ပုသိမ်၊ ဩဂုတ် ၁၄

မြန်မာနိုင်ငံကြက်ခြေနီအသင်း၊ ဧရာဝတီတိုင်းဒေသကြီး ကြက်ခြေနီကြီးကြပ်မှု ကော်မတီ အရေးပေါ်ကွပ်ကဲမှု စင်တာ Emergency Operation Center ဖွင့်ပွဲကို ၂၀၂၀ ပြည့်နှစ်၊ဩဂုတ်လ ၁၄ ရက်‌ေန့ နံနက်ပိုင်းက ပုသိမ်မြို့တိုင်းဒေသကြီး ပြည်သူ့ကျန်းမာရေးဦးစီးဌာန ရုံးဝင်းအတွင်းရှိ အဆိုပါစင်တာရုံး ရှေ့တွင် ကျင်းပခဲ့ရာ တိုင်းဒေသကြီးအစိုးရအဖွဲ့ဝင် ကရင်တိုင်းရင်းသားရေးရာဝန်ကြီး ဂါ့မိုးမြတ်မြတ်သူ၊ အသင်း ဒုတိယဥက္ကဌ ဒေါက်တာဒေါ်အမယာမော်နိုင်နှင့် တိုင်းဒေသကြီးကြက်ခြေနီကြီးကြပ်မှုကော်မတီဥက္ကဋ္ဌဦးမန်းကြည်ရွှင်တို့က ဖွင့်လှစ် ပေးခဲ့ကြပါသည်။
ဆက်လက်ပြီး COVID-19 ရောဂါကာကွယ်ရေးလုပ်ငန်းများတွင် စွမ်းစွမ်းတမံ ပါဝင်ဆောင်ရွက်ခဲ့ကြသည့် ကြက်ခြေနီ‌‌ေစတနာလုပ်အားရှင်များအား ဂုဏ်ပြုပွဲအခမ်းအနားကို ဆက်လက်ကျင်းပရာ ကရင်တိုင်းရင်းသားရေးရာဝန်ကြီး က ပြောကြားရာတွင် လူသားအရင်းအမြစ် လုပ်ငန်းတာဝန်များကို တိုင်းဒေသကြီးအတွင်း လက်ရှိလုပ်ဆောင်နေသည့် EOC စင်တာတွေနှင့် ချိတ်ဆက်ဆောင်ရွက်ကြရန် လိုအပ်ကြောင်း၊ သို့မှသာ တိုင်းဒေသကြီးအတွင်း ဖြစ်ပေါ်လာသည့် သဘာဝဘေးအန္တရာယ်များနှင့် ပတ်သက်ပြီး ကြိုတင်ပြင်ဆင်ခြင်း၊ပြန်လည်ထူထောင်ခြင်း လုပ်ငန်းစဉ်များကို ထိထိရောက်ရောက် ဆောင်ရွက်နိုင်ပြီး ပြည်သူလူထု၏ အသက်အိုးအိမ်စည်းစိမ် ထိခိုက်ဆုံးရှုံးမှုများကို လျှော့ချကာကွယ်နိုင်မှာဖြစ်ကြောင်း၊ COVID-19 ရောဂါ ကာကွယ်တားဆီးရေး လုပ်ငန်းများမှာ အဖက်ဖက်က စွမ်းစွမ်းတမံ ပါဝင်ခဲ့ကြသည့် ကြက်ခြေနီ‌‌စေတနာလုပ်အားရှင်များကိုလည်း တိုင်းဒေသကြီးအစိုးရအနေနှင့် မှတ်တမ်းတင်ထားရှိပါကြောင်း ပြောကြားခဲ့ပါသည်။
ထို့နောက် အသင်း ဒုတိယဥက္ကဋ္ဌ ဒေါက်တာဒေါ်အမယာမော်နိုင်က အမှာစကား ပြောကြားခဲ့ပြီး ဘေးအန္တရာယ်ဆိုင်ရာ စီမံခန့်ခွဲမှုဌာန ညွှန်ကြားရေးမှူး ဒေါ်စန်းစန်းမော်က တိုင်းဒေသကြီး ကြက်ခြေနီ အရေးပေါ် ကွပ်ကဲမှုစင်တာနှင့်ပတ်သက်၍ လည်းကောင်း၊တိုင်းဒေသကြီး ကြက်ခြေနီကြီးကြပ်မှု ကော်မတီဥက္ကဋ္ဌ က COVID-19 ရောဂါ ကာကွယ်ရေးနှင့် ပတ်သက်ပြီး ဆောင်ရွက်ထားရှိမှုများကို လည်းကောင်း တင်ပြ ဆွေးနွေးခဲ့ကြပါသည်။
ယင်းနောက် COVID-19 ရောဂါကာကွယ်ရေး လုပ်ငန်းများ ဆောင်ရွက်ရာတွင် စွမ်းစွမ်းတမံဆောင်ရွက်ခဲ့ကြသောကြက်ခြေနီစေတနာလုပ်အားရှင်များအား ဂုဏ်ပြုမှတ်တမ်းလွှာများ ပေးအပ်ခဲ့ကြပါသည်။