ထားဝယ်၊ ၂၀၂၂ခုနှစ်၊ ဇွန်လ(၄)ရက်။

သွေးလွန်တုပ်ကွေးရောဂါကြိုတင်ကာကွယ်ရေးလုပ်ငန်များတွင် ပြည်နယ်၊ တိုင်းဒေသကြီးများမှကြက်ခြေနီစေတနာလုပ်အားရှင်များသည် ပါဝင်ကူညီဆောင်ရွက်လျက်ရှိပါသည်။

ဇွန်လ(၄)ရက်နေ့ နံနက်ပိုင်းက တနင်္သာရီတိုင်းဒေသကြီး၊ ထားဝယ်ခရိုင်တွင် ဆောင်ရွက်သော သွေးလွန်တုပ်ကွေးရောဂါကာကွယ်ရေး ဖုံး၊ သွန်၊ လဲ၊ စစ် လူထုအသိပညာမြှင့်တင်ခြင်းအစီအစဥ်တွင် ထားဝယ်မြို့နယ်ကြက်ခြေနီအသင်းခွဲ၊မြို့နယ်ကြက်ခြေနီတပ်ဖွဲ့မှ ကြက်ခြေနီစေတနာလုပ်အားရှင် များသည် ရပ်ကွက်များအတွင်း အသိပညာပေးခြင်း၊ အဘိတ်ဆေးခတ်ခြင်း၊ ဆေးဖျန်းခြင်းများကို ပါဝင်ကူညီဆောင်ရွက်ခဲ့ပါသည်။

၂၀၂၂ခုနှစ်၊ ဇွန်လ (၄)ရက်နေ့၊ ည(၉)နာရီခန့်က ရန်ကုန်တိုင်းဒေသကြီး၊ ပြည်လမ်း၊ Novotel ဟိုတယ်အနီးတွင် ယာဉ်မတော်တဆမှုဖြစ်ပွားခဲ့ပြီး

အမျိုးသား(၃)ဦးနှင့် အမျိုးသမီး(၃)ဦး ထိခိုက်ဒဏ်ရာများရရှိခဲ့သဖြင့် စမ်းချောင်းမြို့နယ်ကြက်ခြေနီအသင်းခွဲမှစေတနာလုပ်အားရှင်များ သွားရောက်ကာ ရှေးဦးပြုစုပေးခဲ့ပြီး ပရဟိတအသင်းများဖြင့်ပူးပေါင်းကာ ရန်ကုန်ဆေးရုံကြီးသို့ ပို့ဆောင်ကူညီပေးခဲ့ကြပါသည်။

ကျောက်တော်၊ ၂၀၂၂ခုနှစ်၊ ဇွန်လ(၄)ရက်။

ရခိုင်ပြည်နယ်၊ ကျောက်တော်မြို့နယ်၊ သရက်တပင်အုပ်စု၊ သာယာကုန်းကျေးရွာလမ်းဆုံတွင်ဇွန်လ(၄)ရက်နေ့က ဆိုင်ကယ်မတော်တဆမှုကြောင့် ခြေထောက်ထိခိုက်ဒဏ်ရာရသူ အမျိုးသား (၁)ဦးနှင့် ပွန်းပဲ့ဒဏ်ရာရသူ အမျိုးသား(၁)ဦးတို့ကို ကျောက်တော်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် (၂)ဦးတို့က ရှေးဦးပြုစုပေးပြီး စိတ်ပိုင်းဆိုင်ရာအားပေးကူညီမှုများ ဆောင်ရွက်ပေးခဲ့ပါသည်။

၂၀၂၂ ခုနှစ်၊ ဇွန်လ (၂) ရက်နေ့က ကရင်ပြည်နယ်၊ ဘားအံမြို့နယ်ပြည်သူ့ဆေးရုံတွင် ဆေးကုသမှုခံယူနေသော လူနာတစ်ဦးသည် အောက်ဆီဂျင်အရေးပေါ်လိုအပ်လျှက်ရှိရာ မြို့နယ်မှ ကြက်ခြေနီစေတနာလုပ်အားရှင်များက အောက်ဆီဂျင် (၄၀) လီတာ တစ်အိုးကို ကူညီရှာဖွေကာ သွားရောက်ထောက်ပံ့ပေးခဲ့ကြပါသည်။

ထို့အပြင် ကော့ကရိတ်မြို့နယ်အတွင်းရှိ ကလေးများအား COVID-19 ရောဂါကာကွယ်ဆေးထိုးနှံပေးရာတွင် မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များက ကူညီဆောင်ရွက်ပေးခဲ့ပါသည်။

နေပြည်တော်၊ ဇွန်လ (၃)ရက်။

၂၀၂၂ခုနှစ်၊ ဇွန်လ (၂)ရက်နေ့က ပြည်ထောင်စုနယ်မြေ နေပြည်တော်၊ ဥတ္တရသီရိမြို့နယ် မိုး‌ေစွ- အောင်သပြေ ရွာဆက်လမ်းပေါ်တွင် ယာဉ်မတော်တဆမှုကြောင့် ထိခိုက်ဒဏ်ရာရရှိခဲ့သော အမျိုးသားတစ်ဦးအား ဥတ္တရသီရိမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်(၂)ဦးက ရှေးဦးပြုစု၍ နီးစပ်ရာဆေးရုံသို့ ပို့ဆောင်ကူညီပေးခဲ့ပါသည်။

