စမ်းချောင်း၊ ဇွန်လ(၈)ရက်။

၂၀၂၂ခုနှစ်၊ ဇွန်လ (၇)ရက်နေ့ ညပိုင်းတွင် ရန်ကုန်တိုင်းဒေသကြီး၊ စမ်းချောင်းမြို့နယ်မှ ဆီးချို လူနာ(၁)ဦးကို စမ်းချောင်းမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် (၄)ဦးတို့က မြို့နယ်ကြက်ခြေနီအသင်းခွဲမှ လူနာတင်ယာဉ်ဖြင့် ရန်ကုန်အနောက်ပိုင်းဆေးရုံသို့ ပို့ဆောင်ကူညီပေးခဲ့ပါသည်။

၂၀၂၂ခုနှစ်၊ ဇွန်လ (၇)ရက်နေ့တွင် ရန်ကုန်တိုင်းဒေသကြီး၊ လသာမြို့နယ်၊ အမှတ်(၅)ရပ်ကွက်မှ ပေါင်ရိုးကျိုးဝေဒနာရှင် လူနာအမျိုးသားတစ်ဦးအား လသာမြို့နယ်ကြက်‌ခြေနီအသင်းခွဲမှ ကြက်ခြေနီစေတနာလုပ်အားရှင်များက အသင်းခွဲပိုင် ကြက်ခြေနီအရေးပေါ်လူနာတင်ယာဉ်ဖြင့် အရိုးရောဂါအထူးကုဆေးရုံ (ကြည့်မြင်တိုင်) သို့ ရက်ချိန်းပြသရန်အတွက် ပို့ဆောင်ကူညီပေးခဲ့ပါသည်။

၂၀၂၂ ခုနှစ်၊ ဇွန်လ (၆) ရက်နေ့က ကရင်ပြည်နယ်၊ မြဝတီမြို့နယ်အတွင်းရှိ ဖလူးကြီး၊ ဖလူးလေးနှင့် မဲထော်သလေးကျေးရွာများမှ နေရပ်စွန့်ခွာအိမ်ထောင်စု (၃၃၃) စုတို့အား မြန်မာနိုင်ငံကြက်ခြေနီအသင်း၊ မိသားစုပြန်လည်ဆက်သွယ်ပေးရေးဌာန၊ မြန်မာနိုင်ငံအရှေ့တောင်ပိုင်းဒေသစီမံချက်မှ ထောက်ပံ့သော အခြေခံစားသောက်ကုန်များနှင့် လိုအပ်သောပစ္စည်းများကို ကရင်ပြည်နယ်ကြက်ခြေနီကြီးကြပ်မှုကော်မတီမှ တာဝန်ရှိသူများက ထောက်ပံ့ပေးခဲ့ကြသည်။

အဆိုပါ နေရပ်စွန့်ခွာအိမ်ထောင်စုများအား တာပေါ်လင်စ၊ စောင်၊ ခြင်ထောင်၊ ဖျာ၊ မီးဖိုချောင်သုံးပစ္စည်း၊ အရေးပေါ်သုံးရေဘူး၊ ရေပုံးနှင့် အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း စုစုပေါင်း (၈) မျိုးတို့ကို ပြည်နယ်ကြက်‌ခြေနီတပ်ဖွဲ့မှူး ဦးမြင့်နိုင်၊ စီမံချက်တာဝန်ခံအရာရှိ ဦးမန်းကျော်ခုန်းတာနှင့် တာဝန်ရှိသူများ၊ မြို့နယ်ကြက်ခြေနီတပ်ဖွဲ့မှူး ဦးအောင်သွင်ဦးတို့က မင်းလက်ပံကျေးရွာရှိ ဘုန်းကြီးကျောင်းတွင် သွားရောက်ထောက်ပံ့ပေးခဲ့ပါသည်။

