မြန်မာနိုင်ငံကြက်ခြေနီအသင်းမှ တာဝန်ရှိသူများနှင့် ကြက်ခြေနီစေတနာလုပ်အားရှင်များသည် ပဲခူးတိုင်းဒေသကြီး၊ ကျောက်ကြီးမြို့နယ်၊ ဆပ်လဲကျေးရွာမှ အိမ်ထောင်စု (၅၁) စု သည် လတ်တလောဖြစ်ပေါ်နေသည့်အခြေအနေများကြောင့် ပဲခူးမြို့သို့ အရေးပေါ်ရွေ့ပြောင်းခဲ့ရကြောင်း သတင်းရရှိသဖြင့် ၂၀၂၁ ခုနှစ်၊ ဧပြီလ (၄) ရက်နေ့က နေရပ်စွန့်ခွာ ပြည်သူများ လိုအပ်သည့် ခြင်ထောင် (၅၁) ထည်၊ စောင်(၅၁)ထည် နှင့် တစ်ကိုယ်ရည်သန့်ရှင်းရေးသုံးပစ္စည်း (၅၁) ထုတ်တို့ကို သွားရောက်ထောက်ပံ့ပေးအပ်ခဲ့ပါသည်။

"လက်ရှိဖြစ်ပွားနေတဲ့ အခြေအနေပေါ်မှာ ကျွန်တော်တို့ တာမွေမြို့နယ်ကြက်ခြေနီအသင်းခွဲ အနေနဲ့ ကြက်ခြေနီစေတနာလုပ်အားရှင် ၂၅ ဦးက ဖေဖော်ဝါရီလ (၄) ရက်နေ့ကနေ ယနေ့အချိန်ထိ နေ့ညမပြတ် ပြည်သူများအတွက် လိုအပ်တဲ့ ပြုစုစောင့်ရှောက်မှု အကူအညီများကို ကူညီပေးလျှက်ရှိပြီး အမြဲ အသင့်အနေအထား ရှိနေပါတယ်။ ထိခိုက်ဒဏ်ရာရသူတွေကို ရှေးဦးပြုစုပေးတယ်၊ လိုအပ်ပါက ကြက်ခြေနီလူနာတင်ယာဉ်နဲ့ ဆေးရုံဆေးခန်းတွေကို ပို့ဆောင်ပေးခဲ့ပါတယ်။ ကျွန်တော်တို့ ကြက်ခြေနီစေတနာလုပ်အားရှင်များအနေနဲ့ လုပ်ဆောင်မှုတိုင်းမှာ ကြက်ခြေနီအခြေခံမူ (၇) ချက်နဲ့အညီ လိုက်နာဆောင်ရွက် ပါတယ်။ ဖေဖော်ဝါရီလနဲ့ မတ်လတွေ အတွင်းမှာ ကျွန်တော်တို့ မြို့နယ်ကြက်ခြေနီအသင်းခွဲ အနေနဲ့ ထိခိုက်ဒဏ်ရာရသူပေါင်း (၂၄၀) ကျော်ကို လိုအပ်တဲ့ အကူအညီများ ပေးနိုင်ခဲ့ပါတယ်... "  

မြန်မာနိုင်ငံတစ်ဝှမ်းရှိ အကြောင်းအမျိုးမျိုးကြောင့် ဘေးဒုက္ခခံစားနေရသူများ၊ အကူအညီလိုအပ်သူများအား မြန်မာနိုင်ငံကြက်ခြေနီအသင်းမှ ကြက်ခြေနီစေတနာလုပ်အားရှင်များက တတ်စွမ်းသမျှ အကူညီပေးလျှက်ရှိပါတယ်။ အခက်အခဲ အကြပ်အတည်းများကြားတွင် အကူအညီလိုအပ်နေသူများကို အကူအညီများ ပေးအပ်နိုင်ရေး ကြိုးပမ်းဆောင်ရွက်နေကြသည့် ကြက်ခြေနီ စေနာလုပ်အားရှင်များကို ကျေးဇူးတင်ပါသည်။

၂၀၂၁ခုနှစ်၊ ဧပြီလ ၁ရက်နေ့က ကချင်ပြည်နယ်၊ မြစ်ကြီးနားမြို့နယ်တွင် ဆိုင်ကယ်မတော်တဆဖြစ်ပွားမှုကြောင့် ထိခိုက်ဒဏ်ရာရရှိသူတစ်ဦးအား ကြက်ခြေနီက အရေးပေါ်ရှေးဦးပြုစုပေးခဲ့ကြပြီး ဆေးရုံသို့ညွှန်းပို့ပေးခဲ့ပါသည်။