မြန်မာနိုင်ငံကြက်ခြေနီအသင်းသည် ဆိုင်ကလုန်းမုန်တိုင်းမိုခါတိုက်ခတ်မှုကြောင့် ထိခိုက်ခံစားရသည့် ရခိုင်ပြည်နယ်ရှိ ပြည်သူများအတွက် အရေးပေါ်သုံးကယ်ဆယ်ရေးပစ္စည်းများနှင့် သောက်သုံးရေများဖြန့်ဝေပေးခြင်း၊ ပြည်သူလူထု ပဏာမကျန်းမာရေးစောင့်ရှောက်မှုအဖြစ် ရွေ့လျားဆေးခန်းဖြင့် ကျန်းမာရေးစစ်ဆေးပေးခြင်း၊ ကျန်းမာရေးအသိပညာပေးခြင်းတို့ကို ဝန်ထမ်းများနှင့် ကြက်ခြေနီစေတနာလုပ်အားရှင်များက ဆောင်ရွက်လျက်ရှိပါသည်။

မေလ(၁၉)ရက်နေ့က ရွေ့လျားဆေးပေးခန်းဖြင့် ပဏာမကျန်းမာရေးစောင့်ရှောက်မှုအဖြစ် စစ်တွေမြို့နယ်၊ ရေချမ်းပြင် GTC နှင့် ရေချမ်းပြင်ရွာတို့မှ ကျေးရွာသူ/ကျေးရွာသား (၆၀) ဦးအား ကျန်းမာရေးစောင့်ရှောက်ပေးခဲ့ပြီး၊ သန့်လေးသန့်၊ စနစ်တကျလက်ဆေးခြင်းနှင့် ဝမ်းပျက်ဝမ်းလျောရောဂါကာကွယ်ရေးအကြောင်း ကျန်းမာရေးအသိပညာပေးခြင်းများ ပြုလုပ်ခဲ့ပါသည်။

သောက်သုံးရေဖြန့်ဝေပေးရာတွင် စစ်တွေမြို့နယ်၊ ကျေးတောရွာမမှ အိမ်ထောင်စု(၁၂၅)စု အတွက် ရေလီတာ ၅,၀၀၀၊ ကျေးတောပိုက်ဆိပ်ရွာမှ အိမ်ထောင်စု(၇၅)စုအတွက် ရေလီတာ(၃,၀၀၀)၊ ရေချမ်းပြင်GTCမှ အိမ်ထောင်စု(၁၀၀)စုအတွက် ရေလီတာ(၃၀၀၀)၊ ရေချမ်းပြင်ရွာ EPC ရုံးဝန်ထမ်းအိမ်ရာမှ အိမ်ထောင်စု(၆၅)စုအတွက် ရေလီတာ(၂,၅၀၀)၊ ဓညဝတီရပ်ကွက်မှ အိမ်ထောင်စု (၈၀)စုအတွက် ရေလီတာ(၃,၀၀၀)၊ အုန်းတစ်ပင်ရပ်ကွက်ဝါးကျောင်းမှအိမ်ထောင်စု(၆၅)စုအတွက် ရေလီတာ(၂,၅၀၀)၊ လမ်းမတော်တောင်ကရုချောင်းကျောင်းမှ အိမ်ထောင်စု(၃၀)အတွက် ရေလီတာ(၁,၀၀၀)၊ လမ်းမတော်တောင်ကညင်ချောင်းကျောင်းမှ အိမ်ထောင်စု(၃၀)အတွက် ရေလီတာ(၁,၀၀၀)၊ ရွှေကျောင်းအမျိုးသားကျောင်းမှ အိမ်ထောင်စု(၁၅)စုအတွက်ရေလီတာ(၅၀၀)ဖြင့် စုစုပေါင်းသောက်ရေလီ(၂၃,၀၀၀)ကို ဖြန့်ဝေပေးခဲ့ပါသည်။

