ကရင်ပြည်နယ်မှ ကြက်ခြေနီစေတနာလုပ်အားရှင်များသည် ရှေးဦးပြုစုခြင်းပညာရပ်များဖြင့် ရပ်ရွာလူထုအားကူညီပေးလျှက်ရှိပြီး ရှေးဦးပြုစုခြင်းပညာရပ်များ ပြန့်ပွားရေးကိုလည်း ကြိုးစားဆောင်ရွက်လျှက်ရှိရာ ၂၀၂၂ ခုနှစ်၊ ဇွန်လ (၂၆) ရက်နေ့က ဘားအံမြို့နယ်တွင် ရှေးဦးပြုစုခြင်းအခြေခံသင်တန်းများကို ဖွင့်လှစ်ခဲ့ပါသည်။
အဆိုပါသင်တန်းများတွင် သင်တန်းသား၊ သင်တန်းသူ (၈၇) ဦး တက်ရောက်လျှက်ရှိပြီး ရှေးဦးပြုစုခြင်းသင်ခန်းစာများကို သင်တန်းကာလ (၄) ရက်တွင် စာတွေ့လက်တွေ့ သင်ကြားပို့ချပေးသွားမည်ဖြစ်သည်။
ထို့အပြင် မြို့နယ်တွင်ပြုလုပ်သော ရပ်ကွက်/ကျေးရွာအုပ်စု ပေါင်းစုံ အသက် (၂၁) နှစ်အောက် အမျိုးသား ဘောလုံးပြိုင်ပွဲများတွင်လည်း ထိခိုက်ဒဏ်ရာရရှိသူများအား ကြက်ခြေနီစေတနာလုပ်အားရှင်များက ရှေးဦးပြုစုပေးလျှက်ရှိပါသည်။
ဇွန်လ (၂၂) ရက်နေ့ကလည်း ဘားအံမြို့နယ်မှ အောက်ဆီဂျင်အရေးပေါ်လိုအပ်သူများအတွက် အောက်ဆီဂျင် (၄၀)လီတာ (၆)အိုးကိုလည်း မြို့နယ်မှ ကြက်ခြေနီစေတနာလုပ်အားရှင်များက ကူညီရှာဖွေပေးခဲ့ပါသည်။
လှိုင်းဘွဲ့မြို့နယ်မှ ကြက်ခြေနီစေတနာလုပ်အားရှင်များကလည်း ရွှေဂွန်း အခြေခံမူလတန်းကျောင်းလမ်းပြုပြင်ရာတွင် ကူညီဆောင်ရွက်ပေးခဲ့ကြသည်။
