၂၀၂၀ပြည့်နှစ် အောက်တိုဘာလ ၂ရက်နေ့က ရခိုင်ပြည်နယ်၊ ဘူးသီးတောင်မြို့ မြိုသစ် အခြေခံပညာအလယ်တန်း(ကျောင်းခွဲ)တွင် ကိုဗစ်-၁၉ စောင့်ကြည့်ရေးစင်တာပြုလုပ်ထားရှိမည်ဖြစ်သဖြင့် အိပ်ရာကုတင်များတပ်ဆင်ခြင်း၊ အသုံးအဆောင်များထားရှိပေးခြင်း၊ အိမ်သာများဆောက်လုပ်ခြင်း၊ ရေချိုးမည့်ရေကန်များ ဆောက်လုပ်ခြင်း၊ သန့်ရှင်းရေးလုပ်ငန်းများဆောင်ရွက်ခြင်းများကို ဘူးသီးတောင်မြို့နယ် ကြက်ခြေနီတပ်ဖွဲ့မှူး ဉီးကျော်မြင့်ဝေ ဉီးဆောင်သော ကြက်ခြေနီစေတနာလုပ်အားရှင်များက ဆောင်ရွက်ခဲ့ကြသည်။ ထို့ပြင် ဘူးသီးတောင်ကြက်ခြေနီ စေတနာလုပ်အားရှင်များက တိုက်ပွဲရှောင်စခန်းများတွင်လည်း ကိုဗစ်-၁၉ ရောဂါကာကွယ်ရေးအသိပညာပေးခြင်း၊ လိုက်နာဆောင်ရွက်ရမည့်အချက်များအားနှိုးဆော်ခြင်း၊ နှာခေါင်းစည်းများအခမဲ့ပေးဝေခြင်း ဝတ်ဆင်အသုံးပြုစေခြင်းတို့ကို ဆောင်ရွက်ခဲ့ကြသည်။

၂၀၂၀ပြည့်နှစ် အောက်တိုဘာလ ၂ရက်နေ့က ရှမ်းပြည်နယ်အရှေ့ပိုင်း၊ တာချီလိတ်မြို့နယ်ရှိ မိုးကုတ်ဝိပဿနာဓမ္မရိပ်သာတွင် ဖွင့်ထားသောအသွားအလာကန့်သတ်စောင့်ကြည့်ရေးစခန်းသို့ ရောက်ရှိလာသည့် နေရပ်ပြန်ပြည်သူ ၁၀၀ဦးအား တာချီလိတ်ခရိုင်ကြက်ခြေနီတပ်ဖွဲ့မှူးနှင့် တာချီလိတ်မြို့နယ်ကြက်ခြေနီတပ်ဖွဲ့မှူး ဦးဆောင်သော ကြက်ခြေနီစေတနာလုပ်အားရှင်များက စိတ်ပိုင်းဆိုင်ရာအားပေးကူညီမှုများပြုလုပ်ပေးခဲ့ပြီး ကိုဗစ်၁၉ရောဂါကာကွယ်ရေးအသိပညာပေးခြင်း၊ လိုက်နာဆောင်ရွက်ရမည့်အချက်များအားတိုက်တွန်းနှိုးဆော်ခြင်း၊ အမျိုးသမီးတစ်ကိုယ်ရည်သုံးပစ္စည်းနှင့် အမျိုးသားတစ်ကိုယ်ရည်သုံးပစ္စည်းများ၊ ခြင်ထောင်များ စသည့်အသုံးအဆောင်ပစ္စည်းများ ထောက်ပံ့ပေးအပ်ခြင်းတို့ကို ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းဆောင်ရွက်ခဲ့ကြသည်။

၂၀၂၀ ပြည့်နှစ်၊ အောက်တိုဘာလ ၂ ရက်နေ့က မွန်ပြည်နယ်၊ ချောင်းဆုံမြို့နယ်တွင် ဆရာတော်ကြီးများက ဘေးအန္တရာယ်ကင်း ပရိတ်တရားတော်များအား လှည့်လည်ရွတ်ဖတ်ပူဇော်ရာတွင် ချောင်းဆုံမြို့နယ်ကြက်ခြေနီအသင်းခွဲဥက္ကဌ ဦးတင်လှိုင်ဦး ဦးဆောင်သော ကြက်ခြေနီစေတနာလုပ်အားရှင် (၈) ဦးတို့က လိုက်ပါ၍ ကျန်းမာရေးစောင့်ရှောက်မှုပေးခဲ့ကြသည်။ ထို့အပြင် အထူးရဲသင်တန်းဖွင့်ပွဲတွင် လိုအပ်သော ကျန်းမာရေးစောင့်ရှောက်မှုပေးခြင်းနှင့် COVID-19 ရောဂါ ကာကွယ်ရေးအတွက် နှာခေါင်းစည်းများ ဖြန့်ဝေပေးခဲ့ကြသည်။