အလားတူ အရေးပေါ်ကယ်ဆယ်ရေးသုံးပစ္စည်းများဖြန့်ဝေရာတွင် မောင်တောမြို့နယ်၊ ကျောက်ပန္ဒုကျေးရွာရှိ အိမ်ထောင်စု (၁၇)စုကို တစ်ကိုယ်ရည်သန့်ရှင်းရေးသုံးပစ္စည်း (တစ်ပတ်စာ)အိတ်နှင့် မောင်တောမြို့နယ်၊ အင်းဒင်ကျေးရွာမှ အမျိုးသမီး (၃၈)ဦးတို့ကို အမျိုးသမီးတစ်ကိုယ်ရည်သန့်ရှင်းရေးသုံးပစ္စည်းအိတ်များ ဖြန့်ဝေပေးခဲ့ပါသည်။

မြန်မာနိုင်ငံကြက်ခြေနီအသင်းအနေဖြင့် အကူအညီလိုအပ်နေသည့် ယာယီခိုလှုံရာစခန်းများနှင့် ကျေးရွာများမှ ပြည်သူများ‌အတွက် စားနပ်ရိက္ခာများ၊ ရေနှင့် တစ်ကိုယ်ရည်သန့်ရှင်းရေးသုံးပစ္စည်းများ၊ အမိုးအကာများ ထောက်ပံ့နိုင်ရေးနှင့် အရေးပေါ်ငွေသားထောက်ပံ့နိုင်ပေးနိုင်ရေးတို့ကိုလည်း ဆက်လက်ထောက်ပံ့ကူညီနိုင်ရန် ချိတ်ဆက်ဆောင်ရွက်လျက်ရှိပါသည်။

ရန်ကုန်၊ ၂၀၂၃ ခုနှစ်၊ မေလ(၂၀)ရက်။

ဆိုင်ကလုန်းမုန်တိုင်း မိုခါ (MOCHA) တိုက်ခတ်အပြီး မြန်မာနိုင်ငံကြက်ခြေနီအသင်းမှ တုံ့ပြန် ဆောင်ရွက်ရေးလုပ်ငန်းများအတွက် အလှူရှင်များက လှူ‌ဒါန်းလျက်ရှိရာ KING Construction Co.,Ltd မှ အလှူငွေ ကျပ် ၁,၁၈၀,၀၀ဝိ/နှင့် ရေသန့် ကဒ် ၄၀၀ ကို ရန်ကုန်မြို့အမှတ်(၄၂)ကမ်းနားလမ်းရှိ အသင်းရန်ကုန်ရုံးခွဲသို့ မေလ(၁၉)ရက်နေ့တွင် လာရောက် လှူဒါန်းခဲ့ရာ မြန်မာနိုင်ငံကြက်ခြေနီအသင်းဥက္ကဌ ပါမောက္ခဒေါက်တာမျိုးညွန့်က ဂုဏ်ပြုမှတ်တမ်းလွှာ ပေးအပ်

ခဲ့ပါသည်။

အဆိုပါလှူဒါန်းပွဲသို့ အသင်းဥက္ကဌနှင့်အတူ အထွေထွေအတွင်းရေးမှူး ပါမောက္ခဒေါက်တာထင်ဇော်စိုး၊ အရင်း

အမြစ်များစုစည်းအသုံးချရေးဌာန ဌာနမှူး ဒေါ်မေစန္ဒာမျိုးနှင့် KING Construction Co.,Ltd မှ တာဝန်ရှိသူများ တက်ရောက်ခဲ့ကြပါသည်။

ဆိုင်ကလုန်းမုန်တိုင်း မိုခါ (MOCHA) တိုက်ခတ်ခံခဲ့ရသည့် ဒေသများရှိ ပြည်သူများအတွက် လိုအပ်ချက်များကို ဖြည့်ဆည်းကူညီပေးနိုင်ရန် တစ်ဖက်တစ်လမ်းမှ ပါဝင်ပံ့ပိုး ကူညီပေးကြသော အလှူရှင်များအား မြန်မာနိုင်ငံကြက်ခြေနီအသင်းအနေဖြင့် အထူးပင်ကျေးဇူးတင်ရှိပါသည်။

ဆင်ဖြူကျွန်း၊ ၂၀၂၃ခုနှစ်၊ မေလ (၂၀)ရက်။

မကွေးတိုင်းဒေသကြီး ပွင့်ဖြူမြို့နယ်ကြက်ခြေနီအသင်းခွဲမှ မြို့နယ်ကြက်ခြေနီတပ်ဖွဲ့မှူးနှင့် ကြက်ခြေနီစေတနာလုပ်အားရှင်(၂၃)ဦးတို့သည် ဆိုင်ကလုန်းမုန်တိုင်း မိုခါ တိုက်ခတ်မှုနှင့်အတူ ချောင်းရေများ ဝင်ရောက်မှု‌ကြောင့် စလင်းမြို့နယ်၊ ဆင်ဖြူကျွန်းမြို့၊ ကညှပ်ကျေးရွာ ရွာဦးစေတီ ဘုရားဝန်းအတွင်း တင်ကျန်ရစ်သော နူံးမြေများကို မေလ(၂၀)ရက်နေ့တွင် စုပေါင်း သန်ရှင်းရေးပြုလုပ်ပြီး ကူညီခဲ့ကြပါသည်။

ဆင်ဖြူကျွန်းမြို့ကြက်ခြေနီအသင်းခွဲငယ်မှ ကြက်ခြေနီစေတနာလုပ်အားရှင်များက မေလ (၁၇) ရက်နေ့က မကွေးတိုင်းဒေသကြီး၊ ဆင်ဖြူကျွန်းမြို့မှ ပန်းတောကြီး၊ ပန်းတောလေး၊ ရှာတော၊ ညောင်ကုန်းကျေးရွာများသို့ အလှူရှင်များလှူဒါန်းသော ရေသန့်ဘူးကြီး (၁၀၀) ဘူးကို သွားရောက် ကူညီပေးဝေခဲ့ပါသည်။ ထို့အပြင် ကျေးရွာအတွင်း မတော်တဆထိခိုက်ဒါဏ်ရာရသူများအား ရှေးဦးပြုစုပေးခဲ့သည်။

အလားတူ မေလ (၁၈) ရက်နေ့ကလည်း ဆင်ဖြူကျွန်းမြို့၊ စလင်းချောင်းဘေးရှိ ရေလွှမ်းခံရသောနေအိမ်များအား တစ်ကိုယ်ရည်သန့်ရှင်းရေးသုံးပစ္စည်းများနှင့် အလှူရှင်များပေးဝေသော ထမင်းထုပ်များကို သွားရောက်ကူညီပေးဝေခဲ့ပါသည်။

မြန်မာနိုင်ငံကြက်ခြေနီအသင်းသည် ဆိုင်ကလုန်းမုန်တိုင်းမိုခါ တိုက်ခတ်မှုကြောင့် ထိခိုက်ခံစားရသည့် ရခိုင်ပြည်နယ်ရှိ ပြည်သူများအတွက် သောက်သုံးရေရရှိရေးနှင့် ကျန်းမာရေးစောင့်ရှောက်မှုအဖြစ် ရွေ့လျားဆေးခန်းများတွင် ကျန်းမာရေးစစ်ဆေးပေးခြင်းနှင့် ကျန်းမာရေးအသိပညာပေးခြင်းတို့ကို ဝန်ထမ်းများနှင့် ကြက်ခြေနီစေတနာလုပ်အားရှင်များက ဆောင်ရွက်လျက်ရှိပါသည်။

ထိုသို့ဆောင်ရွက်ရာ၌ ၂၀၂၃ ခုနှစ်၊ မေလ (၁၈) ရက်နေ့က စစ်တွေမြို့နယ်တွင် ဖွင့်လှစ်ထားသော ရွေ့လျားဆေးခန်းတွင် သက္ကယ်ပြင်ကျေးရွာမှ လူဦးရေ (၇၈) ဦးကို ကျန်းမာရေးစောင့်ရှောက်မှုပေးခဲ့ပြီး ပြည်သူလူထု (၁၀၆) ဦးအား ဆိုင်ကလုန်းမုန်တိုင်းနောက်ဆက်တွဲဖြစ်တတ်သော ရောဂါများကို ကာကွယ်ရန်အတွက် စနစ်တကျလက်ဆေးခြင်း(သန့်လေးသန့်) နှင့် ဝမ်းပျက်ဝမ်းလျှောရောဂါအကြောင်းတို့ကို ကျန်းမာရေးအသိပညာပေးခဲ့ပါသည်။

