ရန်ကုန်၊ ဇူလိုင် ၇ မြန်မာနိုင်ငံကြက်ခြေနီအသင်းမှဆောင်ရွက်လျှက်ရှိသော COVID-19 ရောဂါကာကွယ်ရေးလုပ်ငန်းများတွင် အသုံးပြုရန်အတွက် ပြည်တွင်း/ပြည်ပမှအလှူရှင်များ လှူဒါန်းထားသည့် ရောဂါကာကွယ်ရေးပစ္စည်း များအား ပြည်နယ်/တိုင်း ဒေသကြီးရှိ မြို့နယ်ကြက်ခြေနီအသင်းခွဲများသို့ စဥ်ဆက်မပြတ်ဆက်လက်ဖြန့်ဝေပေးပို့လျှက်ရှိပါသည်။ ၂၀၂၀ပြည်နှစ်၊ ဇူလိုင်လ ၄ ရက်နှင့် ၅ ရက်နေ့များတွင် ဦးဝင်းဆန်းဦး Operation Manager (COVID-19 ရောဂါကာကွယ်ရေးနှင့်တုန့်ပြန်ရေး ) နှင့်တာဝန်ရှိသူများသည် အလှူရှင်များလှူဒါန်းထားသည့် COVID-19ရောဂါကာကွယ်ရေးအသုံးအဆောင်ပစ္စည်းများဖြစ်သော ခွဲစိတ်ခန်းသုံးနှာခေါင်းစည်းများ (Surgical Mask) ၊ N 95 Mask၊ မျက်နှာကာ (Face Shield)၊ PPE ၊ လက်သန့်စင်ဆေးရည် (Hand Gel)၊ လက်ကိုင် စကားပြောစက် (Hand Speaker)၊ မျက်မှန် (Goggle)၊ Sprayer၊ Apron အစရှိသည်တို့ကို ပဲခူးတိုင်းဒေသကြီးရှိ သာယာဝတီ၊ အုတ်ဖို၊ မင်းလှ၊ မိုးညို၊ လက်ပံတန်း၊ ကြို့ပင်ကောက်၊ ဇီးကုန်း၊ နတ္တလင်း၊ ပေါင်းတည်၊ သဲကုန်း၊ ရွှေတောင်၊ ပြည်၊ ပန်းတောင်း၊ ပေါက်ခေါင်းမြို့နယ်များမှ ကြက်ခြေနီအသင်းခွဲများသို့ သွားရောက်ပေးပို့ဖြန့်ဝေခဲ့ပါသည်။

၂၀၂၀ပြည့်နှစ်၊ ဇူလိုင်လ ၂ရက်နေ့က ကချင်ပြည်နယ်၊ ဖားကန့်မြို့နယ်၊ ဆိပ်မူကျေးရွာအုပ်စု၊ ဝှေခါးကျေးရွာတွင် ဖြစ်ပွားခဲ့သော မြေစာပုံပြိုကျမှုဖြစ်စဉ်တွင် ရေမဆေးကျောက် ရှာဖွေသူများ ရေလှိုင်း နှင့်အတူ မျောပါပျောက်ဆုံးခဲ့ရာ ၂၀၂၀ ပြည့်နှစ်၊ ဇူလိုင်၃ရက်နံနက် ၉နာရီအချိန်ထိ ရုပ်အလောင်း ၁၆၃ လောင်း နှင့် ထိခိုက်ဒဏ်ရာရရှိသူ ၄၃ ဦး ရှိပြီဖြစ်ကြောင်း သိရပါသည်။

အဆိုပါ ဖြစ်စဉ်တွင် ကချင်ပြည်နယ်ကြက်ခြေနီကြီးကြပ်မှုကော်မတီ၏ ကြီးကြပ်မှုဖြင့် ဖားကန့်မြို့နယ် ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် ၅၅ ဦးတို့က ရှာဖွေကယ်ဆယ်ရေးနှင့် ထိခိုက် ဒဏ်ရာရရှိသူများကို ရှေးဦးပြုစုပြီး ဖားကန့်နှင့် မြစ်ကြီးနားဆေးရုံများသို့ ပို့ဆောင်ခြင်းများကို ဌာနဆိုင်ရာများ၊ လူမှုရေးအဖွဲ့အစည်းများနှင့် အတူ ဆက်လက်ပြီး အနီးကပ်ပူးပေါင်း ဆောင်ရွက်လျက် ရှိသည်။

