ရန်ကုန်၊ ဖေဖော်ဝါရီ ၂၀၁၈ ခုနှစ် ဖေဖော်ဝါရီလ ၂၄ ရက်နေ့တွင်မြန်မာနိုင်ငံ ကြက်ခြေနီအသင်း၊ ရန်ကုန်တိုင်းဒေသကြီးကြက်ခြေနီကြီးကြပ်မှုကော်မတီမှ ဦးဆောင်၍ ၂၀၁၈ ခုနှစ်၊ မေလ ၈ ရက်နေ့တွင်ကျရောက်မည့် ကမ္ဘာ့ကြက်ခြေနီနေ့ကိုကြိုဆိုဂုဏ်ပြုသောအားဖြင့် ပတ်ဝန်းကျင်သန့်ရှင်းရေးလှုပ်ရှားမှုကို ယနေ့မနက်ပိုင်းက ရန်ကုန်ပြည်သူ့ ဆေးရုံကြီးတွင် ဆောင်ရွက်ခဲ့ကြပါသည်။

အဆိုပါ ပတ်ဝန်းကျင်သန့်ရှင်းလှုပ်ရှားမှုကို ရန်ကုန်တိုင်းဒေသကြီးကြက်ခြေနီကြီးကြပ်မှုကော်မတီဥက္ကဌ ဒေါက်တာဒေါ်လှကြင်ဦးဆောင်ကာ တိုင်းဒေသကြီး၊ ခရိုင်များ၊ မြို့နယ်များ၊ တက္ကသိုလ်၊ ကောလိပ်များ၊ အခြေခံပညာကျောင်းများမှ ကြက်ခြေနီစေတနာလုပ်အားရှင် စုစုပေါင်း အင်အား ၃၀၀ ဦးကျော်ဖြင့် ရန်ကုန်မြို့တော်စည်ပင်သာ ယာရေးကော်မတီနှင့်ပူးပေါင်းကာ ဆေးရုံကြီးပတ်ဝန်း ကျင်ရှိ စွန့်ပစ်ပစ္စည်းများ၊ ပလပ်စတစ်အိတ်များ၊ အမှိုက်များအား ကောက်ယူစုစည်းကာ အမှိုက်အိတ်များဖြစ် ထည့်သွင်း၍ မြို့တော်စည်ပင်သာယာရေးဌာန အမှိုက်သယ်ယူရေးယာဉ်များပေါ်သို့ စုပေါင်းသယ်ယူပို့ဆောင်ကာ ပတ်ဝန်းကျင်သန်ရှင်းရေးလုပ်ငန်းများဆောင်ရွက်ခဲ့ကြပါသည်။ အဆိုပါ ကြက်ခြေနီလှုပ်ရှားမှုကို စနေနေ့ နံနက် ၆ နာရီမှ ၉ နာရီထိ ဆောင်ရွက်ခဲ့ကြရာ မြန်မာနိုင်ငံ ကြက်ခြေနီ အသင်း ဥက္ကဌပါမောက္ခဒေါက်တာဒေါ်မြသူ သွားရောက် အားပေးခဲ့ကြောင်း သတင်းရရှိပါသည်။ Credit; ဇော်မိုးအောင် (Supporting Officer Yangon Region)

လားရှိုး၊ ဖေဖော်ဝါရီ ၂၀၁၈ ခုနှစ် ဖေဖော်ဝါရီလ ၂၁ ရက်နေ့ မွန်းလွဲ ၄း၄၅ မီနစ်အချိန်ခန့်တွင် ရှမ်းပြည်နယ်မြောက်ပိုင်း၊ လားရှိုးမြို့နယ်၊ ၂ ရပ်ကွက်ရှိ ဧရာဝတီဘဏ်၊ ရိုးမဘဏ်၊ ပြည်သူကျန်းမာရေးဦးစီးဌာနနှင့် သူနာပြုသင်တန်းကျောင်းအနီးတွင် ပြင်းထန်သည့် ဗုံးပေါက်ကွဲမှုတစ်ခု ဖြစ်ပွားခဲ့သည်။ အဆိုပါ ဗုံးပေါက်ကွဲမှုကြောင့် ဘဏ်အဆောက်အဦး ၂ ခု၊ သူနာပြုသင်တန်းကျောင်း၊ ပြည်နယ်ကျန်းမာရေးဦးစီးဌာနမှူးရုံးတို ထိ့ခိုက် ပျက်စီးခဲ့ပြီး မြန်မာနိုင်ငံကြက်ခြေနီအသင်း ပြည်နယ်ကြက်ခြေနီသူနာပြုတပ်ဖွဲ့မှ ဦးထွန်းထွန်းဦး ဦးစီးပြီး ကြက်ခြေနီသူနာပြုတပ်ဖွဲ့ဝင် (၇)ဦးမှ အခင်းဖြစ်ပွားရာသို့ သွားရောက်ပြီး ဒါဏ်ရာရ ရှိသူများအား ရှေးဦးပြုစုပေးခဲ့ပြီး လားရှိုးဆေးရုံသို့ပြီး အရေးပေါ်ကယ်ဆယ်ရေးလုပ်ငန်းများ သွားရောက် လုပ်ဆောင်ခဲ့ပါသည်။ ထိုဗုံးပေါက်ကွဲမှုကြောင့် ထိခိုက်ဒဏ်ရာရသူ၂၃ ဦးရှိကြောင်း သိရှိရပါသည်။  Credit: သန္တာမိုး (Supporting Officer)