မြန်မာနိုင်ငံကြက်ခြေနီအသင်းဥက္ကဌ ဒေါက်တာမောင်မောင်မြင့်နှင့် ရှမ်းပြည်နယ် (အရှေ့ပိုင်း) ကြက်ခြေနီကြီးကြပ်မှု ကော်မတီဝင်များသည် ယခုနှစ် မေလ (၁၆) ရက်နေ့က ကျိုင်းတုံမြို့၊ နောင်ကန်ကျေးရွာရှိ စိန့်မေရီအနာကြီးရိပ်သာသို့ သွားရောက်ခဲ့ပြီး ရောဂါသည်များနှင့် ရိပ်သာတာဝန်ရှိ သူများကို တွေ့ဆုံခဲ့ပါသည်။

တွေ့ဆုံရာတွင် အသင်းဥက္ကဌမှ ကြက်ခြေနီမှ ဆောင်ရွက်လျက်ရှိသည့် လူမှုကရုဏာလုပ်ငန်းများ အကြောင်းကို မိတ်ဆက်ပြောကြားခဲ့ပြီး ရိပ်သာတာဝန်ရှိသူများမှ ရောဂါသည်များ၏ အခြေအနေနှင့် ဆောင်ရွက်ပေးနေသည့် လုပ်ငန်းများအကြောင်းကို ပြန်လည်ရှင်းလင်းပြောကြားခဲ့ပါသည်၊ ဆက်လက်ပြီး ရိပ်သာတွင် အသုံးပြုနိုင်ရန်အတွက် ကိုဗစ်-၁၉ ရောဂါကာကွယ်ရေးပစ္စည်းများ ဖြစ်သည့် နှာခေါင်းစည်း (၂,၅၀၀) ခု၊ ခွဲစိတ်ခန်းသုံး တစ်ခါသုံးလက်အိတ် (၂,၀၀၀) ခု၊ လက်သန့်ဆေးရည် (၁၀၀ မီလီ) (၂၄၀) ခု၊ လက်သန့်ဆေးရည် (၅၀၀ မီလီ) (၆၀) ခု၊ ကာဘော်လစ် ဆပ်ပြာ(၅၀) တုံးနှင့် မျက်နှာကာ (၃၀၀) ခုတို့ကို ပေးအပ်လှူဒါန်းခဲ့ပါသည်။

၂၀၂၂ခုနှစ်၊ ဇွန်လ(၄)ရက်နေ့က တနင်္သာရီတိုင်းဒေသကြီး၊ ထားဝယ်မြို့တွင် ထိခိုက်ဒဏ်ရာရှေးဦးပြုစုခြင်း (ဆင့်ပွား)သင်တန်းကို ထားဝယ်မြို့ကြက်ခြေနီအသင်းခွဲ ရုံး၌ ဖွင့်လှစ်ခဲ့ပါသည်။ အဆိုပါသင်တန်းအား ဇွန်လ(၄)ရက်နှင့်(၅)ရက်နေ့များတွင် သင်ကြားပေးခဲ့ပြီး သင်တန်းသား စုစုပေါင်း (၃၇)ဦးတက်ရောက်ခဲ့ကြပါသည်။

မြိတ်မြို့နယ်တွင်လည်း ထိခိုက်ဒဏ်ရာရှေးဦးပြုစုခြင်း (ဆင့်ပွား) သင်တန်းကို ဇွန်လ(၄)ရက်နေ့က မြိတ်မြို့နယ်ကြက်ခြေနီအသင်းခွဲ ရုံး၌ ဖွင့်လှစ်ခဲ့ပါသည်။ အဆိုပါသင်တန်းအား ဇွန်လ(၄)ရက်နှင့် (၅)ရက်များတွင် (၂)ရက်တာသင်ကြားခဲ့ကြပြီး သင်တန်းသား စုစုပေါင်း (၂၅)ဦး တက်ရောက်ခဲ့ကြပါသည်။