ထို့အပြင် သောက်ရေ၊ သုံးရေရရှိရေးအတွက် အဓိဌာန်ဘုန်းတော်ကြီးကျောင်းတွင် ယာယီခိုလှုံလျက်ရှိသော လူဦးရေ (၃၀၀) ကျော်အတွက် သောက်သုံးရေ (၄၅၀၀) လီတာ၊ လမ်းမတော်တောင်ရပ်ကွက်မှ အိမ်ထောင်စုများအတွက် သောက်သုံးရေ (၂၀၀၀) လီတာ၊ ရွှေပြားရပ်ကွက်မှ အိမ်ထောင်စုများအတွက် သောက်သုံးရေ (၂၅၀၀) လီတာတို့ကို ဖြန့်ဝေပေးခဲ့ပါသည်။

အဆိုပါ ကူညီဆောင်ရွက်ရေးလုပ်ငန်းများဆောင်ရွက်ရာတွင် ရခိုင်ပြည်နယ်၊ စစ်တွေမြို့ရှိ စေတနာလုပ်အားရှင်များနှင့် ဝန်ထမ်းများက ပူးပေါင်းကူညီဆောင်ရွက်ခဲ့ပါသည်။ ဆက်လက်၍ သောက်သုံးရေ ပိုမိုရရှိနိုင်ရေးနှင့် အကူအညီလိုအပ်နေသူများကို ပိုမိုကူညီဆောင်ရွက်နိုင်ရေးအတွက် စီစဉ်ဆောင်ရွက်လျက်ရှိပါသည်။

မြန်မာနိုင်ငံကြက်ခြေနီအသင်းသည် လူသားချင်းစာနာထောက်ထားမှုဆိုင်ရာ အဖွဲ့အစည်းတစ်ခု ဖြစ်ပြီး အသင်းသည် အမှီအခိုကင်းစွာဖြင့် ဘက်မလိုက်ပဲ ကြားနေကာ လူသားချင်းစာနာထောက် ထားမှုဆိုင်ရာ အကူအညီများကို ထိခိုက်ခံစားရမှုအရှိဆုံးနှင့် လိုအပ်နေသူများထံ ရောက်ရှိစေရန် အတွက် တတ်စွမ်း သရွေ့ ကြိုးစားဆောင်ရွက်လျက်ရှိပါသည်။

ရန်ကုန်၊ ၂၀၂၃ခုနှစ်၊ မေလ(၁၉)ရက်။

ဆိုင်ကလုန်းမုန်တိုင်း မိုခါ (MOCHA) တိုက်ခတ်အပြီး မြန်မာနိုင်ငံကြက်ခြေနီအသင်းမှ တုံ့ပြန် ဆောင်ရွက်ရေးလုပ်ငန်းများအတွက် The Royal Thai Embassy, The Thai Business Association of Myanmar (TBAM) and AST Express (Thailand) မှ အခြေခစားသောက်ကုန်နှင့် အလှူငွေတို့ကို လာရောက်လှူဒါန်းရာ လှူဒါန်းပွဲအခမ်းအနားကို မေလ(၁၉)ရက်နေ့ နံနက်ပိုင်းက အသင်းရန်ကုန်ရုံးခွဲတွင် ကျင်းပခဲ့ပါသည်။

လှူဒါန်းပွဲအခမ်းအနားတွင် အသင်း၏ အချိန်ပြည့်အလုပ်အမှုဆောင် ပါမောက္ခဒေါက်တာဒေါ်မြသူက နှုတ်ခွန်းဆက်စကား ပြောကြားခဲ့ပြီး The Royal Thai Embassy မှ Minister Counsellor Mr. Yordying Supasri နှင့် TBAM မှ President Mr. Nuttaphong တို့က လှူဒါန်းရခြင်းအကြောင်းကို ရှင်းလင်းပြောကြားခဲ့ပါသည်။

