၂၀၂၁ခုနှစ်၊မေလ(၁၃)ရက်နေ့ နေ့လည်ပိုင်းတွင် ရန်ကုန်တိုင်းဒေသကြီး၊ မြောက်ဥက္ကလာပမြို့နယ်၊ ရွှေပေါက်ကံမြို့သစ်မှ ဝမ်းပျက်ဝမ်းလျော အမျိုးသမီး လူနာတစ်ဦးအား ဆေးရုံသို့ ပို့ဆောင်ရန် အကူအညီ တောင်းခံသဖြင့် ဒဂုံမြို့သစ်(မြောက်ပိုင်း)မြို့နယ်ကြက်ခြေနီအသင်းခွဲမှ မြို့နယ်ကြက်ခြေနီတပ်ဖွဲ့မှူး ဦးသန်းအောင်မိုးနှင့် ကြက်ခြေနီစေတနာလုပ်အားရှင်(၃)ဦး သွားရောက်ပြီး ကြက်ခြေနီလူနာတင်ယာဥ်ဖြင့် ဆေးရုံသို့ ကူညီပို့ဆောင်ပေးခဲ့ပါတယ်။  

ခက်ခဲကြမ်းတမ်းတဲ့နေ့တွေမှာတောင် အမြဲကူညီအားပေးနေကြတဲ့ ကြက်ခြေနီစေတနာလုပ်အားရှင်တွေကို ကျေးဇူးတင်ပါတယ်။

တနင်္သာရီတိုင်းဒေသကြီး၊ ထားဝယ်မြို့ ၂၀၂၁ခုနှစ်၊ မေလ(၁၂)ရက်နေ့ နံနက်အစောပိုင်းက ထားဝယ်မြို့ အိုးလုပ်ရပ်မှ ကိုယ်အပူချိန်တက်နေသော ကလေးတစ်ဦးအား ထားဝယ်မြို့နယ်ကြက်ခြေနီစေတနာလုပ်အားရှင်များက နေအိမ်မှ ဆေးရုံသို့ ကြက်ခြေနီလူနာတင်ယာဥ် ဖြင့် ကူညီပို့ဆောင်ပေးခဲ့ကြပါတယ်။ ထို့အတူ မေလ(၁၃)ရက်နေ့ ညပိုင်းကလည်း ရှမ္မလည်ဆွဲရပ်မှ ဆေးကုသမူခံယူရန် လိုအပ်တဲ့ကလေးတစ်ဦးနှင့် ပုံကျွန်းရပ်မှ အတက်ရောဂါဖြစ်နေသည့် လူနာတစ်ဦးတို့အား ဆေးရုံသို့ ကူညီပို့ဆောင်ပေးခဲ့ကြပါတယ်။

၂၀၂၁ ခုနှစ်၊ မေလ ၁၂ရက်နေ့က ကရင်ပြည်နယ်၊ မြဝတီမြို့ အမှတ် (၂) ချစ်ကြည်ရေးတံတားမှတဆင့် ဆေးကုသမှုခံယူပြီး ပြန်လည်ဝင်ရောက်လာသော နေရပ်ပြန်ပြည်သူ (၁) ဦးအား ကြက်ခြေနီစေတနာလုပ်အားရှင် (၂) ဦးက ကြက်ခြေနီအသင်းခွဲပိုင်ယာဉ်ဖြင့် ရွှေမြဝတီအသွားအလာကန့်သတ်စောင့်ကြည့်ရေးစခန်းသို့ ကူညီပို့ဆောင်ခဲ့ကြပါသည်။  

၂၀၂၁ခုနှစ်၊ မေလ(၁၂)ရက်နေ့ နံနက်ပိုင်းက ရန်ကုန်တိုင်းဒေသကြီး အင်းစိန်မြို့နယ် ဖော့ကန်ရပ်ကွက်မှ အရိုးကျိုးသည့် အဖွားအို တစ်ဦးအား ဆေးရုံသို့ သွားရန်အကူအညီ တောင်းလာသဖြင့် မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များ သွားရောက်ခဲ့ပြီး အသင်းခွဲမှ ကြက်ခြေနီလူနာတင်ယာဥ်ဖြင့် ဆေးရုံသို့ ပို့ဆောင်ကူညီ ပေးခဲ့ပါတယ်။