တာချီလိတ်၊ ဇွန်လ (၆)ရက်။

၂၀၂၂ခုနှစ်၊ ဇွန်လ (၃)ရက်တွင် ရှမ်းပြည်နယ်(အရှေ့ပိုင်း)၊ တာချီလိတ်မြို့ရှိ ကြက်ခြေနီစေတနာလုပ်အားရှင်များသည် တာချီလိတ်မြို့နယ်၊ ဝမ်ပုံဆိပ်ကမ်း သို့ အကြောင်းအမျိုးမျိုးကြောင့် လာအိုနိုင်ငံမှ ပြန်လည်ဝင်ရောက်လာသည့် နေရပ်ပြန် ၁၉၉ ဦးအား ကူညီဆောင်ရွက်ခြင်းများနှင့် COVID -19 ကာကွယ်ရေးအတွက် ကျန်းမာရေးစစ်ဆေးမှုများ အပြင် စံလင်းဖြိုး COVID-19 သီးသန့်ထားရှိစင်တာ တွင် သတ်မှတ်ရက်အတွင်းနေထိုင်နိုင်ရေး များအား ကူညီဆောင်ရွက်ပေးလျက်ရှိပါသည်။ ထို့နောက် ရောဂါကင်းစင်သူများကို သက်ဆိုင်ရာပြည်နယ် နှင့် တိုင်းဒေသကြီးအသီးသီးသို့ ပြန်လည်ပို့ဆောင်ပေးခြင်းများကို ကူညီဆောင်ရွက်ပေးလျက်ရှိပါသည်။

ရန်ကုန်၊ ၂၀၂၂ခုနှစ်၊ ဇွန်လ(၆)ရက်။

မြန်မာနိုင်ငံကြက်ခြေနီအသင်းနှင့် ထိုင်းနိုင်ငံကြက်ခြေနီအသင်းတို့ပူးပေါင်းဖွင့်လှစ်သော ရှေးဦးပြုစုခြင်း(နည်းပြ)သင်တန်းဖွင့်ပွဲကို ဇွန်လ(၆)ရက်နေ့ နံနက်ပိုင်းက ရန်ကုန်တိုင်းဒေသကြီး ကြည့်မြင်တိုင်မြို့နယ်ရှိ လူမှုကရုဏာဆိုင်ရာ ပညာရေးစင်တာ၌ပြုလုပ်ရာ အသင်း

ဥက္ကဌဒေါက်တာမောင်မောင်မြင့် onlineမှ တက်ရောက်ခဲ့ပါသည်။

သင်တန်းဖွင့်ပွဲတွင် အသင်းဥက္ကဌ ဒေါက်တာမောင်မောင်မြင့်က အမှာစကား ပြောကြားရာတွင် အသင်းအနေဖြင့် ရှေးဦးပြုစုခြင်းလုပ်ငန်းများကို ကြက်ခြေနီစေတနာလုပ်အားရှင်များသာမကဘဲ ပြည်သူလူထုတိုင်း ရှေးဦးပြုစုခြင်းပညာရပ်များ တတ်မြောက်‌စေရန်၊တတ်မြောက်ထားသည့် ရှေးဦးပြုစုခြင်း ပညာရပ်များဖြင့် ပြည်သူ့အကျိုးပြုလုပ်ငန်းများဆောင်ရွက်နိုင်စေရန် သင်တန်းကို ဖွင့်လှစ်ခြင်းဖြစ်ပါကြောင်း၊ ရှေးဦးပြုစုခြင်းပညာရပ်များကို မိမိအတွက်၊ မိသားစုဝင်များအတွက်၊ ပတ်ဝန်းကျင်အတွက် အကျိုးရှိအောင် ပြန်လည်အသုံးချပြီး အများလေးစားရသည့် စံနမူနာပြု နည်းပြကောင်းများအဖြစ် လူမှုကရုဏာလုပ်ငန်းများကို ဆောင်ရွက်ကြရန် ဆန္ဒပြုပါကြောင်း ပြောကြားခဲ့ပါသည်။

သင်တန်းဖွင့်ပွဲသို့ အသင်းဥက္ကဌနှင့်အတူ ဒုတိယအထွေထွေအတွင်းရေးမှူးများဖြစ်ကြသော ဒေါက်တာဒေါ်ညိုညိုဝင့်နှင့် ဒေါက်တာတင်ထွန်းအောင်၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ၊ သင်တန်းနည်းပြများနှင့် သင်တန်းသား/သူများ တက်ရောက်ခဲ့ကြပါသည်။