ရှာဖွေကယ်ဆယ်ရေးဆောင်ရွက်ရာတွင် လက်လုပ်ဖောင်နှင့် လှေများကိုသာ အားထားအသုံးပြုလျက် ရှိပြီး လက်ရှိအချိန်တွင် မိုးရွာသွန်းမှု ရပ်ဆိုင်းနေသော်လည်း နောက်ထပ်ဖြစ်ပေါ်လာနိုင်သည့် မြေပြိုမှု များနှင့် ကမ်းပါးပဲ့ကျမှုများဖြစ်ပေါ်နိုင်သဖြင့် ရှာဖွေကယ်ဆယ်ရေးလုပ်ဆောင်ရာတွင် အထူးဂရုစိုက် ဆောင်ရွက်လျက်ရှိပါသည်။

အသင်းဌာနချုပ်အနေဖြင့်လည်း ထိခိုက်ဒဏ်ရာရရှိသူ ၄၃ ဦးအတွက် အမျိုးသားသုံး တစ်ကိုယ် ရေသန့် ရှင်းရေးသုံးပစ္စည်းများနှင့် အသက်ဆုံးရှုံးခဲ့သည့် မိသားစုဝင်များကို လူမှုကရုဏာအကူအညီများပေးနိုင် ရန် စီစဉ်ဆောင်ရွက်လျက်ရှိပါသည်။

လူမှုကရုဏာလုပ်ငန်းဆိုင်ရာပြန်ကြားဆက်သွယ်ရေးဌာန

မိသားစုအဆက်အသွယ်ရရှိစေရေး အောင်မြင်စွာကူညီဆောင်ရွက်ပေးနိုင်ခဲ့ပြီ

ရန်ကုန်၊ မေ ၂၁ COVID-19 ရောဂါကာကွယ်ရေးလုပ်ငန်းများတွင် အသုံးပြုရန်အတွက် Woodside Myanmar Pte Ltd မှ မြန်မာနိုင်ငံကြက်ခြေနီအသင်းသို့ အလှူငွေ ပေးအပ်လှူဒါန်းပွဲ ကို ၂၀၂၀ပြည့်နှစ်၊ မေလ ၂၁ ရက်နေ့ နေ့လည်နာရီက ရန်ကုန်မြို့ရှိ အသင်းရုံးခွဲတွင်ပြုလုပ်ခဲ့ပါသည်။ ရှေးဦးစွာ Woodside Myanmar Pte Ltd (Acting Country Manager )ဦးနေလင်းဦး ကလှူဒါန်းရခြင်းအကြောင်းကိုရှင်းလင်းပြောကြားပြီး အမေရိကန်ဒေါ်လာ ၃၀,၀၀၀ ကိုလှူဒါန်းရာအသင်းဥက္ကဌ ဒေါက်တာမောင်မောင်မြင့် က လက်ခံရယူပြီး COVID-19 ရောဂါကာကွယ်ရေး လုပ်ငန်းများအတွက် အကျိုးရှိထိရောက်စွာအသုံးပြု သွားမည်ဖြစ်ပါကြောင်းပြောကြားကာ ဂုဏ်ပြုမှတ်တမ်းလွှာ ပြန်လည်ပေးအပ်ခဲ့ပါသည်။ အဆိုပါလှူဒါန်းပွဲသို့ အသင်းဥက္ကဌ ဒေါက်တာမောင်မောင်မြင့်နှင့်အတူ ဒုတိယဥက္ကဌ ဒေါက်တာဒေါ်အမယာမော်နိုင်၊ အချိန်ပြည့်အမှုဆောင်ဒေါ်ကြူကြူဝင်း၊ အထွေထွေအတွင်းရေးမှူးပါမောက္ခဒေါက်တာထင်ဇော်စိုး၊ အရင်းအမြစ်များစုစည်းအသုံးချရေးဌာနမှူး ဒေါ်မေစန္ဒာမျိုးနှင့် တာဝန်ရှိသူများတက်ရောက်ခဲ့ပြီး Woodside Myanmar Pte Ltd မှ Acting Country Manager ဦးနေလင်းဦးနှင့် Acting Finance Manager ဒေါ်စန္ဒာမိုး တို့တက်ရောက်ခဲ့သည်။ လှူဒါန်း‌ငွေများဖြင့် COVID-19 ရောဂါကာကွယ်ရေးလုပ်ငန်းများတွင်အသုံးပြုရန်အတွက် PPE ပစ္စည်များနှင့် အသိပညာပေးလုပ်ငန်းများတွင် အသုံးပြုသွားမည်ဖြစ်ရာ ယခုကဲ့သို့လှူဒါန်းမှုအတွက် မြန်မာနိုင်ငံကြက်ခြေနီအသင်း အနေဖြင့် Woodside Myanmarအားလှိုက်လှဲစွာ ကျေးဇူးတင်ရှိပါသည်။

၂၀၂၀ပြည့်နှစ်၊ မေလ ၈ ရက်နေ့တွင်ကျရောက်သည့် ကမ္ဘာ့ကြက်ခြေနီနေ့ အထိမ်းအမှတ်အခမ်းအနားကို ယနေ့နံနက် ၁၀နာရီက မြန်မာနိုင်ငံကြက်ခြေနီအသင်း (ရန်ကုန်)ရုံးခွဲ၌ Video Conferencing ဖြင့်ပြုလုပ်ခဲ့ရာ မြန်မာနိုင်ငံ ကြက်ခြေနီအသင်းဥက္ကဌဒေါက်တာ မောင်မောင်မြင့် တက်ရောက်မိန့်ခွန်းပြောကြားခဲ့ပါသည်။ အခမ်းအနားသို့အသင်းဥက္ကဌဒေါက်တာမောင်မောင်မြင့်၊ ဒုတိယဥက္ကဌဒေါက်တာဒေါ်အမယာမော်နိုင်နှင့် အချိန်ပြည့်/အချိန်ပိုင်း အလုပ်အမှု ဆောင်များ၊ အထွေထွေအတွင်းရေးမှူး နှင့်ဒုတိယအထွေထွေအတွင်းရေးမှူးများ၊ အပြည်ပြည် ဆိုင်ရာကြက်ခြေနီ ကော်မတီမှမြန်မာနိုင်ငံဆိုင်ရာဌာနေကိုယ်စားလှယ်Mr.Stephan Sakalian နှင့် အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများ ဖက်ဒရေးရှင်းမှ မြန်မာနိုင်ငံဆိုင်ရာ ဌာနေကိုယ်စားလှယ်Mr. Joy Singhal၊ မိတ်ဖက်ကြက်ခြေနီအဖွဲ့အစည်းများမှ တာဝန်ရှိသူများ၊ တိုင်းနှင့်ပြည်နယ် ကြက်ခြေနီကြီးကြပ်မှုကော်မတီဥက္ကဌများ၊ကြက်ခြေနီတပ်ဖွဲ့မှူးများ၊ အသင်းဌာနချုပ်မှ ညွှန်ကြားရေးမှူးများ၊ ဒုတိယညွှန်ကြားရေးမှူးများ၊ဌာနမှူးများနှင့် တာဝန်ရှိသူများ တက်ရောက်ခဲ့ကြပါသည်။ အခမ်းအနားအစီအစဉ်အရ အသင်းဥက္ကဌမှ ကမ္ဘာ့ကြက်ခြေနီနေ့အခမ်းအနားမိန်းခွန်းပြောကြားခဲ့ပြီး အပြည်ပြည်ဆိုင်ရာကြက်ခြေနီကော်မတီ(ICRC)နှင့် အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများဖက်ဒရေး(IFRC)တို့မှ  