ရခိုင်ပြည်နယ်၊ စစ်တွေမြို့ ပြည်သူ့ဆေးရုံကြီးတွင် ကိုဗစ် ၁၉ရောဂါကူးစက်မှုကြောင့် ကုသမှုခံယူပြီး ရောဂါပိုးကင်းစင်ကာ ပြန်လည်ကျန်းမာလာသူများအား ရခိုင်ပြည်နယ်ကြက်ခြေနီတပ်ဖွဲ့မှူး ဦးမြင့်ထွေး၊ မြို့နယ်ကြက်ခြေနီတပ်ဖွဲ့မှူး ဦးကျော်နိုင်ဦးနှင့် ကြက်ခြေနီစေတနာလုပ်အားရှင်များက တာဝန်ရှိသူများနှင့်အတူ ပူးပေါင်းကာ နေရပ်အသီးသီးသို့ ပြန်လည်ပို့ဆောင်ကူညီပေးခြင်းတို့ကို ၂၀၂၀ပြည့်နှစ် အောက်တိုဘာလ ၁ရက်နေ့က ဆောင်ရွက်ခဲ့ကြသည်။  

၂၀၂၀ပြည့်နှစ် စက်တင်ဘာလ ၃၀ရက်နေ့က တာချီလိတ်ခရိုင်ကြက်ခြေနီတပ်ဖွဲ့မှူး၊ တာချီလိတ်မြို့နယ်ကြက်ခြေနီအသင်းခွဲဥက္ကဌနှင့် မြို့နယ်တပ်ဖွဲ့မှူးတို့ဦးဆောင်သော ကြက်ခြေနီစေတနာလုပ်အားရှင်များသည် ရှမ်းပြည်နယ်အရှေ့ပိုင်း၊ တာချီလိတ်မြို့နယ်၊ မိုးကုတ်ဝိပဿနာတရားရိပ်သာတွင် ဖွင့်ထားသော အသွားအလာကန့်သတ်စောင့်ကြည့်ရေးစခန်းရှိ နေရပ်ပြန်ပြည်သူ ၁၁၆ဦးအား အသုံးအဆောင်နှင့်ထောက်ပံ့ပစ္စည်းများပေးအပ်ခြင်း၊ စိတ်ပိုင်းဆိုင်ရာအားပေးနှစ်သိမ့်ပေးခြင်းတို့ကို ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းဆောင်ရွက်ခဲ့ကြသည်။  

၂၀၂၀ပြည့်နှစ် စက်တင်ဘာလ ၃၀ရက်နေ့က ပဲခူးတိုင်းဒေသကြီး ရေတာရှည်မြို့နယ်ရှိ ကားဂိတ်များ၊ ဆိုက်ကားဂိတ်များ၊ လူအများသွားလာကြသောနေရာများတွင် ဖြတ်သန်းသွားလာကြသူများအား ရေတာရှည်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များက ကိုဗစ်၁၉ရောဂါကာကွယ်ရေးအတွက် လိုက်နာဆောင်ရွက်ရမည့်အချက်များအားနှိုးဆော်ခြင်း၊ နှာခေါင်းစည်းများအခမဲ့ပေးဝေခြင်းတို့ကို ဆောင်ရွက်ခဲ့ကြသည်။ ထို့ပြင် ဇီးကုန်းမြို့ရှိ မြန်မာ့စီးပွားရေးဘဏ်ခွဲ၊ မြို့နယ်အထွေထွေအုပ်ရေးမှူးရုံး၊ မြို့နယ်သမဝါယမအသင်းရုံး၊ မြို့မရဲတပ်ဖွဲ့ရုံးများများတွင် ကိုဗစ် ၁၉ရောဂါကာကွယ်ရေးအသိပညာပေးခြင်းနှင့် ဆေးဖြန်းခြင်းတို့ကို ဇီးကုန်းမြို့နယ်ကြက်ခြေနီတပ်ဖွဲ့မှူး ဦးကျော်စိုးမင်းနှင့်ကြက်ခြေနီစေတနာလုပ်အားရှင်များက မြို့နယ်ပြည်သူ့ကျန်းမာရေးဦးစီးဌာနမှ တာဝန်ရှိသူများ၊ ဌာနဆိုင်ရာများနှင့်အတူ ပူးပေါင်းဆောင်ရွက်ခဲ့ကြသည်။