နေပြည်တော်၊ ဖေဖော်ဝါရီ ၂၀၁၈ ခုနှစ် ဖေဖော်ဝါရီလ ၂၁ ရက်နေ့ နံနက် ၁၀ နာရီအချိန်တွင် မြန်မာနိုင်ငံကြက်ခြေနီအသင်း၊ ဗဟိုအလုပ်အမှုဆောင်အဖွဲ့ဝင်များက ပြည်တော်စုသမ္မတမြန်မာနိုင်ငံတော်သမ္မတ၊ မြန်မာနိုင်ငံ ကြက်ခြေနီအသင်း နာယက၊ နိုင်ငံတော်သမ္မတ ဦးထင်ကျော်အား သမ္မတအိမ်တော်တွင် တွေ့ဆုံဂါရဝပြု လမ်းညွှန်ချက် ခံယူခဲ့ကြပါသည်။ တွေ့ဆုံပွဲတွင် ပြည်တော်စုသမ္မတမြန်မာနိုင်ငံတော်သမ္မတ၊ မြန်မာနိုင်ငံကြက်ခြေနီအသင်း နာယက နိုင်ငံတော်သမ္မတ ဦးထင်ကျော်၊ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေး၊ နိုင်ငံတော်သမ္မတရုံးဝန်ကြီးဌာန ဒု-ဝန်ကြီး ဦးမင်းသူ၊ နိုင်ငံတော်သမ္မတရုံးဝန်ကြီးဌာန အမြဲတမ်းအတွင်းဝန် ဦးခင်လတ်နှင့် တာဝန်ရှိသူများ၊ မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာဒေါ်မြသူ၊ အထွေထွေအတွင်းရေးမှူး ဦးခင်မောင်လှ၊ အချိန်ပြည့်အလုပ်အမှုဆောင် ဦးကင်ဘွိုင်း၊ အချိန်ပြည့်အလုပ်အမှုဆောင် ဒေါက်တာဒေါ်အမယာမော်နိုင်၊ အချိန်ပိုင်းအလုပ်အမှုဆောင် ဦးမောင်မောင်ခင်၊ အချိန်ပိုင်းအလုပ်အမှုဆောင် ဦးပေါ်မြင့်ဦး၊ အချိန်ပိုင်းအလုပ်အမှုဆောင် ဦးဂဲနက်စ်၊ အချိန်ပိုင်းအလုပ်အမှုဆောင် ဦးမျိုးမင်းနောင်၊ အချိန်ပိုင်းအလုပ်အမှုဆောင် ဦးဝေဠုကျော်နှင့် တာဝန်ရှိသူများ တက်ရောက် ဂါရဝပြုခဲ့ကြပါသည်။ အဆိုပါတွေ့ဆုံပွဲတွင် နိုင်ငံတော်သမ္မတ ဦးထင်ကျော်မှ မြန်မာနိုင်ငံကြက်ခြေနီအသင်း၏ နာယကအဖြစ် ပထမဆုံးအကြီမ်တွေ့ဆုံတာဖြစ်သည့်အတွက် ဝမ်းမြောက်ကြောင်း၊ အသင်းသည် လူမှုကရုဏာလုပ် ငန်းများကို စေတနာအရင်းခံကာ လူသားချင်းစာနာပြီး ဘက်မလိုက်ဘဲ ကြားနေကာ ဦးစီးဦးဆောင်ပြုနေသည့် အသင်းဖြစ်ကြောင်း၊ ကြက်ခြေနီသူနာပြု တပ်ဖွဲ့ဝင်များနှင့် စေတနာလုပ်အားရှင်းများကို နိုင်ငံတော်ကိုယ်စား သမ္မတအနေဖြင့် ကျေးဇူးတင်ရှိပါကြောင်း၊ အသင်းအနေဖြင့် လူမှုကရုဏာလုပ်ငန်းများ ဆောင်ရွက်ရာတွင် သက်ဆိုင်ရာဝန်ကြီးဌာနများကို လိုအပ်သည်များရှိကပါ ဆက်သွယ် အကူအညီတောင်းခံနိုင်ကြောင်း၊ ရှေ့လျောက်တွင်လည်း မြန်မာနိုင်ငံကြက်ခြေနီအသင်းနှင့်အတူ အဆက်မသွယ်မပျက် ထိတွေ့ နှီးနှောမှု ရှိစေချင်ကြောင်း စသည့်ဖြင့် လမ်းညွှန်ချက်များ ပေးအပ်ခဲ့ပါသည်။ မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာဒေါ်မြသူက အသင်း၏အကောင်အထည်ဖော် ဆောင်ရွက်နေသည့် လုပ်ငန်းအစီအစဉ်များကို ပြန်လည်တင်ပြခဲ့ရာ- အသင်းသည် ကချင်ပြည်နယ်၊ ရခိုင်ပြည်နယ်နှင့် ရှမ်းပြည်နယ်စသည့် ပဋိပက္ခဖြစ်ပွားနေသော နေရာ ဒေသများအပြင် သဘာဝဘေးအန္တရာယ် ကျရောက်သော ဒေသများတွင် ကူညီကယ်ဆယ်ရေးလုပ်ငန်းများကို ဆောင်ရွက်လျက်ရှိကြောင်း၊ အသင်းအနေဖြင့် လူထုအခြေပြုဘေးဒဏ်ကြံ့ကြံ့ခံနိုင်စွမ်းမြှင့်တင်ရေး၊ ဘေးအန္တရာယ်များ တုံ့ပြန်နိုင်ရန် ပြင်ဆင်ရေးနှင့် ကူညီကယ်ဆယ်ရေး စီမံချက်ပေါင်း (၅၀) ကျော်ကို ကြက်ခြေနီလှုပ်ရှားမှုနှင့် စီးပွားရေးအဖွဲ့အစည်းများမှ ပံ့ပိုးသော ပျှမ်းမျှအလှူငွေ သန်း (၁၄၅၀၀) ကျပ် (သို့မဟုတ်) အမေရိကန်ဒေါ်လာ (၁၁) သန်းဖြင့် လုပ်ငန်းများ ဆောင်ရွက်လျက်ရှိပါကြောင်း၊ အသင်းသည် ၂၀၁၇ခုနှစ်တွင် သန်း(၁၉၀၀၀)အား အကူအညီလိုအပ်နေသူု (၅)သိန်းကျော်ခန့်ထံသို့ ပေးအပ်နိုင်ခဲ့ကြောင်း၊ အသင်းတွင် ဝန်ထမ်း (၆၀၀)ကျော်နှင့် စေတနာ့လုပ်အားရှင် (၄၀၀၀၀)ကျော်တို့မှ လှုမှုကရုဏာလုပ်ငန်းအား ဆောင်ရွက်လျက်ရှိပြီး အသင်း၏ရန်ပုံငွေဖြင့် ဝန်ထမ်း (၆၀)ကျော်အားခန့်ထားပေးလျက်ရှိပါကြောင်း စသည့်ဖြင့်တင်ပြခဲ့ပါသည်။ နိုင်ငံတော်သမ္မတမှ တင်ပြချက်များအပေါ် ပြန်လည် လမ်းညွှန် သြဝါဒပေးခဲ့ပြီး၊ မြန်မာနိုင်ငံကြက်ခြေနီ အသင်းအား နိုင်ငံတော်မှ အလှူငွေကျပ် သိန်း (၅၀) ကျပ်တိတိနှင့် သမ္မတမှ လှူဒါန်းငွေ ၁၀၀,၀၀ဝိ/ ကျပ်တိတိအား ပေးအပ် လှူဒါန်းခဲ့ပါသည်။ မြန်မာနိုင်ငံကြက်ခြေနီအသင်း ဥက္ကဌမှ နိုင်ငံတော်သမ္မတအား လက်ဆောင်ပစွည်း ပြန်လည် ပေးအပ်ခဲ့ပါသည်။ ထိုနောက် စုပေါင်းမှတ်တမ်းတင် ဓါတ်ပုံရိုက်ကူးခဲ့ကြပြီး ဂါရဝပြုတွေ့ဆုံခြင်း အခမ်းအနားကို အောင်မြင်စွာ ကျင်းပပြီးစီးခဲ့ပါသည်။

အသက် ၅၆ နှစ်ရှိပြီးဖြစ်သော ဒေါ်တိုးမစိန်သည် ရခိုင်ပြည်နယ်၊ စစ်တွေမြို့မြောက်ပိုင်း ကီလိုမီတာ အနည်းငယ် ကွာဝေးသည့် ကျောက်တံချေရွာလေးက ရက်ကန်းရက်သူတစ်ဦးဖြစ်သည်။ ၂၀၁၆ ခုနှစ်တွင် မြန်မာနိုင်ငံကြက်ခြေနီအသင်းက ဆောင်ရွက်နေသည့် ရခိုင်ပြည်နယ်အတွင်း ရေဘေး၊ အကြမ်းဖက်မှုတို့ကြောင့် ထိခိုက်ခံစားရသူများကို အကူအညီပေးနေသည့် စီမံကိန်း၏ တစ်စိတ်တစ်ပိုင်းဖြစ်သည့် အသက်မွေးဝမ်းကြောင်း အတွက် ငွေကြေး ထောက်ပံ့ခြင်းကို လက်ခံရရှိသူ ၆၇၀ ဦးအနက် တစ်ဦးဖြစ်ခဲ့သည်။ တစ်နှစ်အကြာတွင်တော့ သူမရဲ့ ရင်းနှီးမြှပ်နှံမှုက အကျိုးခံစားရပါပြီ။ "ငွေကြေးပံ့ပိုးမှုမရခင်က ကျွန်မရဲ့ဝင်ငွေက အရမ်းနည်းခဲ့ပြီး စားဖို့တောင် မလောက်ခဲ့ပါဘူး။ တနေ့ထမင်းနှစ်နပ်တော့ နပ်မှန်ပေမယ့် အသားဟင်းမစားနိုင်ခဲ့ပါဘူး။" "ကျွန်မအမျိုးသားက လွန်ခဲ့တဲ့ နှစ် ၂၀ လောက်ကတည်းက ဆုံးပါးသွားခဲ့ပြီး သားသမီး ခြောက်ယောက်ကျန်ခဲ့ ပါတယ်။ အခု ငါးယောက်က အဝေးကိုရောက်နေပြီး သူတို့ဆီကနေပြီး လုံလောက်တဲ့အထောက်အပံ့လဲမရပါဘူး။" "ကြက်ခြေနီက ငွေကြေးထောက်ပံ့ဖို့စီစဉ်နေတယ်ဆိုတာကြားရတော့ ကျွှန်မရဲ့ရက်ကန်းလုပ်ငန်းမှာ အရင်းအနှီး ထပ်ထည့်ချင်တဲ့ အတွက် ကျွန်မမိတ်ဆွေကို ဘယ်လိုလျှောက်လို့ ရလဲ မေးခဲ့ပါတယ်။ ကျွန်မ မြန်မာကျပ်ငွေ တစ်သိန်းကိုးသောင်းငါးထောင်ကျပ် (အမေရိကန်ဒေါ်လာ ၂၀၀ ခန့်) လက်ခံရရှိခဲ့ပြီး အဲ့ဒီငွေနဲ့ ရက်ကန်းလုပ်ငန်း အတွက် လိုအပ်တဲ့ ပစွည်းတွေနဲ့ ချည်မျှင်တွေဝယ်ခဲ့ပါတယ်။ ထောက်ပံ့ငွေမရခင်က ချည်ထည်သေးသေးလေးတွေဘဲ ရက်လုပ်နိုင်ပြီး ရောင်းရင်လဲ တစ်ထည်ကို သုံးထောင့်ငါးရာလောက်ပဲ ရတယ်။ အမြတ်လဲသိပ်မကျန်ဘူး။ အခုဆိုရင် ကြက်ခြေနီကထောက်ပံ့ပေးတဲ့ ငွေနဲ့ ဝယ်ထားတဲ့ပစွည်းအသစ်တွေကြောင့် လုံခြည်တွေပါ ရက်လုပ်နိုင်ခဲ့ပါတယ်။ ဈေးက လုံခြည်တစ်ထည်ကို တစ်သောင်းခွဲ (ဒေါ်လာ၁၀ ဝန်းကျင်) ခန့်ရပါတယ်။ ဒါ့ကြောင့် ငွေပိုပြီးရှာနိုင်လာပါတယ်။ ကြက်ခြေနီက ကျွှန်မဘဝကိုပြောင်းလဲစေခဲ့ပါတယ်။ အရင်က အရမ်းလှုပ်ရှားရုန်းကန်ခဲ့ရပြီး အခုတော့လိုအပ်ရင် သုံးဖို့ လစဉ် အပိုငွေ နည်းနည်း စုနိုင်လာပါပြီ။ လွန်ခဲ့တဲ့လအနည်းငယ်က ကျွန်မနေမကောင်းဖြစ်ပြီး ဆေးရုံတက်ခဲ့ရပြီး စုထားတဲ့ ပိုက်ဆံ သုံးသိန်း (ဒေါ်လာ ၃၀၀ ခန့်) ကို ဆေးရုံ စရိတ်အဖြစ် အသုံးပြု နိုင်ခဲ့တယ်။ တကယ်လို့များ စုထားတဲ့ငွေမရှိလို့ ဆေးရုံမသွားနိုင်ရင် အခုအချိန်မှာ ဘာဖြစ်နေမလဲ ကျွှန်မ မပြောနိုင်ဘူးလေ။ အခုလဲ ငွေထပ်စုဖို့ ကြိုးစားနေတယ်။ အခုတော့ စားချင်တာလေးတွေကို စားနိုင်၊ သောက်နိုင်လာပြီး ဘဝက သာယာလာပါပြီ။

အသက် ၂၆ နှစ်ရှိပြီဖြစ်သော ဒေါက်တာကျော်ဖြိုးဟိန်းသည် ရခိုင်ပြည်နယ်၊ စစ်တွေမြို့နှင့် အနီးအနားရှိ ကျေးရွာများတွင် ဆောင်ရွက်လျက် ရှိသော မြန်မာနိုင်ငံကြက်ခြေနီအသင်း ရွေ့လျားကျန်းမာရေး ဆေးပေးခန်းတွင် ပါဝင် ဆောင်ရွက်နေသည်မှာ သုံးနှစ်ခန့်တိုင်ခဲ့ပြီဖြစ်သည်။ အန္တရာယ်ကျရောက်လွယ်သော ကျေးလက်နေပြည်သူများထံသို့ တစ်ပတ်တစ်ခါသွားရောက်ဆေးကုသပေးနေသော ဆေးပေး ခန်းများသည် ရခိုင်ပြည်နယ်အတွင်းရှိ အကြမ်းဖက်မှု၊ ရေကြီးခြင်းတို့ကြောင့် ထိခိုက်ခံစားနေရသူများကို ကူညီပေးနေသည့် ကြက်ခြေနီစီမံကိန်း၏ တစ်စိတ်တစ်ဒေသဖြစ်သည်။ “ရွေ့လျားကျန်းမာရေးအဖွဲ့တစ်ဖွဲ့စီမှာ ဆရာဝန်တစ်ယောက်၊ သူနာပြုနှစ်ယောက်နဲ့ စေတနာလုပ်အားရှင် နှစ်ယောက်တို့က လူနာတွေကို ကြည့်ရှုကုသပေးနေပါတယ်။ အဖွဲ့တစ်ဖွဲ့စီက ကျေးရွာ ငါးရွာကနေ ဆယ်ရွာအထိ တာဝန်ယူပြီး ကျေးလက် ကျန်းမာရေးဆရာမတွေနဲ့ ပူးပေါင်းပြီး ကျန်းမာရေးစောင့်ရှောက်မှုပေးနေပါတယ်။” “ ကျွန်တော်တို့အနေနဲ့ နေရာတစ်ခုကို အနည်းဆုံးတစ်ပတ်တစ်ကြိမ်သွားပါတယ်။ ဒေသခံတွေနဲ့ တွေ့ဆုံပြီး ကျွန်တော်တို့က ဘယ်သူ ဘယ်ဝါတွေဖြစ်တယ်ဆိုတာပြောပြီး သူတို့နဲ့ ဆက်ဆံရေးကောင်းမွန်အောင် လုပ်ပါတယ်။ ဒါမှလဲ ကျွန်တော်တို့က သူတို့ရဲ့ ကျန်းမာရေးပိုမိုကောင်းမွန်လာအောင်နဲ့ ရေရှည်မှာသူတို့အနေနဲ့ ဘယ်လိုဆက်လက်လုပ်ဆောင်သွားနိုင်မလဲဆိုတာ သိနိုင်မှာပါ။” “အများအားဖြင့်တွေ့ရတဲ့ရောဂါတွေက