ဌာနေကိုယ်စားလှယ်များက ​ကမ္ဘာ့ကြက်ခြေနီနေ့ အထိမ်းအမှတ်စကားများပြောကြားခဲ့ကြပါသည်။ ထို့နောက် COVID-19 ရောဂါကာကွယ်ရေးတွင် ပါဝင်ဆောင်ရွက်လျက်ရှိသည့် နိုင်ငံတစ်ဝန်းမှ ကြက်ခြေနီများ၏ လှုပ်ရှားမှုပုံရိပ်မှတ်တမ်းဗီဒီယိုကိုပြသခဲ့ပြီး COVID-19 ရောဂါကာကွယ်ထိန်းချုပ်ရေးတွင် ရှေ့တန်းမှ ပါဝင်ဆောင်ရွက်နေသူများအား အခမ်းအနားသို့ တက်ရောက်လာသူများအားလုံးက လက်ခုပ်တီး ကာအားပေးဂုဏ်ပြုခဲ့ကြပြီး အခမ်းအနားကို အောင်မြင်စွာ ကျင်းပပြုလုပ်နိုင်ခဲ့ပါသည်။

ယနေ့ မေလ(၈)ရက်နေ့ဟာ ကမ္ဘာနိုင်ငံအသီးသီးမှ လှုပ်ရှားဆောင်ရွက်နေကြတဲ့ ကြက်ခြေနီ လခြမ်းနီ အသင်းပေါင်း(၁၉၂)သင်းရဲ့ အထင်ကရ နေ့ထူးနေ့မြတ် တစ်ရက် ဖြစ်တဲ့ ကမ္ဘာ့ကြက်ခြေနီနေ့ပဲဖြစ်ပါတယ်။ အထူးသဖြင့် ဒီကနေ့ဟာ တစ်ကမ္ဘာလုံးက ကြက်ခြေနီ လူမှုကရုဏာကွန်ယက်အတွင်း လှုပ်ရှားဆောင်ရွက်နေကြတဲ့ ကြက်ခြေနီ စေတနာလုပ်အားရှင်များ အားလုံးအတွက် အစဉ်သတိရ အမှတ်ရနေမဲ့ နေ့ရက်လည်း ဖြစ်ပါတယ်။ ဒီလို အချိန်အခါ သမယမှာ မြန်မာနိုင်ငံတစ်ဝန်းက ကြက်ခြေနီအသင်းဝင်များ၊ တပ်ဖွဲ့ ဝင်များ၊ စေတနာလုပ်အားရှင်များ၊ ကြက်ခြေနီရဲ့ ဆောင်ရွက်ချက်တွေကို တဖက် တလမ်းက လူအင်အား၊ ငွေအင်အား၊ နည်းပညာတို့ဖြင့် ဝိုင်းဝန်းကူညီပေးကြတဲ့ အလှုရှင်၊ စေတနာရှင်များ အပါအဝင် နိုင်ငံတစ်ဝန်းလုံးရှိ ပြည်သူအားလုံး ကျန်းမာ ချမ်းသာ ရောဂါကင်းကွာ မင်္ဂလာအပေါင်းနှင့် ပြည့်စုံကြပါစေကြောင်း ဆုမွန်ကောင်း တောင်းအပ်ပါတယ်။ ဒီနှစ်ကတော့ အားလုံးသိကြတဲ့အတိုင်း မကြုံစဖူး ကမ္ဘာ့ကပ်ရောဂါ COVID 19 ကို ရင်ဆိုင် တိုက်ခိုက်နေကြရတဲ့ အချိန်ဖြစ်တဲ့အတွက် ကမ္ဘာသူ ကမ္ဘာသား အားလုံး ကြောက်မက်ဖွယ် အိမ်မက်ဆိုးကြီးကို တွန်းလှန်နေရတဲ့ အချိန်အခါလဲ ဖြစ်နေပါ တယ်။ ဒီလိုအချိန်မှာ ကမ္ဘာတစ်ဝန်းက မိတ်ဖက်ကြက်ခြေနီအသင်းတွေအားလုံးလည်း မိမိတို့နိုင်ငံအတွက် ကြက်ခြေနီရဲ့လူမှုကရုဏာ အကူအညီတွေကိုအကောင်းဆုံးဆောင် ရွက်ပေးနေကြတာကို လူမှုကွန်ယက်စာမျက်နှာတွေပေါ်မှာတွေ့မြင်နေရပါတယ်။ အလားတူ မြန်မာနိုင်ငံမှာလည်း ရာသီဥတုပြောင်းလဲမှုရဲ့ ရိုက်ခတ်တဲ့ ဒဏ်တွေ၊ ပဋိပက္ခနှင့် တိုက်ပွဲများကြောင့် နေရပ်စွန်ခွာခဲ့ကြရတာတွေကို ပြည်သူအများ ထိခိုက် ခံစားနေကြရပြီး ဒီလိုအတိဒုက္ခတွေနဲ့ ကြုံတွေ့တိုင်းမှာ ကျွန်တော်တို့ရဲ့ ကြက်ခြေနီ အသင်းဝင်တွေ၊ တပ်ဖွဲ့ဝင်တွေ၊ စေတနာလုပ်အားရှင်တွေ အနေနဲ့ မိမိတို့ဒေသ အသီး သီးမှာ အတတ်နိုင်ဆုံး ကူညီဆောင်ရွက်ပေး နေကြတဲ့ မြင်ကွင်းတွေဟာဆိုရင် အသင်း ကို ဦးဆောင်နေတဲ့ ခေါင်းဆောင်တစ်ယောက်အနေနဲ့ အလွန်ပဲ ကျေနပ်အားရ ဂုဏ်ယူ မိပါတယ်။ နှစ်စဥ် ဒီနေ့ ဒီအချိန်မှာ ကမ္ဘာ့ကြက်ခြေနီနေ့ အထိမ်းအမှတ်အဖြစ် နိုင်ငံအလိုက် လှုပ်ရှားမှုကို အသွင်အမျိုးမျိုးနဲ့ ကျင်းပပြုလုပ်လေ့ရှိကြသော်လည်း ဒီနှစ်မှာတော့ လူစုလူဝေး မပြုလုပ်နိုင်တဲ့အခြေအနေမှာ အားလုံး ဂရုပြု အလေးထားလိုက်နာဆောင် ရွက်ကြရမှာဖြစ်တဲ့အတွက် မိမိတို့ဒေသအလိုက် အထိမ်းအမှတ်ပြုလုပ်ကြမည်ဆိုပါက သတ်မှတ်ထားတဲ့ စည်းကမ်းချက်များနဲ့အညီ လူဦးရေ အနည်းဆုံးနဲ့ အကျဉ်းချုံးသာ လုပ်ဆောင်ကြဖို့ အထူးမှာကြားလိုပါတယ်။ အများအကျိုး ဆောင်ရွက်ပေးနေကြသော ကြက်ခြေနီများ ဖြစ်ကြတဲ့အတွက် အခြားသူများထက် ပိုမို စည်းကမ်းလိုက်နာပေးကြ ဖို့ အနူးအညွတ် ပြောကြားလိုပါတယ်။ ယခု ၂ဝ၂၀ ပြည့်နှစ်အတွက် ရွေးချယ်ထားတဲ့ ကမ္ဘာ့ကြက်ခြေနီနေ့ ဆောင်ပုဒ်ကတော့ ‘Keep Clapping’ မြန်မာလိုဆိုရင် ‘လက်ခုပ်တီးလို့ ဆက်လက်အားပေး ဂုဏ်ပြု ကြပါစို့’ ဖြစ်ပါတယ်။ ဒီဆောင်ပုဒ်ရဲ့ ရည်ရွယ်ချက်ကတော့ ယနေ့ကမ္ဘာပေါ်မှာ ရင်ဆိုင် ကြုံတွေ့နေရတဲ့ COVID 19 ကိုရိုနာဗိုင်းရပ်စ်ရောဂါ ကာကွယ်ထိန်းချုပ်မှုတွေ ဆောင် ရွက်နေချိန်မှာ ကျွန်တော်တို့အားလုံးအတွက် ရှေ့တန်းကနေ တာဝန်ယူဆောင်ရွက် ပေးနေကြတဲ့ ကျန်းမာရေးဝန်ထမ်းတွေနဲ့ ကူညီပေးနေကြတဲ့ စေတနာလုပ်အားရှင် တွေ အားလုံးကို အားပေးဂုဏ်ပြုလိုတဲ့အတွက် ဒီဆောင်ပုဒ်ကို