၂၀၂၀ ပြည့်နှစ်၊ စက်တင်ဘာလ ၃၀ ရက်နေ့က ရှမ်းပြည်နယ် (တောင်ပိုင်း)၊ တောင်ကြီးမြို့နယ်၊ ဘန်ကွဲကျေးရွာရှိ အခြေခံပညာအထက်တန်းကျောင်း အသွားအလာကန့်သတ်စောင့်ကြည့်ရေးစခန်းတွင် COVID-19 ရောဂါကာကွယ်ရေးအတွက် ပိုးသတ်ဆေးများ ဖြန်းပေးခြင်းတို့ကို တောင်ကြီးမြို့နယ်ကြက်ခြေနီအသင်းခွဲမှ တပ်စုမှူး ဒေါ်လေးလေးနွယ် ဦးဆောင်သော ကြက်ခြေနီစေတနာလုပ်အားရှင် ၇ ဦးတို့က မြို့နယ်ပြည်သူ့ကျန်းမာရေးဦးစီးဌာနနှင့် ပူးပေါင်းဆောင်ရွက်ခဲ့ကြသည်။

၂၀၂၀ ပြည့်နှစ်၊ စက်တင်ဘာလ ၂၉ ရက်နေ့က COVID-19 ရောဂါကာကွယ်ရေးအတွက် ရှမ်းပြည်နယ် (တောင်ပိုင်း)၊ တောင်ကြီးမြို့နယ်၊ ဖာမွန်းကျေးရွာနှင့် ထီဖောင်းကျေးရွာရှိ စားသောက်ဆိုင်များ၊ ကုန်စုံဆိုင်များအား COVID-19 ရောဂါကာကွယ်ရေးလမ်းညွှန်ချက်များအတိုင်း စနစ်တကျ ရောင်းချကြရန် အသိပညာပေးခြင်းနှင့် ပိုစတာများကပ်ပေးခြင်းတို့ကို တောင်ကြီးမြို့နယ်ကြက်ခြေနီအသင်းခွဲမှ တပ်ဖွဲ့ခွဲမှူး ဒေါ်လှိုင်လှိုင်ထွေး ဦးဆောင်သော ကြက်ခြေနီစေတနာလုပ်အားရှင် ၁၀ ဦးတို့က ရပ်ကွက်အုပ်ချုပ်ရေးမှူးများနှင့် ပူးပေါင်းဆောင်ရွက်ခဲ့ကြသည်။ ထို့အတူ ဟိုပုံးမြို့နယ်ကြက်ခြေနီအသင်းခွဲ ဥက္ကဌဦးကျော်စွာအောင်နိုင်ဟိန်း ဦးဆောင်သော ကြက်ခြေနီစေတနာလုပ်အားရှင် ၁၀ ဦးတို့ကလည်း ဟိုပုန်းမြို့ ဘုရားကြီးရှေ့တွင် COVID-19 ရောဂါ ကာကွယ်ရေးလမ်းညွှန်ချက်များအား အသိပေးနှိုးဆော်ခြင်းနှင့် နှာခေါင်စည်းများစနစ်တကျ တပ်ဆင်စေခြင်းတို့ကို ဌာနဆိုင်ရာများမှ တာဝန်ရှိသူများနှင့် ပူးပေါင်းဆောင်ရွက်ခဲ့ကြသည်။

၂၀၂၀ ပြည့်နှစ်၊ စက်တင်ဘာလ ၂၉ ရက်နေ့က နမ်းခမ်းမြို့နယ်ကြက်ခြေနီအသင်းခွဲမှ မြို့နယ်တပ်ဖွဲ့မှူး စိုင်းနော်ခမ်း ဦးဆောင်သော ကြက်ခြေနီစေတနာလုပ်အားရှင် (၁၂) ဦးတို့သည် COVID-19 ရောဂါ ကြိုတင်ကာကွယ်ရေးအတွက် ရှမ်းပြည်နယ် (မြောက်ပိုင်း)၊ နမ့်ခမ်းမြို့ဝင်ဂိတ်တွင် ရီးသွားပြည်သူစုစုပေါင်း (၄၃၉) ဦးတို့အား ကိုယ်အပူချိန်တိုင်းတာပေးခြင်း၊ ရောဂါကာကွယ်ရေးအသိပညာပေးခြင်း၊ ခရီးသွားရာဇဝင် မှတ်သားခြင်းတို့ကို ပြည်သူ့ကျန်းမာရေးဦးစီးဌာနနှင့် ပူးပေါင်းဆောင်ရွက်ခဲ့ကြသည်။ ထို့သို့ ပူးပေါင်းဆောင်ရွက်ခဲ့သော ကြက်ခြေနီစေတနာလုပ်အားရှင်များအား ရပ်မိရပ်ဖများမှ အချိုရည်နှင့်မုန့်များ လှူဒါန်းပေးခဲ့ကြသည်။