ဝမ်းပျက်ဝမ်းလျှောနဲ့ အသက်ရှုလမ်းကြောင်းဆိုင်ရာရောဂါတွေဖြစ်ပြီး တချို့လဲ အရေးပြားပြသ၁နာလို ကူးစက်ရောဂါနဲ့ သွေးတိုး၊ ဆီးချိုရောဂါလို နာတာရှည်ရောဂါဖြစ်ပွားနေတာ တွေ့ရပါတယ်။” “ ဆေးခန်းလာပြသူအများစုက အသက်ကြီးပိုင်းတွေဖြစ်ပြီး ကျန်းမာရေးမကောင်းတဲ့သူတွေ များပါတယ်။” “အများစုတွေ့ရတာကတော့ အအေးမိတာတို့ တုပ်ကွေးဖြစ်တာတို့လို ရာသီဖျားတွေများပါတယ်။ ကုသရေးပိုင်းမှာတော့ ဆေးတွေပေးပါတယ်။ ဒါ့အပြင် တစ်ကိုယ်ရည်ကျန်းမာရေးအသိပညာပေးခြင်းတွေ ဥပမာ- ဘယ်လိုအစားအစာမျိုးကို စားရ မယ်၊ ကျန်းမာအောင်ဘယ်လိုနေထိုင်ရမယ်၊ ဆေးကို ဘယ်လိုသောက်ရမယ်ဆိုတာကိုပါ တစ်ဦးချင်း သေချာရှင်းပြပါတယ်။” “တစ်ရက်ကို လူနာ ၅၀ ဦးလောက်ကြည့်ပေးရပါတယ်။ တကယ်လို့ လူနာက ဆေးကုသမှုထပ်မံလိုအပ်လာရင် ဆေးရုံကို ညွှန်းပို့ပေးပါတယ်။” “ကျွန်တော်တို့အနေနဲ့ အစိုးရကျန်းမာရေးဌာနနဲ့ အနီးကပ်ပူးပေါင်းဆောင်ရွက်ပါတယ်။ အစိုးရကဦးဆောင်တဲ့ ကျန်းမာရေး လုပ်ငန်းတွေမှာလဲ ပူးပေါင်းပါဝင်ပေးပါတယ်။ ဥပမာ- ၂၀၁၅ ခုနှစ်ကလုပ်တဲ့ ပိုလီယိုဆေးတိုက်ကျွေးရေးလှုပ်ရှားမှုတွေမှာ ပါဝင်ခဲ့ပြီး ကျန်းမာရေးဌာနအနေနဲ့ ကျယ်ကျယ်ပြန့်ပြန့် တုံ့ပြန်ဆောင်ရွက်ဖို့ လိုလာနိုင်တဲ့ ပြသ၁နာတွေ ကြုံတွေ့ရရင်လဲ ကျန်းမာရေးဌာနကို သတင်းပေးပို့ပေးပါတယ်။” “ဘေးဒုက္ခကျရောက်နေချိန်တွေမှာတော့ အရေးပေါ် ကျန်းမာရေးအဖွဲ့ကို စေလွှတ်ပြီး လူနာတွေကို ကုသပေးသလို စိတ်ပိုင်း ဆိုင်ရာ အားပေးကူညီမှုတွေကိုလဲ ဆောင်ရွက်ပေးပါတယ်။” “ကျွန်တော်အနေနဲ့ ဒီအဖွဲ့မှာ ပါဝင်လာတာ အခုဆို သုံးနှစ်နီးပါးရှိပြီး ရေကြီးတာ နှစ်ခါ ကြုံခဲ့ရပြီးပြီ။ “ကျွန်တော်တို့ကို ရေဘေးသင့်ဒေသတွေကို သွားရောက်ပြီး အစိုးရနဲ့ ပူးပေါင်းကာ အကူအညီလိုအပ်နေသူတွေကို ကူညီပေးခဲ့ ပါတယ်။ လူနာတွေကို ဆေးကုသပေးသလို အစိုးရကိုလဲ ဒီဒေသမှာ ဘယ်လိုအခြေအနေရှိနေသလဲ၊ ဆုံးရှုံးပျက်စီးမှု အခြေ အနေနဲ့ ဘာတွေလိုအပ်နေတယ်ဆိုတာကို အစီရင်ခံတင်ပြပေးပါတယ်။” “ရခိုင်ပြည်နယ်မြောက်ပိုင်းက အဖြစ်အပျက်တွေက ကျွန်တော်တို့အပေါ်လဲ အကျိုးသက်ရောက်မှုရှိပါတယ်။ အကြမ်းဖက်မှု တွေဖြစ်ပွားချိန်မှာတော့ ကျွန်တော်တို့ဝန်ထမ်းတွေနဲ့ စေတနာလုပ်အားရှင်တွေရဲ့ ဘေးကင်းလုံခြုံရေးအတွက် စီမံကိန်းတွေကို ခေတ္တခဏ ရပ်နားထားခဲ့ရပါတယ်။ ဒါပေမယ့် ဒီဒေသမှာ ကျွန်တော်တို့ဟာ လတ်တလောဖြစ်ပွားခဲ့တဲ့ အကြမ်းဖက်မှုကြောင့် ထိခိုက်ခံစားရတဲ့ ပြည်သူတွေကိုသာ ကူညီပေးနေတာ မဟုတ်ပါဘူး။ “ယုံကြည်လက်ခံမှုဟာ ကျွန်တော်တို့အတွက် တကယ်ကို အရေးပါတဲ့အချက်ပါ။ ကျွန်တော်တို့ရဲ့ လုပ်ဆောင်ချက်တွေကို လက်ခံတယ်။ ကျွန်တော်တို့ဟာ အခြေခံမူများအတိုင်း တသွေမတိမ်း လုပ်ငန်းတွေဆောင်ရွက်တယ်။ လိုအပ်ချက်ပေါ်မှာသာ တည်မှီပြီး အကူအညီတွေ ပံ့ပိုးပေးနေပါတယ်။ ဒါ့ကြောင့် ရခိုင်ဒေသမှာ ရှိတဲ့သူတွေကို ကျွန်တော်တို့ရဲ့ ဆက်လက်ဆောင်ရွက် မယ့် စီမံကိန်းတွေနဲ့ အရေးပေါ်တုံ့ပြန်ဆောင်ရွက်ရေးတွေမှာ သူတို့ရဲ့ လိုအပ်ချက်တွေကို ဆက်လက် ကူညီပံ့ပိုးသွားမယ်ဆိုတာ ပြသဖို့ အရမ်းအရေးကြီးပါတယ်။” “ရခိုင်ပြည်နယ်မှာတော့ ဆင်းရဲမွဲတေမှု၊ အကြမ်းဖက်မှု၊ တင်းမာမှုတွေ၊ ဆိုင်ကလုန်း၊ မြေပြိုမှုနဲ့ ရေဘေးတွေဖြစ်ပွားနေပြီး တချို့ဒေသတွေမှာ လူသားချင်းစာနာထောက်ထားရေးအဖွဲ့တွေရဲ့ လုပ်ငန်းတွေကို လက်ခံမှုအတိုင်းအတာနည်းနေတာ တွေ့ရပြီး ဒါက လုပ်ငန်းဆောင်ရွက်မှုအတွက် စိန်ခေါ်မှုတစ်ရပ်ဖြစ်နေပါတယ်။”

စစ်တွေမြို့၊ ဖေဖော်ဝါရီလ ၂၀၁၈ ခုနှစ်၊ ဖေဖော်ဝါရီလ ၁၅ ရက်နေ့ နံနက် ၇ နာရီအချိန်တွင် ရခိုင်ပြည်နယ်၊ စစ်တွေမြို့ရှိ ဦးဥတ္တမခန်းမ၌ ထိုင်းနိုင်ငံကြက်ခြေနီ အသင်းမှ ရခိုင်ပြည်နယ် ဘေးအန္တရာယ်စီမံခန့်ခွဲရေးဌာနသို့ မိသားစုသုံးပစ္စည်း (Family Kit) ပေးအပ်လှူဒါန်းပွဲကို ကျင်းပပြုလုပ် ခဲ့ပါသည်။ အခမ်းအနားသို့ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ပြည်ထောင်စုဝန်ကြီး ဒေါက်တာ ဦးဝင်းမြတ်အေးနှင့် တာဝန်ရှိသူများ၊ ရခိုင်ပြည်နယ် ဝန်ကြီးချုပ် ဦးညီပုနှင့် တာဝန်ရှိသူများ၊ မြန်မာနိုင်ငံံ ကြက်ခြေနီအသင်း၊ အချိန်ပြည့်အမှုဆောင် ဒေါက်တာဒေါ်အမယာမော်နိုင်၊ ထိုင်းကြက်ခြေနီ အသင်းမှ Assistant Secretary General Mr. Tej Bunnag ဦးဆောင်သော ကိုယ်စားလှယ်များ၊ အပြည်ပြည်ဆိုင်ရာ ကြက်ခြေနီကော်မတီ (အိုင်စီအာစီ)နှင့် အပြည်ပြည်ဆိုင်ရာ ကြက်ခြေနီနှင့် လခြမ်းနီအသင်းများ ဖက်ဒရေးရှင်းမှ ကိုယ်စားလှယ်များ၊ ရခိုင်ပြည်နယ် ကြက်ခြေနီကြီးကြပ်မှုကော်မတီဥက္ကဌ ဦးကိုလေးနှင့် ကော်မတီဝင်များ၊ ကြက်ခြေနီစေတနာ လုပ်အားရှင်များ၊ မြို့မိ၊ မြို့ဖများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြပါသည်။ အခမ်းအနားတွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာဦးဝင်းမြတ်အေးက အဖွင့်အမှာစကားပြောကြားခဲ့ပြီး ရခိုင်ပြည်နယ်ဝန်ကြီးချုပ် ဦးညီပုက အမှာစကား ပြောကြားခဲ့ပါသည်။ ထို့နောက် မြန်မာနိုင်ငံကြက်ခြေနီအသင်း၊ အချိန်ပြည့်အမှုဆောင် ဒေါက်တာဒေါ်အမယာ မော်နိုင်က နှုတ်ခွန်းဆက်အမှာစကား ပြောကြားခဲ့ကာ ထိုင်းကြက်ခြေနီအသင်းမှ Assistant Secretary General Mr. Tej Bunnag က မိသားစုသုံးပစ္စည်းများလှူဒါန်းရသည့် အကြောင်းနှင့် ပတ်သက်၍ ရှင်းလင်းပြောကြားခဲ့ပါသည်။