ရွေးချယ်ခဲ့ကြခြင်းဖြစ် ပါတယ်။ လက်ရှိမှာလည်း နိုင်ငံတိုင်းလိုမှာ အား‌ပေးဂုဏ်ပြု လက်ခုပ်တီးပေးနေကြ တာကို နေ့စဉ် သတင်းတွေမှာ မြင်တွေ့ ကြားသိ နေရပါတယ်။ ယခုလို ကပ်ရောဂါဆိုးကြီးကို ရှေ့တန်းက တိုက်ပွဲဝင်နေကြသူ တစ်ဦးတစ်ယောက် စီ တိုင်းမှာလည်း ခက်ခဲတဲ့အချိန်တွေ ဖြစ်သလို အများအကျိုးအတွက် ကိုယ်ကျိုးမငဲ့ ဆောင်ရွက်ပေးနေသူများ ဖြစ်ကြတဲ့အတွက် ကျွန်တော်တို့အားလုံးက ထိုသူများကို ရည်ညွှန်းပြီး ယနေ့ မေလ(၈)ရက်နေ့ ကမ္ဘာ့ကြက်ခြေနီနေ့မှာ တညီတညွတ်တည်း ပြိုင်တူ ကျယ်လောင်စွာ လက်ခုပ်တီးအားပေးကြဖို့ နှိုးဆော်ချင်ပါတယ်။ COVID 19 ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီဥက္ကဋ္ဌ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က “တစ်ဦးနှင့် တစ်ဦး နွေး ထွေးမှုပေးကာ စေတနာဖြင့် တတ်နိုင်သည့်ဘက်မှ ဆောင်ရွက်ပေးကြစေလိုကြောင်း ဒီလိုဆောင်ရွက်ကြမည်ဆိုပါက လူသားအရင်းအမြစ်မှ အစပြု၍ ရုပ်ပိုင်းဆိုင်ရာ အရင်း အမြစ်အဆုံး အားနည်းသည့် ကာလဖြစ်နေပါစေ အဆိုပါအရာ အားလုံးကို ကျော်လွှား နိုင်မည်ဟုယုံကြည်ပါကြောင်း” တို့ကို COVID 19 အတည်ပြုလူနာနှင့် ရောဂါကူးစက် ခြင်းမှ ပြန်လည်ကောင်းမွန်စပြုလာကြသူများနှင့် တွေ့ဆုံဆွေးနွေးမှုပြုလုပ်ခဲ့သည့် နေ့က ပြောကြားခဲ့သည့်အတိုင်း ကျွန်တော်တို့ရဲ့ ကြက်ခြေနီ အသင်းဝင်၊ တပ်ဖွဲ့ဝင်၊ စေတနာ လုပ်အားရှင်များ အနေနဲ့လည်း COVID 19 ရောဂါ ကာကွယ် ထိန်းချုပ်ရေး လုပ်ငန်းစဉ်တွေမှာ နိုင်ငံတော်ရဲ့ လူမှုကရုဏာ အခန်းကဏ္ဍတစ်ရပ်အဖြစ် ကြိုးစား လုပ်ဆောင်ပေးကြဖို့ မှာကြားလိုပါတယ်။ ကြက်ခြေနီတိုင်းဟာ စေတနာ၊ ဝါသနာကို အရင်းခံကာ လူသားချင်း စာနာတဲ့စိတ်၊ ကရုဏာ မေတ္တာစိတ် အရင်းခံဖြင့် ကြက်ခြေနီအခြေခံမူများအတိုင်း  စည်းကမ်းရှိရှိ ညီညီညွတ်ညွတ် ဆောင်ရွက်ကြရမှာ ဖြစ်သလို အသင်းပုံရိပ်နဲ့ ဂုဏ်သိက္ခာကို ထိခိုက် စေမည့် မှားယွင်းသော သတင်းအချက်အလက်တွေ တွေ့ရှိပါကလည်း မှန်ကန်တဲ့ သတင်းအချက်အလက်များကို