ထို့နောက် ဆန်အိတ် (၂၄)ပြည်ဝင် (၂၀) အိတ်၊ ခေါက်ဆွဲခြောက်ထုပ် (၁,၆၀၀)ထုပ်၊ ခေါက်ဆွဲခြောက်ဘူး (၁၀၀)ဘူး၊ Sanitary Pad (၇၁၀)ထုပ်၊ ငါးသေတ္တာ (၅၀၀) ဘူး၊ CP ကြက်အူချောင်း (၂,၀၀၀)ထုပ်၊ CP ကြက်ဥ (၁၀,၀၅၀) လုံး၊ ရေသန့် (၀.၃၃လီတာ)(၃၀၀) ဘူး တို့အပြင် ငွေသား 3,000 USD နှင့် ၂,၀၀၀,၀၀၀ ကျပ်တို့ကို လှူဒါန်းရာ အသင်းအချိန်ပြည့်အလုပ်အမှုဆောင် ပါမောက္ခဒေါက်တာဒေါ်မြသူက ဂုဏ်ပြုမှတ်တမ်းလွှာ ပေးအပ်ကာ ကျေးဇူးတင်စကား ပြောကြားခဲ့ပါသည်။

အဆိုပါ လှူဒါန်းပွဲ အခမ်းအနားသို့ အသင်းအချိန်ပြည့်အလုပ်အမှုဆောင်များဖြစ်ကြ‌သော ပါမောက္ခဒေါက်တာဒေါ်မြသူနှင့် ပါမောက္ခဒေါက်တာဒေါ်ရီရီတင်၊ အထွေထွေအတွင်းရေးမှူး ပါမောက္ခဒေါက်တာထင်ဇော်စိုး၊ ညွှန်ကြားရေးမှူးများ၊ ဌာနမှူးများ၊ The Royal Thai Embassy နှင့် TBAM တို့မှ တာဝန်ရှိသူများ တက်ရောက်ခဲ့ကြပါသည်။

ဆိုင်ကလုန်းမုန်တိုင်း မိုခါ (MOCHA) တိုက်ခတ်ခံခဲ့ရသည့် ဒေသများရှိ ပြည်သူများအတွက် လိုအပ်ချက်များကို ဖြည့်ဆည်းကူညီပေးနိုင်ရန် တစ်ဖက်တစ်လမ်းမှ ပါဝင်ပံ့ပိုး ကူညီပေးကြသော အလှူရှင်များအား မြန်မာနိုင်ငံကြက်ခြေနီအသင်းအနေဖြင့် အထူးပင်ကျေးဇူးတင်ရှိပါသည်။

ရန်ကုန်၊ ၂၀၂၃ ခုနှစ်၊ မေလ (၁၈) ရက်။

မြန်မာနိုင်ငံကြက်ခြေနီအသင်းသည် ဆိုင်ကလုန်းမုန်တိုင်းမိုခါ တိုက်ခတ်မှုကြောင့် ထိခိုက်ခံစားရသည့် ပြည်နယ်နှင့် တိုင်းဒေသကြီးအသီးသီးမှ ပြည်သူများအတွက် အရေးပေါ်ကယ်ဆယ်ရေးပစ္စည်းများ ဖြစ်သည့် တစ်ကိုယ်ရည်သန့်ရှင်းရေးသုံးပစ္စည်း (တစ်လစာ/တစ်ပတ်စာ)၊ မိသားစုသုံးပစ္စည်း၊ အမျိုးသမီး တစ်ကိုယ်ရည် သန့်ရှင်းရေးသုံးပစ္စည်း၊ မီးဖိုချောင်သုံးပစ္စည်း နှင့် အိမ်ဆောက်အထောက် အကူပြု ပစ္စည်းနှင့် တာပေါ်လင်တို့ကို ထောက်ပံ့ပေးအပ်ခဲ့ပါသည်။