၂၀၂၂ခုနှစ်၊ မေလ (၃၀)ရက်နေ့ က ကရင်ပြည်နယ်၊ သံတောင်ကြီးမြို့နယ်၊ သံတောင်မြို့ ၊ အမှတ်(၂)ရပ်ကွက် နဲ့ (၃)ရပ်ကွက်များမှာ သွေးလွန်တုပ်ကွေးကာကွယ်ရေးအတွက် အသိပညာပေးခြင်းနဲ့ ရပ်ကွက်များအတွင်းရှိ ရေတွင်း၊ရေကန်များ အဘိတ်ဆေးခပ်ခြင်းကို သံတောင်ကြီးမြို့နယ်ကြက်ခြေနီအသင်းခွဲ မှ ကြက်ခြေနီစေတနာလုပ်အားရှင်များက လုပ်ဆောင်ခဲ့ကြပါတယ်။

မေလ (၂၈)ရက်နေ့ကလည်း တနင်္သာရီတိုင်းဒေသကြီး၊ ထားဝယ်မြို့အတွင်း ရပ်ကွက်များတွင် သွေးလွန်တုပ်ကွေးရောဂါကာကွယ်ရေးအတွက် အသိပညာပေးခြင်းများ၊ ဖုံး/သွန်/လဲ/စစ် လုပ်ငန်းများ၊ အဘိတ်ဆေးခပ်ခြင်းနဲ့ ခြင်ဆေးဖြန်းခြင်းများကို ထားဝယ်မြို့နယ်ကြက်ခြေနီစေတနာလုပ်အားရှင်များက ကူညီဆောင်ရွက်ခဲ့ပါတယ်။

၂၀၂၂ခုနှစ်၊ ဇွန်လ (၂)ရက်နေ့တွင် ဧရာဝတီတိုင်းဒေသကြီး၊ ဝါးခယ်မမြို့နယ် ပြည်သူ့ဆေးရုံတွင် ဆေးကုသမှုခံယူနေသည့် လူနာတစ်ဦးအတွက် အရေးပေါ်လိုအပ်သော ‘B’ သွေးတစ်လုံးကို ဝါးခယ်မမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်တစ်ဦးက လှူဒါန်းပေးခဲ့ပါသည်။

ကြက်ခြေနီစေတနာလုပ်အားရှင်များအနေဖြင့် အရေးပေါ်သွေးလိုအပ်သော လူနာများအတွက် ကိုယ်တိုင်သွေးလှူဒါန်းခြင်းများ အပြင် လိုအပ်သော သွေးအတွက် သွေးလှူရှင်များ ရှာဖွေပေးခြင်းကို လုပ်ဆောင်လျက်ရှိပါသည်။

ကရင်ပြည်နယ်၊ ကြာအင်းဆိပ်ကြီးမြို့နယ် တွင် ၂၀၂၂ခုနှစ်၊ ဇွန်လ(၂)ရက်နေ့က ကျောင်းသားလူငယ်များအား COVID -19 ကာကွယ်ဆေးထိုးခြင်းလုပ်ငန်းများ၌ မြို့နယ်ကြက်ခြေနီစေတနာလုပ်အားရှင်များက ပါဝင်ကူညီဆောင်ရွက်ခဲ့ပါသည်။

မေလ (၃၁)ရက်နေ့၊ ဘားအံပြည်သူ့ဆေးရုံကြီးတွင် ဆေးကုသမှုခံယူနေသည့် အရေးပေါ်လူနာအတွက် လိုအပ်လျက်ရှိ ‘O’သွေး(၂)လုံးအား ဘားအံမြို့နယ်ကြက်ခြေနီစေတနာလုပ်အားရှင်များက အရေးပေါ်သွေးသန့်ရရှိရန်အတွက် သွေးသန့်သွေးလှူရှင်(၂)ဦးကို ရှာဖွေကူညီချိတ်ဆက် ဆောင်ရွက်ပေးခဲ့ပါသည်။

၂၀၂၂ခုနှစ်၊ မေလ(၃၀)ရက်နေ့က ဘားအံမြို့နယ်မှ ကြက်ခြေနီစေတနာလုပ်အားရှင်များသည် မုက္ကဒိကျေးရွာ အထက်ပိုင်းမှ အမျိုးသမီးလူနာတစ်ဦး အတွက် လိုအပ်လျက်ရှိသော အောက်စီဂျင် ၄၀လီတာ (၃)အိုး နှင့် အိန္ဒုကျေးရွာအုပ်စု၊ ကတွန်းတာကျေးရွာမှ လိုအပ်လျက်ရှိသော အမျိုးသမီးလူနာတစ်ဦး အတွက် အောက်စီဂျင် ၄၀လီတာ (၆)အိုး တို့ကို သွားရောက်ကူညီပို့ဆောင်ပေးခဲ့ပါသည်။

စစ်ကိုင်း၊ ၂၀၂၂ခုနှစ်၊ ဇွန်လ(၁)ရက်။

စစ်ကိုင်းတိုင်းဒေသကြီး ၊ စစ်ကိုင်းမြို့နယ်ကြက်ခြေနီအသင်းခွဲ၊ မြို့နယ်ကြက်ခြေနီတပ်ဖွဲ့မှူး ဦးဝင်းမြိုင် နှင့် ကြက်ခြေနီစေတနာလုပ်အားရှင် (၆)ဦးတို့သည် သွေးလွန်တုပ်ကွေးရောဂါ ကာကွယ်ရေးအတွက် မြို့ပေါ်ရှိ အမက ကျောင်း (၅)ကျောင်းတွင် ဆေးဖြန်းခြင်း၊ ဆေးမှုတ်ခြင်း၊ ဖုံး၊ သွန်၊ လဲ၊ စစ် ပြုလုပ်ခြင်း၊ ရေကန်များ ဆေးခပ်ခြင်းတို့ကို ဇွန်လ(၁)ရက်နေ့က ပြုလုပ်ခဲ့ကြပါသည်။