ယဥ်ကျေးစွာ ပြန်လည်ဖြန့်ဝေပေးကြဖို့ အထူး လိုအပ် ပါတယ်။ ဒါမှသာ ကြက်ခြေနီ၏ လူမှုကရုဏာဆောင်ရွက်မှုတွေအပေါ် အများပြည်သူ က ပိုမိုယုံကြည် လက်ခံလာမှာ ဖြစ်ပါတယ်။ ယခုလို မင်္ဂလာရှိလှတဲ့ ကမ္ဘာ့ကြက်ခြေနီနေ့ အခါသမယမှာ ကြက်ခြေနီအသင်းဝင်၊ တပ်ဖွဲ့ဝင်၊ စေတနာလုပ်အားရှင်များအားလုံး COVID 19 ရောဂါ ကပ်ဘေးမှ ကင်းဝေး ကာ ကိုယ်စိတ်နှလုံး ချမ်းမြေ့ကြပါစေလို့ ဆန္ဒပြု ဆုမွန်ကောင်းတောင်းရင်း နိုင်ငံတစ် ဝန်းက COVID 19 ရောဂါ ကာကွယ်၊ ထိန်းချုပ်၊ ကုသမှုများကို ဆောင်ရွက်ပေးနေသူ တစ်ဦးတစ်ယောက်တိုင်းအတွက် ကျွန်တော်တို့အားလုံး တစ်ပြိုင်နက်တည်း လက်ခုပ် တီးလို့ ဆက်လက်အားပေးဂုဏ်ပြုကြဖို့ တိုက်တွန်းနှိုးဆော်ရင်း နိဂုံးချုပ်လိုက်ပါတယ်။   ဒေါက်တာမောင်မောင်မြင့်       ဥက္ကဋ္ဌ မြန်မာနိုင်ငံကြက်ခြေနီအသင်း

ရန်ကုန်တိုင်းဒေသကြီးတွင် COVID-19 ရောဂါကာကွယ်ရေး လုပ်ငန်းများကို အရှိန်အဟုန်မြှင့်ဆောင်ရွက်လျှက်ရှိပါသည်။ ထိုသို့ဆောင်ရွက်ရာတွင် မြို့နယ်ကြက်ခြေနီ အသင်းခွဲများမှ ကြက်ခြေနီစေတနာလုပ်အားရှင်များသည် ဌာနဆိုင်ရာများ၊ လူမှုရေးအသင်းအဖွဲ့များနှင့်အတူတက်တက်ကြွကြွ ပူးပေါင်းလုပ်ဆောင်လျှက်ရှိရာ အသင်းဥက္ကဌ ဒေါက်တာမောင်မောင်မြင့်သည် ၂၀၂၀ပြည့်နှစ်၊ ဧပြီလ ၈ ရက်နေ့ နေ့လည်ပိုင်းတွင် သင်္ကန်းကျွန်းမြို့နယ်ရှိ အသွားအလာကန့်သတ်စောင့် ကြည့်ရေးစခန်းတွင် လုပ်အားပေးနေကြသည့် ကြက်ခြေနီစေတနာလုပ်အားရှင်များအား သွားရောက်ကြည့်ရှုအားပေးခဲ့ပါသည်။

COVID-19 ရောဂါကာကွယ်ရေးလုပ်ငန်းများတွင်အသုံးပြုရန် မြန်မာနိုင်ငံကြက်ခြေနီအသင်းသို့ Myanmar Oasis Co.,Ltd(Royal D)မှ ဒါရိုက်တာ ဦးဝေလင်းနှင့် Consultant ဒေါက်တာကျော်လင်းတို့အဖွဲ့က ဧပြီလ ၉ ရက်နေ့၊ နံနက်ပိုင်းက ရန်ကုန်မြို့ရှိ အသင်းရုံးခွဲတွင် စုစုပေါင်း တန်ဖိုးငွေကျပ်(၃,၄၅၀,၀၀၀) တန်ဖိုးရှိ Digital Thermometer (၅)ခု၊ နှာခေါင်းစည်း Surgical Mask (၃၀၀၀)ခု၊ Royal-D (၅၀၀၀)ဗူး တို့အားလာရောက်လှူဒါန်းရာ အသင်းဥက္ကဌဒေါက်တာမောင်မောင်မြင့်၊ ဒုတိယဥက္ကဌဒေါက်တာဒေါ်အမယာမော်နိုင်နှင့် အချိန်ပြည့်အလုပ်အမှုဆောင်ဒေါ်ကြူကြူဝင်းတို့က လက်ခံရယူပြီး ဂုဏ်ပြုမှတ်တမ်းလွှာပြန်လည်ပေးအပ်ခဲ့ပါသည်။

