၂ဝ၂၂ ခုနှစ်၊ ဖေဖော်ဝါရီလ (၁၆)ရက် ။
လတ်တလော ဖြစ်ပွားနေသော အခြေအနေများကြောင့် ရှမ်းပြည်နယ် (တောင်ပိုင်း) သို့ ရောက်ရှိနေသည့် ကယားပြည်နယ်မှ နေရပ်စွန့်ခွာ ပြည်သူများအတွက် မြန်မာနိုင်ငံ ကြက်ခြေနီအသင်း ဌာနချုပ်နှင့် အပြည်ပြည်ဆိုင်ရာ ကြက်ခြေနီကော်မတီ တို့သည် ရှမ်းပြည်နယ်(တောင်ပိုင်း) ကြက်ခြေနီကြီးကြပ်မှုကော်မတီနှင့်အတူ လူသားချင်းစာနာ ထောက်ထားသည့် အကူအညီများကို ပံပိုးကူညီပေးလျက်ရှိပါသည်။
ရှမ်းပြည်နယ်(တောင်ပိုင်း)ရှိ တောင်ကြီး၊ ဆီဆိုင်၊ ပင်လောင်း၊ ညောင်ရွှေ၊ ကလော၊ ပင်းတယ၊ ရပ်စောက်နှင့် လဲချားမြို့များသို့ ရောက်ရှိလာသည့် နေရပ်စွန့်ခွာ ပြည်သူများ အနက်မှ အိမ်ထောင်စု(၂,၄၅၇)စု လူဦးရေ (၇,၇၁၂)ဦး တို့အတွက် ဖွင့်လှစ်ထားသည့် ယာယီစခန်း (၁၅၁)ခုတွင် ရှမ်းပြည်နယ်(တောင်ပိုင်း) မှ ကြက်ခြေနီများက ကျန်းမာရေး စောင့်ရှောက်မှုပေးခြင်း၊ လူနာများဆေးရုံသို့ လွှဲပြောင်းပေးခြင်း၊ ရေနှင့် ပတ်ဝန်းကျင် သန့်ရှင်းရေးဆိုင်ရာ ယာယီရေလှောင်ကန်၊ ယင်လုံအိမ်သာနှင့် အမှိုက်ကန်များ ဆောက် လုပ်ပေးခြင်း၊ ယာယီစခန်းများတွင် အမိုးအကာနှင့် ရေချိုးကန်ကာရံပေးခြင်း၊ အောက် ကြမ်းပြင်အခင်းပြားများဖြန့်ဝေပေးခြင်း၊ ယာယီစာသင်ဆောင်ပြုလုပ်ပေးခြင်း၊ ကျောင်း ဝတ်စုံနှင့် ကျောင်းသုံးပစ္စည်းများ ထောက်ပံ့ပေးခြင်း၊ မိသားစုပြန်လည်ဆက်သွယ် ပေးခြင်းနှင့် ခြေတုတပ်ဆင်နိုင်ရန် ဆက်သွယ်ဆောင်ရွက်ပေးခြင်း စသည့် လုပ်ငန်းများ ကို ဆောင်ရွက်ပေးလျက်ရှိပါသည်။
ရှမ်းပြည်နယ်(တောင်ပိုင်း) မှ ကြက်ခြေနီများက တစ်ကိုယ်ရည်သန့်ရှင်းရေးသုံး ပစ္စည်း(၁,၆၀၇)၊ခု နှာခေါင်းစည်း (၂,၅၁၂)ခု၊ လက်သန့်ဆေးရည်(၇,၂၄၃)ဗူး၊ အမျိုးသမီးအသုံး အဆောင်ပစ္စည်း(၂,၂၀၇)ခု၊ ဖျာ(၁,၀၈၄)ချပ်၊ စောင်(၂,၆၁၆)ထည်၊ ဆေးစိမ်ခြင်ထောင် (၂,၅၄၂)ထည်၊ ဆပ်ပြာ(၁,၂၀၆)တုံး၊ မွေးကင်းစကလေးအသုံးအဆောင် (၆၇)ခု၊ ရေပုံး (၇၈၂)လုံး၊ ဆိုလာမီးအိမ်(၄၉၅)ခု၊ ကြိုး(၂၄)ခု၊ တာပေါ်လင်(၅၀၈)စ၊ တစ်ကိုယ်ရည်သုံး ပစ္စည်း (၁,၃၉၄)စုံ၊ မိသားစုအသုံးအဆောင်ပစ္စည်း(၆၉)စုံ၊ မီးဖိုချောင်သုံးပစ္စည်း(၉၇)စုံ၊ ကျောင်းသုံး ပစ္စည်း(၃၀)စုံ စသည့်တို့ကို ဖြန့်ဝေခဲ့ပါသည်။
ယာယီကယ်ဆယ်ရေး စခန်းအချို့တွင် လိုအပ်သော သုံးရေနှင့်သောက်ရေ ထောက်ပံ့ နိုင်ရန် ရေသန့်စက်တည်ဆောက်ပြီး သန့်ရှင်းသော သောက်သုံးရည် ဖြန့်ဝေနိုင်ရန်နှင့် နေရပ်စွန့်ခွာပြည်သူများနှင့် ဒေသခံပြည်သူများအတွက် ရွေ့လျားဆေးခန်း ဖွင့်လှစ်၍ အခြေခံကျန်းမာရေးစောင့်ရှောက်မှုလုပ်ငန်းများ တိုးချဲ့ဆောင်ရွက်ရန် စီစဉ်ဆောင်ရွက် လျက်ရှိပါသည်။
