ဆင်ဖြူကျွန်း၊ ၂၀၂၃ခုနှစ်၊ ဒီဇင်ဘာလ(၂၇)ရက်။ မြန်မာနိုင်ငံကြက်ခြေနီအသင်း၊ စီမံချက်လုပ်ငန်းများ စီမံခန့်ခွဲမှုယူနစ်သည် အပြည်ပြည်ဆိုင်ရာကြက်ခြေနီနှင့်လခြမ်းနီအသင်းများဖက်ဒရေးရှင်း၊ဂျာမနီနိုင်ငံကြက်ခြေနီအသင်းနှင့်ဒိန်းမတ်နိုင်ငံကြက်ခြေနီအသင်းတို့၏ ပံပိုးကူညီမှုဖြင့် ကန်သတ်ချက်မဲ့ ငွေသားထောက်ပံ့ခြင်းအစီအစဥ်အရ မကွေးတိုင်းဒေသကြီးအတွင်းဖြစ်ပွားခဲ့သော ရေကြီးရေလျှံမှုများကြောင့် ထိခိုက်ခံစားခဲ့ရသည့် ရပ်ရွာလူထုအား ငွေသားထောက်ပံ့ခြင်းအစီအစဉ်ကို ၂၀၂၃ခုနှစ်၊ ဒီဇင်ဘာလ(၂၂)ရက်နေ့မှ (၂၃) ရက်နေ့အတွင်း စလင်းမြို့နယ်၊ ဆင်ဖြူကျွန်းမြို့တွင်ပြုလုပ်ခဲ့ပါသည်။ ထိုသို့ဆောင်ရွက်ရာတွင်မကွေးတိုင်းဒေသကြီးကြက်ခြေနီကြီးကြပ်မှုကော်မတီဥက္ကဌပါမောက္ခဒေါက်တာဒေါ်ချောခင်နှင့်စီမံချက်လုပ်ငန်းများ စီမံခန့်ခွဲမှုယူနစ်ညွှန်ကြားရေးမှူး ဒေါ်အေးအေးငြိမ်းတို့ ဦးဆောင်မှုဖြင့် ဒေသခံကြက်ခြေနီစေတနာလုပ်အားရှင်များနှင့် စီမံချက်လုပ်ငန်းများ စီမံခန့်ခွဲမှုယူနစ်မှ ဝန်ထမ်းများက ကူညီဆောင်ရွက်ခဲ့ကြပြီး ဆင်ဖြူကျွန်းမြို့အတွင်းရှိ ပြည်တော်သာကျေးရွာမှ အိမ်ထောင်စုပေါင်း (၁၂၆)စု၊ မြောက်ရှားတောကျေးရွာမှ အိမ်ထောင်စုပေါင်း(၁၂၅)စုနှင့် မြို့ပေါ်ရပ်ကွက်များဖြစ်သည့် အမှတ်(၁)ရပ်ကွက်မှ အိမ်ထောင်စုပေါင်း(၁၀၁)စု၊ အမှတ်(၂)ရပ်ကွက်မှ အိမ်ထောင်စုပေါင်း(၇၇)စု၊ အမှတ်(၃)ရပ်ကွက်မှ အိမ်ထောင်စုပေါင်း(၁၆၈)စုဖြင့် စုစုပေါင်းအိမ်ထောင်စု(၅၉၇)စုအတွက် အိမ်ထောင်စု(၁)စုလျှင် ငွေသားကျပ် (၂)သိန်းစီဖြင့် စုစုပေါင်းငွေသား (၆၉,၂၀၀,၀၀၀)ကျပ်ကို ထောက်ပံ့ကူညီခဲ့ပါ သည်။ အသင်းအနေဖြင့် ဆင်ဖြူကျွန်းမြို့နှင့်ကျေးရွာများအတွင်း ရေကြီးရေလျှံမှုများကြောင့် ထိခိုက်ခံစားခဲ့ရသည့် အိမ်ထောင်စုများ ကန်သတ်ချက်မဲ့ငွေသားထောက်ပံ့ခြင်းအစီအစဉ်ကို ဆောင်ရွက်ခဲ့ရာနိုဝင်ဘာလ(၂၂)ရက်မှဒီဇင်ဘာလ(၂၃)ရက်နေ့အတွင်း အိမ်ထောင်စုပေါင်း(၁,၉၇၀)စုအတွက်စုစုပေါင်းငွေသား(၃၉၄,၀၀၀,၀၀၀)ကျပ်ကို ထောက်ပံ့ပေးအပ်ခဲ့ပြီးဖြစ်ပါသည်။

မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာမျိုးညွန့်သည် ဗီယက်နမ်နိုင်ငံ ဟနွိုင်းမြို့တွင် ၂၀၂၃ ခုနှစ်၊ နိုဝင်ဘာလ(၂၀)ရက်နေ့မှ နိုဝင်ဘာလ(၂၃)ရက်နေ့အထိ ကျင်းပခဲ့သော Asia Pacific Youth Forum နှင့် 11^th Asia Pacific Regional Conference များသို့ တက်ရောက်ခဲ့ပါသည်။ အဆိုပါ ညီလာခံသို့ အသင်းဥက္ကဌနှင့်အတူ စီမံခန်ခွဲရေးဌာန ညွှန်ကြားရေးမှူး ဦးမြင့်ထွန်းဟန်နှင့် လူငယ်ကိုယ်စားလှယ် ဦးဇော်ဇော်မြင့် တို့ အဖွဲ့ဝင်အဖြစ် ပါဝင် တက်ရောက်ခဲ့ပြီး Asia Pacific Youth Forum တွင် Asia Pacific Youth Network activitiesများကို လေ့လာခွင့်ရရှိခဲ့ပြီး Youth Engagement Strategy 2.0 တွင်  မြန်မာနိုင်ငံကြက်ခြေနီအသင်း ကိုယ်စားပြုပြီး အကြံပြုချက်များ ပေးခဲ့ပါသည်။ 11^th Asia Pacific Regional Conference ၏ Becoming Trusted Organization Breakout Session တွင် မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာမျိုးညွန့်က သဘာပတိအဖြစ် ဆောင်ရွက်ခဲ့ပြီး Hanoi Call For Action အတွက် သဘောတူ ဆုံးဖြတ်ချက်တစ်ရပ် ထုတ်ပြန်နိုင်ရေးအတွက် အသင်းအနေဖြင့် ပါဝင်ဆောင်ရွက်နိုင်ခဲ့ပြီး  Hanoi Call For Action ကို ဆွေးနွေးအတည်ပြုနိုင်ခဲ့ပါသည်။ Movement Coordination Breakout Session တွင် လူငယ်ကိုယ်စားလှယ် ဦးဇော်ဇော်မြင့်က တွဲဘက်သဘာပတိအဖြစ်ဆောင်ရွက်ခဲ့ပြီး ကြက်ခြေနီလှုပ်ရှားမှုများ ဆောင်ရွက်ရာတွင် ICRC ၊ IFRC နှင့် အမျိုးသားကြက်ခြေနီအသင်းများ အကြား ပူးပေါင်းဆောင်ရွက်မှု၏ အရေးပါမှုကို ဆွေးနွေးခဲ့ပါသည်။ 11^th Asia Pacific Regional Conference တွင် အာရှပစိဖိတ်ဒေသအတွင်းရှိ ကြက်ခြေနီနှင့် လခြမ်းနီအသင်း ခေါင်းဆောင်များသည် အကောင်အထည်ဖော်ဆောင်ရွက်မည့် ကတိကဝတ်(၈)ချက်ကိုသဘောတူညီခဲ့ကြပါသည်။

မြန်မာနိုင်ငံကြက်ခြေနီအသင်းသည် မြန်မာနိုင်ငံဒေသအနှံ့တွင် လူမှုကရုဏာလုပ်ငန်းများကို အချိန်နှင့် တပြေးညီ ကူညီထောက်ပံ့နေသော အဖွဲ့အစည်းတစ်ခုဖြစ်ပြီး ဘေးဒဏ်အမျိုးမျိုးကြောင့် ထိခိုက်ခံစား ရသောရပ်ရွာလူထုများ၏ ပြန်လည်ထူထောင်ရေးလုပ်ငန်းများတွင် ကယ်ဆယ်ရေးပစ္စည်းများ ပိုမိုထိရောက်စွာပံ့ပိုးပေးခြင်းဖြင့် လူသားချင်းစာနာ ထောက်ထားမှုအထောက်အပံ့များ ပိုမိုကောင်းမွန်လာစေရန် ဆောင်ရွက်ပေးလျှက်ရှိပါသည်။ မြန်မာနိုင်ငံကြက်ခြေနီအသင်းအနေဖြင့် နိုင်ငံအတွင်းဆောက်လုပ်ရေးလုပ်ငန်းခွင်များတွင် အတွေ့အကြုံရှိသည့် ကန်ထရိုက်တာများအား မကွေးတိုင်းကြက်ခြေနီသိုလှောင်ရုံ ဆောက်လုပ်ရေးလုပ်ငန်းများအတွက် “စိတ်ဝင်စားမှု ဖော်ပြခြင်းအဆိုပြုလွှာ” (EOI) မေးခွန်းလွှာ ရယူရန် ဆက်သွယ်နိုင်ကြောင်း အသိပေး အကြောင်းကြားအပ်ပါသည်။ (EOI) ကြိုတင်ဆန်းစစ်ခြင်းမေးခွန်းများတောင်းခံလွှာကို မြန်မာနိုင်ငံကြက်ခြေနီအသင်း၊ ထောက်ပံ့ပို့ဆောင်ရေးနှင့် ၀ယ်ယူဖြည့်တင်းရေးဆိုင်ရာစီမံခန့်ခွဲမှုဌာန၊ အမှတ်-၄၂၊ ကမ်းနားလမ်း၊ ဗိုလ်တစ်ထောင်မြို့နယ်၊ ရန်ကုန်မြို့၊ ဖုန်းနံပါတ်- ၀၉ ၈၉၅၃၈၅၇၇၀၊ ၀၉ ၄၂၀၀၉၇၄၀၉ နှင့် မကွေးတိုင်းဒေသကြီးကြက်ခြေနီကြီးကြပ်မှုကော်မတီရုံး၊ ပြည်တော်သာလမ်း၊ မကွေးမြို့နယ်၊ မကွေးတိုင်းဒေသကြီး၊ ဖုန်းနံပါတ်- ၀၉ ၄၀၁၅၇၂၁၅၆ သို့ ၂၀၂၃ ခုနှစ်၊ နိုဝင်ဘာလ၊ (၆)ရက်နေ့ မြန်မာ စံတော်ချိန်နံနက် (၉:၃၀) နာရီမှစတင်ထုတ်ယူနိုင်ပြီး၊ ကြိုတင်ဆန်းစစ်ခြင်း မေးခွန်းလွှာဖြေဆိုမှုများနှင့် အထောက်အထား စာရွက်စာတမ်းများကို ၂၀၂၃ ခုနှစ်၊ နိုဝင်ဘာလ၊ (၂၀)ရက်နေ့၊ မြန်မာစံတော်ချိန်နေ့လည် (၁၂:၀၀)နာရီ နောက်ဆုံးထား၍ အထက်ဖော်ပြပါလိပ်စာများသို့ တံဆိပ်ခတ်ထားသည့် စာအိတ်ဖြင့် ပေးပို့ရမည်ဖြစ်ပါသည်။

နော်ဝေနိုင်ငံ အော်စလိုမြို့တွင် အောက်တိုဘာလ(၅)ရက်နေ့မှ အောက်တိုဘာလ(၈)ရက်နေ့အထိ ကျင်းပခဲ့သော Norwegian Red Cross’ 42. General Assembly သို့ မြန်မာနိုင်ငံကြက်ခြေနီအသင်းဥက္ကဌပါမောက္ခဒေါက်တာမျိုးညွန့်တက်ရောက်ခဲ့ပါသည်။ ညီလာခံအကြိုနေ့ အောက်တိုဘာလ(၄)ရက်နေ့တွင် အသင်းဥက္ကဌသည် မြန်မာနိုင်ငံကြက်ခြေနီအသင်းကိုယ်စား နိုင်ငံတကာနှင့်ချိတ်ဆက်နိုင်ရေးအတွက် နိုင်ငံတကာမှ ကိုယ်စားလှယ်များနှင့် တွေ့ဆုံကာအသင်း၏ ဆောင်ရွက်ချက်များကို ဝေမျှခဲ့ပြီး နော်ဝေနိုင်ငံကြက်ခြေနီအသင်းမှ တာဝန်ရှိသူများနှင့် တွေ့ဆုံခဲ့ပါသည်။ ထို့အတူ International Programs and Preparedness Director ဖြစ်သူ Mr. Jorgen Haldorsen နှင့် တွေ့ဆုံခဲ့ပြီး မြန်မာနိုင်ငံကြက်ခြေနီအသင်းနှင့် ဆက်လက်ပူးပေါင်းဆောင်ရွက်မည့် အစီအစဉ်များကိုဆွေးနွေးခဲ့ပါသည်။ ညီလာခံအတွင်း ကမ္ဘာလုံးဆိုင်ရာကြက်ခြေနီလှုပ်ရှားမှုများကို ဆွေးနွေးခြင်း၊ လုပ်ငန်းစဉ်များကို တင်ပြခြင်း၊ ပူးပေါင်းဆောင်ရွက်မှုဆိုင်ရာ ဆွေးနွေးခြင်းတို့ကို ပြုလုပ်ခဲ့ပြီး အရေးပေါ်တုန့်ပြန်ရေး သိုလှောင်ရုံကိုလေ့လာခဲ့ပါသည်။ ထို့အပြင် Ministry of Foreign Affair (MFA) NorCross Humanitarian ဌာနခွဲ ကိုယ်စားလှယ်များနှင့် အစည်းအဝေး၏ Panel Discussion တွင် မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာမျိုးညွန့်၊ Ethiopia Red Cross Society ဥက္ကဌ နှင့် Sudanese Red Cresent Society  အထွေထွေအတွင်း ရေးမှူးတို့က ပါဝင်ဆွေးနွေးခဲ့ရာတွင် အသင်းဥက္ကဌက မြန်မာနိုင်ငံတွင်လူသားချင်းစာနာထောက်ထားမှုဆိုင်ရာလိုအပ်ချက်များ၊ MFA အထောက်အပံ့အသုံးပြုမှုနှင့် လူသားချင်းစာနာထောက်ထားမှုဆိုင်ရာ တုန့်ပြန်ဆောင်ရွက်မှုများ ပိုမိုအားကောင်းလာစေရန် အရေးကြီးသောအချက်များကို အဓိကထား ဆွေးနွေးခဲ့ပါသည်။ အစည်းအဝေးကာလများအတွင်း အသင်းဥက္ကဌသည် နိုင်ငံတကာမှ ကိုယ်စားလှယ်များနှင့်အတူ ကြက်ခြေနီလှုပ်ရှားမှုများ ဆွေးနွေးရာတွင် တက်ကြွစွာ ပါဝင်ခဲ့ပြီး လူသားချင်းစာနာထောက်ထားမှုဆိုင်ရာ ဆက်စပ် အကြောင်းအရာများ ပူးပေါင်းဆောင်ရွက်မှုနှင့် သတင်းအချက်အလက်ဖလှယ်ခြင်းတို့ကို ဆောင်ရွက်ခဲ့ပါသည်။

ကမ္ဘောဒီးယားနိုင်ငံ ဖနွမ်းပင်မြို့တွင် ၂၀၂၃ ခုနှစ်၊ စက်တင်ဘာလ(၁၇)ရက်နေ့မှ စက်တင်ဘာလ(၂၂)ရက်နေ့အထိ ကျင်းပခဲ့သော 20thSouth – East Asia Leader Meeting နှင့် 2nd Southeast Asia RCRC Youth Forum အစည်းအဝေးများသို့ မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာ မျိုးညွန့် တက်ရောက်ခဲ့ပါသည်။ အစည်းအဝေးတွင် အသင်းဥက္ကဌက မြန်မာနိုင်ငံကြက်ခြေနီအသင်းမှ ဆောင်ရွက်နေသော လူမှုကရုဏာလုပ်ငန်းဆောင်ရွက်ချက်များကို အရှေ့တောင်အာရှ ကြက်ခြေနီလခြမ်းနီ အမျိုးသားအသင်းများအား ရှင်းလင်းတင်ပြခဲ့ပြီး အဆိုပါအစည်းအဝေးမှ လူငယ်ကြက်ခြေနီများ၏ လူငယ်နှီးနှောဖလှယ်ပွဲ ရလဒ် များ၊ ဆွေးနွေးချက်များကို အားပေးဆွေးနွေးနိုင်ခဲ့ခြင်း၊ ယဉ်ကျေးမှုမတူညီသည့် နိုင်ငံများအချင်းချင်း လိုက်လျောညီစွာ နေထိုင်နိုင်ခြင်းအတွက် လက်တွေ့လုပ်ဆောင်နိုင်ခြင်း၊ အမျိုးသားအသင်းခေါင်းဆောင်များမှ လူငယ်ကြက်ခြေနီလှုပ်ရှားမှု များကို တတ်စွမ်းသမျှ ကူညီထောက်ပံ့ပေးမည့် ကတိကဝတ် ရရှိခဲ့ခြင်းစသည့်အကျိုးကျေးဇူးများကိုရရှိခဲ့ပါသည်။ အဆိုပါအစည်းအဝေးများသို့ အသင်းဥက္ကဌ နှင့်အတူ ဒုတိယအထွေထွေအတွင်းရေးမှူး ဒေါက်တာဒေါ်ညိုညိုဝင့်နှင့် အဖွဲ့ဝင်(၂)ဦး၊ လူငယ်ကိုယ်စားလှယ်(၂)ဦး တို့ တက်ရောက်ခဲ့ကြပါသည်။