ရန်ကုန်၊ ဖေဖော်ဝါရီ ၂၀၁၈ ခုနှစ် ဖေဖော်ဝါရီလ ၃ ရက်နေ့တွင် ကိုရီးယား ကြက်ခြေနီအသင်းမှ ကြက်ခြေနီလူငယ်များနှင့် အုပ်ချုပ်သူများသည် မြန်မာနိုင်ငံကြက်ခြေနီအသင်းနှင့် အတူ သန်လျင်မြို့ အလယ်ရွာ အခြေခံပညာ မူလတန်း လွန်ကျောင်းတွင် ကြက်ခြေနီလူမှုကရုဏာလုပ်ငန်းများ ဆောင်ရွက်ခြင်း အခမ်းအနားကို ကျင်းပခဲ့ပါသည်။ အခမ်းအနားတွင် ပညာရေးဝန်ကြီးဌာန အခြေခံပညာဦးစီးဌာန မြို့နယ် ပညာရေးမှူး ဦးသက်စိန်၊ လက်ထောက်ပညာရေးမှူး ဦးကြည်ဦး၊ မြန်မာနိုင်ငံ ကြက်ခြေနီအသင်းမှ ဒုတိယ ညွှန်ကြားရေးမှူး နှင့် တာဝန်ရှိသူများ၊ ရန်ကုန်တောင်ပိုင်းခရိုင်ကြက်ခြေနီ ကြီးကြပ်မှုကော်မတီ ဥက္ကဌ ဦးကျော်မိုးကြည်၊အလယ်ရွာ အခြေခံမူလတန်းလွန်ကျောင်း ကျောင်းအုပ်ဆရာမကြီး ဒေါ်စန္ဒာဝင်းနှင့် တာဝန်ရှိ ဆရာ/ဆရာမများ၊ ကိုရီးယားကြက်ခြေနီအသင်းမှ General Director Mr. Lee Jong-ha ၊ Deputy Head Mr. Jung Chan-yong, Health Teacher Ms. Song Mi Gyoung၊ ရန်ကုန်တောင်ပိုင်းခရိုင် ကြက်ခြေနီစေတနာလုပ်အား ရှင်များနှင့် မြို့နယ်ကြက်ခြေနီစေတနာ လုပ်အားရှင်များ၊ ကိုရီးယားကြက်ခြေနီအသင်းမှ ကြက်ခြေနီလူငယ် စုစုပေါင်း (၄၇) ဦး၊ အလယ်ရွာ အခြေခံပညာမူလတန်း လွန်ကျောင်းမှ ကျောင်းသား/ကျောင်းသူ စုစုပေါင်း (၂၇၅) ဦး တက်ရောက်ခဲ့ပါသည်။

အဆိုပါ အခမ်းအနားတွင် အလယ်ရွာ အခြေခံပညာ မူလတန်းလွန်ကျောင်း ကျောင်းအုပ်ဆရာမကြီး ဒေါ်စန္ဒာဝင်းက ကိုရီးယားကြက်ခြေနီအသင်းမှ ကြက်ခြေနီ လူငယ်များနှင့် အုပ်ချုပ်သူများအား ကြိုဆိုပါကြောင်း၊ ယခုလို ကျောင်းအတွင်း ကျောင်းသူ ကျောင်းသားများနှင့် ရင်းနှီးစွာ အတူတကွ စုပေါင်း လှုပ်ရှားမှုများ ဆောင်ရွက်ခွင့်ရတဲ့အတွက် အထူးကျေးဇူး တင်ရှိပါကြောင်း ကြိုဆိုနှုတ်ခွန်းဆက် စကား ပြောကြားခဲ့ သည်။ ထိုနောက် ကိုရီးယားကြက်ခြေနီအသင်းမှ General Director Mr. Lee Jong-ha မှလည်း ဝမ်းမြောက်ဝမ်းသာ ကြိုဆို လက်ခံတဲ့အတွက် အလယ်ရွာ အခြေခံပညာ မူလတန်းလွန်ကျောင်းမှ ကျောင်းအုပ်ဆရာမကြီးနှင့် တာဝန်ရှိသူများကို အထူးကျေးဇူးတင်ရှိပါကြောင်း ပြောကြားခဲ့ပါသည်။ ထို့အပြင် ကိုရီးယားကြက်ခြေနီအသင်းမှ General Director Mr. Lee Jong-ha နှင့် တာဝန်ရှိသူများသည် သန်လျင်မြို့နယ် ပညာရေးမှူးနှင့် တာဝန်ရှိသူများ၊ ကျောင်းအုပ်ဆရာမကြီးနှင့် ဆရာ/ဆရာမများအား အမှတ်တရ လက်ဆောင်များ ပေးအပ်ခဲ့ပါသည်။ ထို့နောက် ကိုရီးယား ကြက်ခြေနီလူငယ်များသည် တစ်ကိုယ်ရည်သန့်ရှင်းရေးအကြောင်း သရုပ်ပြမှုများ ဆောင်ရွက်ခဲ့ကြပြီး လက်တွေ့ သရုပ်ပြမှုများကို ကျောင်းသူ/ကျောင်းသားများနှင့်အတူ ဆောင်ရွက်ခဲ့ ကြပါသည်။ ဆက်လက်ပြီး ရိုးရာယဉ်ကျေးမှု တေးသရုပ်ဖော် အက အလှများ ကပြ ဖလှယ်ခြင်း၊ Friendship gift box များ ပေးဝေခြင်းများကို ရင်းနှီးချစ်ခင်စွာ အတူစုပေါင်းဆောင်ရွက်ခဲ့ကြပါသည်။ အဆိုပါ ကိုရီးယား ကြက်ခြေနီလူငယ်များသည် အလယ်ရွာ အခြေခံပညာကျောင်းတွင်၂၀၁၈ ခုနှစ် ဖေဖော်ဝါရီလ ၄ ရက်နေ့တွင်လည်း ဆက်လက် လုပ်ဆောင်သွားမည်ဖြစ်ပါသည်။