ဇွန်လ(၆)ရက်နေ့မှ ဇွန်လ(၁၃)ရက်နေ့အထိ (၈)ရက်ကြာပြုလုပ်မည့် အဆိုပါသင်တန်းသို့ပဲခူးတိုင်းဒေသကြီးမှ ကြက်ခြေနီစေတနာလုပ်အားရှင် သင်တန်းသား/သူ (၃၀)ဦး၊ ဧရာဝတီတိုင်းဒေသကြီးမှ သင်တန်းသား/သူ(၃)ဦး၊ စုစု‌ပေါင်း(၃၃)ဦး တက်ရောက်ကြမည်ဖြစ်ပါသည်။

၂၀၂၂ ခုနှစ်၊ ဇွန်လ (၄)ရက်နေ့က ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ်တွင် ဘေးအန္တရာယ်ဆိုင်ရာ စီမံခန့်ခွဲမှုအခြေခံသင်တန်း ဖွင့်ပွဲအခမ်းအနားကို ချိုကြည်သာသနာ့ဗိမာန်တော်တွင် ကျင်းပပြုလုပ်ခဲ့ပါသည်။

အခမ်းအနားတွင် မြန်မာနိုင်ငံကြက်ခြေနီအသင်း၊ ဘေးအန္တရာယ်ဆိုင်ရာစီမံခန့်ခွဲမှုဌာန ညွှန်ကြားရေးမှူး ဒေါ်စန်းစန်းမော်က အမှာစကားပြောကြားခဲ့ပြီး မြင်းကကုန်းကျေးရွာနှင့် မလော့ကျေးရွာ ကြက်ခြေနီအသင်းခွဲငယ်များသို့ ဆေးအိတ်နှင့် Hand Speaker များပေးအပ်ခဲ့ကြပါသည်။

အခမ်းအနားကို မြန်မာနိုင်ငံကြက်ခြေနီအသင်း၊ ဘေးအန္တရာယ်ဆိုင်ရာစီမံခန့်ခွဲမှုဌာနမှ တာဝန်ရှိသူများ၊ ဖျာပုံခရိုင် ဒုတိယကြက်ခြေနီတပ်ဖွဲ့မှူး ဦးနေဝင်းအောင်၊ ဘိုကလေးမြို့နယ်ကြက်ခြေနီအသင်းခွဲအမှုဆောင်များနှင့် ကြက်ခြေနီစေတနာလုပ်အားရှင်များ၊ သင်တန်းနည်းပြများ၊ သင်တန်းသား/သူများနှင့် ဖိတ်ကြားထားသောဧည့်သည်တော်များ တက်ရောက်ခဲ့ကြပါသည်။

အဆိုပါ သင်တန်းကို ဇွန်လ(၄)ရက်နေ့မှ (၅)ရက်နေ့အထိ (၂)ရက်​ကြာ ဖွင့်လှစ် သင်ကြားလျက်ရှိပြီး စုစုပေါင်း သင်တန်းသား/သူ (၅၀) ဦးတက်ရောက်လျှက်ရှိကြပါသည်။

ရန်ကုန်၊ ၂၀၂၂ခုနှစ်၊ ဇွန်လ(၄)ရက်။

ရန်ကုန်တိုင်းဒေသကြီး၊ သုံးခွမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် မြို့နယ်အတွင်းမှ ဆေးကုသမှုခံယူရန်လိုအပ်သည့်လူနာများ ဆေးရုံ၊ ဆေးခန်းသို့ အချိန်မီသွားရောက်နိုင်ရန် မြို့နယ်ကြက်ခြေနီအသင်းခွဲမှ ကြက်ခြေနီလူနာတင်ယာဉ်ဖြင့် ကူညီပို့ဆောင်ပေးလျက်ရှိပါသည်။

ထို့အပြင် မြို့နယ်အတွင်းမှ ကလေးငယ်များအားကိုဗစ်-၁၉ ရောဂါ ကာကွယ်ဆေးထိုးနှံရာတွင်လည်း ဝိုင်းဝန်းကူညီ ဆောင်ရွက်ပေးလျက်ရှိပါသည်။