ထူဒူငံသ၊စိုက်ကွင်း(၃)၊ ပန်ကန်းနှင့် ဒေါဆန်းဘွန်းကျေးရွာများရှိ ပြည်သူ (၆၆)ဦးအား ဘေးလွတ်ရာသို့လည်းကောင်း၊ ရွှေလွိုင်ကော်(ကယား) ပရဟိတ အသင်းဖြင့်ပူးပေါင်း၍ ‌မိုင်းလုံးရပ်ကွက်မှ ပန်ကန်းကျေးရွာထိ ပြည်သူအချို့အား ဘေးလွတ်ရာသို့လည်းကောင်း၊ ထို့ပြင် ကျေးရွာအသီးသီးမှ ဘေးလွတ်ရာသို့ရွှေ့ပြောင်းရန်လိုအပ်နေသည့် တိုက်ပွဲရှောင်ပြည်သူများ ဘေးလွတ်ရာနှင့် တိုက်ပွဲရှောင်စခန်းများသို့လည်းကောင်း အသီးသီးပို့ဆောင်ကူညီပေးခဲ့ကြပါတယ်။

အဲ့ဒီအပြင် တိုက်ပွဲရှောင်ပြည်သူတွေအတွက် လိုအပ်တဲ့အစားအသောက်၊ ဆေးဝါး၊ နေရာထိုင်ခင်းနဲ့ ကျန်းမာရေးစောင့်ရှောက်မှုတွေ စိတ်ပိုင်းလူမှုပိုင်းဆိုင်ရာအားပေးကူညီမှုတွေကိုလည်း သက်ဆိုင်ရာ တိုင်း၊ ပြည်နယ် ကြက်ခြေနီကြီးကြပ်မှုကော်မတီတွေနဲ့ ချိတ်ဆက်ကာ ဆက်လက်ပံ့ပိုးကူညီပေးနေကြပါတယ်။

မြန်မာနိုင်ငံကြက်ခြေနီအသင်း၏ စွမ်းဆောင်ရည်အကဲဖြတ်ဆန်းစစ်ခြင်းနှင့် အသိအမှတ်ပြုခြင်း (Organizational Capacity Assessment & Certification) external assessment ဆွေးနွေးပွဲကို ၂၀၂၂ခုနှစ်၊ ဇန်နဝါရီလ(၁၈)ရက်နေ့ နံနကိပိုင်းက နေပြည်တော်ရှိ မြန်မာနိုင်ငံကြက်ခြေနီအသင်းဌာနချုပ်၌ ပြုလုပ်ခဲ့ရာအသင်းဥက္ကဌ ဒေါက်တာမောင်မောင်မြင့် online မှတက်ရောက်ခဲ့ပါသည်။

ဆွေးနွေးပွဲဖွင့်ပွဲတွင် အသင်း ဥက္ကဌ၊ ဒေါက်တာ မောင်မောင်မြင့်က အမှာစကားပြောကြားခဲ့ပြီးအပြည်ပြည်ဆိုင်ရာကြက်ခြေနီနှင့် လခြမ်းနီအသင်းများ ဖက်ဒရေးရှင်း IFRC Myanmar Country Office မှ Head of Delegation Ms. Nadia KHOURY ကနှုတ်ခွန်းဆက်စကား ပြောကြားခဲ့ပါသည်။

အဆိုပါအခမ်းအနားသို့ အသင်းဒုတိယဥက္ကဌ ဒေါက်တာဒေါ်အမယာမော်နိုင် ၊ အချိန်ပြည့်၊ အချိန်ပိုင်းအမှုဆောင်အဖွဲ့ဝင်များ၊ အထွေထွေအတွင်းရေးမှူး၊ ဒုတိယအထွေထွေအတွင်းရေးမှူးများ၊ တိုင်းဒေသကြီး၊ ပြည်နယ်ကြက်ခြေနီ ကြီးကြပ်မှုကော်မတီမှ တာဝန်ရှိသူများ နှင့် လူငယ်ကြက်ခြေနီခေါင်းဆောင်များ၊ မိတ်ဖက်ကြက်ခြေနီနှင့် လခြမ်းနီအသင်းများမှ တာဝန်ရှိသူများ တက်ရောက်ခဲ့ကြပြီး ဆွေးနွေးပွဲကို ဇန်နဝါရီလ(၁၈)ရက်နေ့မှ(၂၁)ရက်နေ့အထိ (၄)ရက်တာပြုလုပ်သွားမည်ဖြစ်ပါသည်။

အသင်း၏ စွမ်းဆောင်ရည်အကဲဖြတ်ဆန်းစစ်ခြင်းနှင့် အသိအမှတ်ပြုခြင်း (OCAC) ၏ အကဲဖြတ် ဆန်းစစ်ခြင်း လုပ်ငန်းစဉ်သည် အသင်းတခုလုံးနှင့် သက်ဆိုင်ပြီးကျယ်ပြန့်သော စွမ်းဆောင်ရည်များနှင့် ဆက်စပ်နေသည့် အမျိုးသား အသင်းတစ်သင်း၏ အားသာချက်၊ အားနည်းချက်များအား အမိအရ ဆုပ်ကိုင်နိုင်ရန် ရည်ရွယ်ကာ ဆွေးနွေးပွဲကိုပြုလုပ်ခြင်းဖြစ်ပါသည်။