လတ်တလောအခြေအနေတွေကြောင့် ရှမ်းပြည်နယ် (မြောက်ပိုင်း)မှ အိမ်ထောင်စုတစ်ချို့ဟာ သီပေါမြို့နယ်အတွင်းရှိ နေရပ်စွန့်ခွာစခန်း (၄) ခု သို့ တိမ်းရှောင်နေကြရပါတယ်။
ထိုနေရပ်စွန့်ခွာစခန်းတွေကို ရောက်ရှိလာတဲ့ အိမ်ထောင်စုတွေထဲက အိမ်ထောင်စု (၇၂၂) စု (လူဦးရေ ၂,၉၃၇ ဦး) အတွက် ပြည်နယ်ကြက်ခြေနီ ကြီးကြပ်မှုကော်မတီရဲ့ ကြီးကြပ်မှုနဲ့ ကြက်ခြေနီစေတနာလုပ်အားရှင်တွေက အရေးပေါ်လိုအပ်နေတဲ့ အစားအသောက်၊ ဆေးဝါး၊ တစ်ကိုယ်ရည်သန့်ရှင်းရေးသုံးပစ္စည်းများ၊ အဝတ်အထည်နဲ့ အသုံးအဆောင်တွေကို အသင်းဌာနချုပ်နဲ့ အလှူရှင်တွေရဲ့ အကူအညီ နဲ့ ဖြန့်ဝေပေးနိုင်ခဲ့ပြီး စိတ်ပိုင်းလူမှုပိုင်းဆိုင်ရာ အားပေးကူညီမှုတွေကို ပြုလုပ်ခဲ့ပါတယ်။
အဆိုပါ စခန်းတွေမှာ ယခုနှစ် မေလအတွင်း ဖြန့်ဝေခဲ့တဲ့ အရေအတွက်မှာ ခြင်ထောင် (၁၀၀)လုံး၊ စောင် (၄၉) ထည်၊ ပုဆိုး (၄၉)ထည်၊ အမျိုးသမီးဝတ်လုံချည် (၄၉)ထည်၊ မီးဖိုချောင်သုံးပစ္စည်း (၄၉)စုံ၊ တာပေါ်လင် (၂၅)စ၊ တစ်ကိုယ်ရည်သန့်ရှင်းရေးသုံးပစ္စည်း (၄၇၃) စုံ၊ အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၃၈၃) စုံ၊ ကလေးမွေးဖွား သန့်စင်ရေးပစ္စည်း (၂၅)စုံနဲ့ မိသားစုသုံးပစ္စည်း (၅) စုံ တို့ဖြစ်ပါတယ်။
ထို့ပြင် မေလ (၂၆)ရက်နေ့မှာလည်း သီပေါမြို့နယ် (၄) မိုင်ကုန်းမှာရှိတဲ့ IDP Camp မှာ ရေ၊ မီးအဆင်ပြေစွာ အသုံးပြုနိုင်ဖို့ ဒေသတွင်း အလှူရှင်နဲ့ ချိတ်ဆက်ကာ 3KVဒီဇယ်မီးစက်တစ်လုံး တပ်ဆင်ပေးနိုင်ခဲ့ပါတယ်။ ရှေ့ဆက်ပြီး အကူအညီလိုအပ်သူများထံ ကျန်းမာရေးသုံးပစ္စည်းတွေကို ဖြည့်ဆည်း ကူညီပေးနိုင်ဖို့လည်း ဆက်လက်ကြိုးစားဆောင်ရွက်နေကြပါတယ်။