မေလ (၁၃) ရက်နေ့က ဧရာဝတီတိုင်းဒေသကြီး၊ ကျောင်းကုန်းမြို့နယ်ရှိ ပြည်သူများအတွက် တစ်ကိုယ်ရည်သန့်ရှင်းရေးသုံးပစ္စည်း (တစ်လစာ) (၈) ပုံး၊ တစ်ကိုယ်ရည် သန့်ရှင်းရေးသုံးပစ္စည်း (တစ်ပတ်စာ) (၁၀) အိတ် နှင့် တာပေါ်လင် (၂၈) ချပ်တို့ကို ထောက်ပံ့ပေး အပ်ခဲ့ပါသည်။

ထို့အပြင် မေလ (၁၄) ရက်နေ့နှင့် (၁၆) ရက်နေ့က ရန်ကုန်တိုင်းဒေသကြီးရှိ မရမ်းကုန်း၊ သင်္ဃန်းကျွန်း၊ တိုက်ကြီး၊ ကျောက်တန်းနှင့် ဒဂုံမြို့သစ် (ဆိပ်ကမ်း)မြို့နယ်များရှိ ပြည်သူများအတွက် တစ်ကိုယ်ရည် သန့်ရှင်းရေးသုံးပစ္စည်း (တစ်လစာ) (၆၉) ပုံး၊ မိသားစုသုံးပစ္စည်း (၆၉) ပုံး၊ အမျိုးသမီး တစ်ကိုယ်ရည် သန့်ရှင်းရေးသုံးပစ္စည်း (၆၉) အိတ် နှင့် အိမ်ဆောက် အထောက် အကူပြုပစ္စည်း (၂၁) စုံတို့ကိုလည်းကောင်း၊ အလားတူ မေလ (၁၄) ရက်နေ့က တနင်္သာရီတိုင်းဒေသကြီး၊ ရေဖြူမြို့နယ်၊ ဓမင်းဆိပ်ကျေးရွာရှိ ပြည်သူများအတွက် တစ်ကိုယ်ရည် သန့်ရှင်းရေးသုံးပစ္စည်း (တစ်ပတ်စာ) (၁) အိတ် နှင့် တာပေါ်လင် (၂) ချပ် ကိုလည်းကောင်း ထောက်ပံ့ပေးအပ်ခဲ့ပါသည်။

အလားတူ မေလ (၁၇) ရက်နေ့က ပဲခူးတိုင်းဒေသကြီး၊ ပြည်မြို့၊ ရွှေတောင်မြို့နှင့် ရွာသစ်ကြီးကျေးရွာရှိ ပြည်သူများအတွက် တစ်ကိုယ်ရည်သန့်ရှင်းရေးသုံးပစ္စည်း (တစ်လစာ) (၄) ပုံး၊ တစ်ကိုယ်ရည် သန့်ရှင်းရေးသုံးပစ္စည်း (တစ်ပတ်စာ) (၂၁) အိတ်၊ မိသားစုသုံးပစ္စည်း (၁) ပုံး၊ မီးဖိုချောင်သုံးပစ္စည်း (၁၃) စုံ နှင့် တာပေါ်လင် (၃၇) ချပ် တို့ကို ထောက်ပံ့ပေးအပ်ခဲ့ပါသည်။

အလားတူ အကူအညီလိုအပ်နေသည့် ယာယီခိုလှုံရာစခန်းများနှင့် ကျေးရွာများမှ ပြည်သူများ‌အတွက် စားနပ်ရိက္ခာများ၊ ရေနှင့် သန့်ရှင်းရေးသုံးပစ္စည်းများ၊ အခြားလိုအပ်သည့်ပစ္စည်းများကို ဆက်လက် ထောက်ပံ့ကူညီနိုင်ရန်လည်း ချိတ်ဆက်ဆောင်ရွက်လျက် ရှိပါသည်။

မြန်မာနိုင်ငံကြက်ခြေနီအသင်းသည် လူသားချင်းစာနာထောက်ထားမှုဆိုင်ရာ အဖွဲ့အစည်းတစ်ခု ဖြစ်ပြီး အသင်းသည် အမှီအခိုကင်းစွာဖြင့် ဘက်မလိုက်ပဲ ကြားနေကာ လူသားချင်းစာနာထောက် ထားမှုဆိုင်ရာ အကူအညီများကို ထိခိုက်ခံစားရမှုအရှိဆုံးနှင့် လိုအပ်နေသူများထံ ရောက်ရှိစေရန် အတွက် တတ်စွမ်း သရွေ့ ကြိုးစားဆောင်ရွက်လျက်ရှိပါသည်။

