မြန်မာနိုင်ငံကြက်ခြေနီအသင်းသည် ဆိုင်ကလုန်းမုန်တိုင်းမိုခါ တိုက်ခတ်မှုကြောင့်ထိခိုက်ခံစားရသည့် ရခိုင်ပြည်နယ်ရှိ ပြည်သူများအတွက် အရေးပေါ်သုံးကယ်ဆယ်ရေးပစ္စည်းများ ကူညီထောက်ပံ့ပေးဝေလျက်ရှိပါသည်။

စစ်တွေမြို့နယ် ပလ္လင်ပြင်ကျေးရွာရှိ ဒေသခံပြည်သူများအတွက် အသင်းမှထောက်ပံ့သော မိသားစုသုံးပစ္စည်းများ၊ တစ်ကိုယ်ရည်သန့်ရှင်းရေးသုံးပစ္စည်းများ၊တစ်ကိုယ်ရည်အမျိုးသမီးသန့်ရှင်းရေးသုံးပစ္စည်းများ၊မီးဖိုချောင်သုံးပစ္စည်းများ၊တာပေါ်လင်များနှင့်ခြင်ထောင်များကိုပြည်နယ်ကြက်ခြေနီတပ်ဖွဲ့မှူးဦးမြင့်ထွေး၊ ရခိုင်ပြည်နယ်စီမံချက်များ စီမံခန့်ခွဲရေးယူနစ်ညွှန်ကြားရေးမှူးဒေါ်အေးအေးငြိမ်းတို့ဦးဆောင်ပြီး အပြည်ပြည်ဆိုင်ရာကြက်ခြေနီနှင့်လခြမ်းနီအသင်းများဖက်ဒရေးရှင်းမှတာဝန်ရှိသူများ၊ကြက်ခြေနီ ဝန်ထမ်းများနှင့်ဒေသခံကြက်ခြေနီစေတနာလုပ်အားရှင်များသည်မေလ(၂၇)ရက်နေ့နံနက်ပိုင်းက သွားရောက်ထောက်ပံ့ခဲ့ပါသည်။

အရေးပေါ်သုံးကယ်ဆယ်ရေးပစ္စည်းများ‌ ထောက်ပံ့ပေးဝေရာတွင် အိမ်ထောင်စုပေါင်း(၄၈၂)စုအတွက် မိသားစုသုံးပစ္စည်း(၃၀၉)ပုံး၊ တစ်ကိုယ်ရည်သန့်ရှင်းရေးသုံးပစ္စည်း(၄၈၂)အိတ်၊ တစ်ကိုယ်ရည်အမျိုးသမီး သန့်ရှင်း ရေးသုံးပစ္စည်း(၁၇၃)အိတ်၊ မီးဖိုချောင်သုံးပစ္စည်း (၁၇၃)စုံ၊ တာပေါ်လင်(၃၄၆)စနှင့်ခြင်ထောင် (၁၇၃)လုံးတို့ကို ကူညီထောက်ပံ့ပေးခဲ့ပါသည်။

ထို့နောက် အသင်းဝန်ထမ်းများနှင့်ကြက်ခြေနီစေတနာလုပ်အားရှင်များကကြက်ခြေနီ အကြောင်းသိကောင်းစရာ၊သန့်လေးသန့်၊စနစ်တကျလက်ဆေးခြင်းနှင့်ဝမ်းပျက်ဝမ်းလျောရောဂါကာကွယ်ရေးအကြောင်း ကျန်းမာရေးအသိပညာပေးခြင်းများ ပြုလုပ်ခဲ့ပါသည်။

မြန်မာနိုင်ငံကြက်ခြေနီအသင်းအနေဖြင့် အကူအညီလိုအပ်နေသည့်ယာယီခိုလှုံရာစခန်းများနှင့် ကျေးရွာများမှ ပြည်သူများ‌အတွက် စားနပ်ရိက္ခာများ၊ ရေနှင့် တစ်ကိုယ်ရည်သန့်ရှင်းရေးသုံးပစ္စည်းများ၊ အမိုးအကာများ ဆက်လက်ထောက်ပံ့နိုင်ရန်နှင့် အရေးပေါ်ငွေသားထောက်ပံ့နိုင်ရန်အတွက်ချိတ်ဆက်ဆောင်ရွက်လျက်ရှိပါသည်။