ရှေးဦးပြုစုခြင်း နည်းပြသင်တန်းဆင်းပွဲ အခမ်းအနား ကျင်းပ = = = ပဲခူး၊ ဇန်နဝါရီ ၂၀၁၈ ခုနှစ် ဇန်နဝါရီလ ၁၈ ရက်နေ့တွင် မြန်မာနိုင်ငံကြက်ခြေနီအသင်း ပဲခူးတိုင်းဒေသကြီး ကြက်ခြေနီကြီးကြပ်မှုကော်မတီ၏ ဦးဆောင်မှုဖြင့် ရှေးဦးပြုစုခြင်း နည်းပြသင်တန်းဆင်းပွဲအခမ်းအနားကို ပဲခူးမြို့ အမှတ် (၁) အခြေခံပညာအထက်တန်းကျောင်း သီရိပညာခန်းမ ကျင်းပခဲ့သည်။ အခမ်းအနားသို့ ပဲခူးတိုင်းဒေသကြီးဝန်ကြီးချုပ် ဦးဝင်းသိန်း၊ မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူ၊ ပဲခူးတိုင်းဒေသကြီးကြက်ခြေနီကြီးကြပ်မှုကော်မတီဥက္ကဌ ဦးငွေရှိန်၊ ၊ရှေးဦးပြုစုခြင်းနှင့် အန္တရာယ်ကင်းရှင်းရေးဌာနမှ ဒုတိယညွှန်ကြားရေးမှူးနှင့် တာဝန်ရှိသူများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြသည်။ ထို့အပြင် အဆိုပါ အခန်းအနားသို့ ပဲခူးတိုင်းဒေသကြီးဝန်ကြီးချုပ် ဦးဝင်းသိန်းမှ သင်တန်းဆင်းကြက်ခြေနီသူနာပြုတပ်ဖွဲ့ဝင်များအား အမှာစကားပြောကြားခဲ့သည်။ ထို့နောက် မြန်မာနိုင်ငံကြက်ခြေနီအသင်း ဥက္ကဌ ပါမောက္ခ ဒေါက်တာ ဒေါ်မြသူမှ အမှာစကား ဆက်လက်ပြောကြားခဲ့ပြီး ပဲခူးတိုင်းဒေသကြီး ကြက်ခြေနီကြီးကြပ်မှုကော်မတီဥက္ကဌ ဦးငွေရှိန်က သင်တန်းသား သင်တန်းသူများကို သင်တန်း အောင်လက်မှတ်များ ပေးအပ်ခဲ့ပါသည်။ ဆက်လက်၍ တိုင်းဒေသကြီး ဝန်ကြီးချုပ် ဦးဝင်းသိန်းနှင့် တာဝန်ရှိသူများက ပထမဆု၊ ဒုတိယဆု၊ တတိယဆု နှင့် စံပြုဆုရရှိသော သင်တန်းသား သင်တန်းသူများအား ဆုမျာပေးအပ်ခဲ့သည်။ အဆိုပါ သင်တန်းတွင် သင်တန်းသား သင်တန်းသူ စုစုပေါင်း ၃၉ ဦး တက်ရောက် သင်ကြားခဲ့ကြောင်း သိရပါသည်။

၂၀၁၈ ခုနှစ် ရိုးမ-ရန်ကုန် အပြည်ပြည်ဆိုင်ရာ မာရသွန်ပြိုင်ပွဲကြီးတွင် ကြက်ခြေနီမှ ပါဝင်ကူညီ = = = ရန်ကုန်၊ ဇန်နဝါရီ ၂၀၁၈ ခုနှစ် ရိုးမ-ရန်ကုန် အပြည်ပြည်ဆိုင်ရာ မာရသွန်ပြိုင်ပွဲကြီးကို ၂၀၁၈ ခုနှစ် ဇန်နဝါရီလ ၂၁ ရက်နေ့ နံနက် ၅ နာရီ မှ နေ့ခင်း ၁၂ နာရီအချိန်ထိ ကျင်းပခဲ့ရာ မြန်မာနိုင်ငံကြက်ခြေနီအသင်း ရန်ကုန်တိုင်းဒေသကြီးကြက်ခြေနီကြီးကြပ်မှုကော်မတီ ဥက္ကဌ ဒေါက်တာ ဒေါ်လှကြင်၊ ခရိုင်ကြက်ခြေနီကြီးကြပ်မှုကော်မတီ ဥက္ကဌနှင့် အဖွဲ့ဝင်များ၊ မြို့နယ်ကြက်ခြေနီအသင်းခွဲမှ စေတနာလုပ်အားရှင်များ စုစုပေါင်း အင်အား ၂၃၀ ဦးဖြင့် ကျန်းမာရေး စောင့်ရှောက်များ လိုက်ပါဆောင်ရွက်ခဲ့ကြသည်။