မြန်မာနိုင်ငံကြက်ခြေနီအသင်းသည် ဆိုင်ကလုန်းမုန်တိုင်းမိုခါ တိုက်ခတ်မှုကြောင့် ထိခိုက်ခံစားရသည့် ရခိုင်ပြည်နယ်ရှိ ပြည်သူများအတွက် အရေးပေါ် ကယ်ဆယ်ရေးပစ္စည်းများ ဖြစ်သည့် တစ်ကိုယ်ရည်သန့်ရှင်းရေးသုံးပစ္စည်း (တစ်ပတ်စာ)နှင့် အမျိုးသမီး တစ်ကိုယ်ရည်သန့်ရှင်းရေးသုံးပစ္စည်းတို့ကို ထောက်ပံ့ ပေးအပ်ခြင်း၊ သောက်သုံးရေ များဖြန့်ဝေပေးခြင်း၊ ပြည်သူလူထု ပဏာမ ကျန်းမာရေးစောင့်ရှောက်မှု အဖြစ် ရွေ့လျားဆေးခန်းဖြင့် ကျန်းမာရေးစစ်ဆေးပေးခြင်းများနှင့် ကျန်းမာရေး အသိပညာ ပေးခြင်းများကို ဝန်ထမ်းများနှင့် ကြက်ခြေနီစေတနာလုပ်အားရှင်များက မေလ (၁၇) ရက်နေ့က ပြုလုပ်ခဲ့ပါသည်။

အဆိုပါအရေးပေါ်ကယ်ဆယ်ရေးသုံးပစ္စည်းများကို မောင်တော်မြို့နယ်၊ ကျောက်ပန်ဒူရွာရှိ အိမ်ထောင်စု (၁၈၃) စုကို တစ်ကိုယ်ရည်သန့်ရှင်းရေးသုံးပစ္စည်း (တစ်ပတ်စာ) (၁၈၃) အိတ်အားလည်းကောင်း၊ အင်းဒင်ရွာတွင် အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၆၀) အိတ်အားလည်းကောင်း၊ ရသေ့တောင်မြို့နယ်၊ ဒုံးပိုက်ကျေးရွာတွင် အမျိုးသမီးတစ်ကိုယ်ရည်သန့်ရှင်းရေးသုံးပစ္စည်း (၄၀) အိတ်အားလည်းကောင်း ဖြန့်ဝေပေးခဲ့ပါသည်။

အလားတူ စစ်တွေမြို့ရှိ အဓိဌာန်ဘုန်းတော်ကြီးကျောင်းနှင့် စိတ္တသုခကမ္မဌာန်း (ဉာဏစက္ခု) ကျောင်းတွင် ယာယီခိုလှုံလျက်ရှိသော ပြည်သူလူထုအတွက် သောက်သုံးရေ လီတာ (၁၀,၀၀၀) အား ဖြန့်‌ဝေခဲ့ပါသည်။

ထို့အပြင် အဓိဌာန်ဘုန်းတော်ကြီး ကျောင်းနှင့် စိတ္တသုခကမ္မဌာန်း (ဉာဏစက္ခု) ကျောင်းတို့ရှိ ယာယီခိုလှုံရေးစခန်းများတွင် ရောက်ရှိနေသည့် ပြည်သူလူထု (၁၃၆) ဦးအား ပဏာမ ကျန်းမာရေးစောင့်ရှောက်မှုအဖြစ် ရွေ့လျားဆေးခန်းဖြင့် ကျန်းမာရေးစစ်ဆေးပေးခြင်းနှင့် သန့်လေးသန့်အကြောင်း၊ စနစ်တကျလက်ဆေးခြင်းအကြောင်း စသည့် ကျန်းမာရေးအသိပညာ ပေးခြင်းများကို ပြုလုပ်ခဲ့ပါသည်။