ရန်ကုန်၊ ဧပြီလ ၃ COVID-19 ရောဂါကာကွယ်ရေးလုပ်ငန်းများတွင် အသုံးပြုရန်အတွက် Total E & P Myanmar မှ မြန်မာနိုင်ငံကြက်ခြေနီအသင်းသို့ အလှူငွေ ပေးအပ်လှူဒါန်းပွဲ ကို ၂၀၂၀ပြည့်နှစ်၊ ဧပြီလ ၃ ရက်နေ့ နံနက်(၁၀)နာရီက ရန်ကုန်မြို့ရှိ အသင်းရုံးခွဲတွင်ပြုလုပ်ခဲ့ပါသည်။ ရှေးဦးစွာ Total E & P Myanmar (Yadana Project) General Manager Mr.Romaric Roignan ကလှူဒါန်းရခြင်းအကြောင်းကိုရှင်းလင်းပြောကြားပြီး အမေရိကန်ဒေါ်လာ ၅၀,၀၀၀ ကိုလှူဒါန်းရာအသင်းဥက္ကဌ ဒေါက်တာမောင်မောင်မြင့် က လက်ခံရယူပြီး COVID-19 ရောဂါကာကွယ်ရေး လုပ်ငန်းများအတွက် အကျိုးရှိထိရောက်စွာအသုံးပြုသွားမည်ဖြစ်ပါကြောင်းပြောကြားကာ ဂုဏ်ပြုမှတ်တမ်းလွှာ ပြန်လည်ပေးအပ်ခဲ့ပါသည်။ အဆိုပါလှူဒါန်းပွဲသို့ အသင်းဥက္ကဌ ဒေါက်တာမောင်မောင်မြင့်နှင့်အတူ ဒုတိယဥက္ကဌ ဒေါက်တာဒေါ်အမယာမော်နိုင်၊ အချိန်ပြည့်အချိန်ပိုင်း အမှုဆောင်များဖြစ်ကြသော ဒေါက်တာတင်ညွန်နှင့် ဒေါက်တာထိန်လင်း၊ အရင်းအမြစ်များစုစည်းအသုံးချရေးဌာနမှူး ဒေါ်မေစန္ဒာမျိုး၊ ကျန်းမာရေးဌာန ဒုတိယညွှန်ကြားရေးမှူး ဒေါက်တာနေထက်လင်းတို့တက်ရောက်ခဲ့ပြီး Total E&P Myanmar (Yadana Project)မှ General Manager Mr.Romaric Roignan ၊  CSR Manager ဒေါ်ဆွေဆွေဝင်းနှင့် National Program Coordinator ဉီးခင်မောင်တင့် တို့တက်ရောက်ကြပါသည်။ လှူဒါန်း‌ငွေများဖြင့် COVID-19 ရောဂါကာကွယ်ရေးလုပ်ငန်းများတွင်အသုံးပြုရန်အတွက် PPE ပစ္စည်များနှင့် အသိပညာပေးလုပ်ငန်းများတွင် အသုံးပြုသွားမည်ဖြစ်ရာ ယခုကဲ့သို့လှူဒါန်းမှုအတွက် မြန်မာနိုင်ငံကြက်ခြေနီအသင်း အနေဖြင့် Total E&P Myanmar (Yadana Project)အားလှိုက်လှဲစွာ ကျေးဇူးတင်ရှိပါသည်။