အလားတူ အကူအညီလိုအပ်နေသည့် ယာယီခိုလှုံရာစခန်းများနှင့် ကျေးရွာများမှ ပြည်သူများ‌အတွက် စားနပ်ရိက္ခာများ၊ ရေနှင့် တစ်ကိုယ်ရည်သန့်ရှင်းရေးသုံးပစ္စည်းများ၊ အခြားလိုအပ်သည့်ပစ္စည်းများကို ဆက်လက် ထောက်ပံ့ကူညီနိုင်ရန်လည်း ချိတ်ဆက်ဆောင်ရွက်လျက် ရှိပါသည်။

မြန်မာနိုင်ငံကြက်ခြေနီအသင်းသည် လူသားချင်းစာနာထောက်ထားမှုဆိုင်ရာ အဖွဲ့အစည်းတစ်ခု ဖြစ်ပြီး အသင်းသည် အမှီအခိုကင်းစွာဖြင့် ဘက်မလိုက်ပဲ ကြားနေကာ လူသားချင်းစာနာထောက် ထားမှုဆိုင်ရာ အကူအညီများကို ထိခိုက်ခံစားရမှုအရှိဆုံးနှင့် လိုအပ်နေသူများထံ ရောက်ရှိစေရန် အတွက် တတ်စွမ်း သရွေ့ ကြိုးစားဆောင်ရွက်လျက်ရှိပါသည်။

ဆိုင်ကလုန်းမုန်တိုင်းမိုခါ တိုက်ခတ်မှုကြောင့် ရခိုင်ပြည်နယ်ရှိ နေအိမ်များ၊ အဆောက်အဦများပျက်စီးဆုံးရှုံးပြီး လူအများ ဘေးအန္တရာယ်နှင့် ရင်ဆိုင်ကြုံတွေ့နေရပါသည်။

မြန်မာနိုင်ငံကြက်ခြေနီအသင်းက အဆိုပါဘေးအန္တရာယ်ခံစားနေရသော ရပ်ရွာလူထုအား အစားအစာမဟုတ်သောပစ္စည်းများ၊ ရေသန့်နှင့် ဆေးဝါးများ ကူညီထောက်ပံ့ပေးနိုင်ရန်အတွက် မေလ (၁၅) ရက်နေ့က ကုန်ကား (၂) စီးနှင့် မေလ (၁၆) ရက်နေ့က ကုန်ကား (၁) စီးဖြင့် ထောက်ပံ့ပစ္စည်းများ တင်ဆောင်ကာ စစ်တွေမြို့သို့ စတင်ထွက်ခွာခဲ့ပါသည်။

အဆိုပါ ကုန်တင်ကားများတွင် အရေးပေါ်ကယ်ဆယ်ရေးသုံး ပစ္စည်းများဖြစ်သည့် တစ်ကိုယ်ရည်သန့်ရှင်းရေးသုံးပစ္စည်းများ၊ ခြင်ထောင်၊ စောင်၊ တာပေါ်လင်စ၊ လက်သန့်ဆေးရည်၊ မိသားစုသုံးပစ္စည်းများ၊ မီးဖိုချောင်သုံးပစ္စည်းများ၊ ကလေးမွေးဖွားသန့်စင်သုံးပစ္စည်းများ၊ နှာခေါင်းစည်းများ၊ ရေသန့်စက်နှင့် ရေသန့်ဆေးများ၊ ဆေးပစ္စည်းများနှင့် ဓာတ်ဆားများကို ကနဦးပို့ဆောင်လျက်ရှိပါသည်။

လတ်တလောတွင် စားသောက်ကုန်များထောက်ပံ့ပေးနိုင်ရန်၊ ရွေ့လျားဆေးပေးခန်းများ ဖွင့်လှစ်ရန်နှင့် မြို့နယ်များတွင် ထိခိုက်မှုများကို စာရင်းများကောက်ယူ၍ လိုအပ်ချက်များကို တတ်စွမ်းသ၍ အမြန်ဆုံးကူညီပေးနိုင်ရန် ချိတ်ဆက်ညှိနှိုင်း စီစဉ်ဆောင်ရွက်လျက်ရှိပါသည်။