မိုးကုတ်၊ ၂၀၂၁ခုနှစ်၊ နိုဝင်ဘာလ(၂)ရက်။

မန္တလေးတိုင်းဒေသကြီး၊ ပြင်ဦးလွင်ခရိုင်၊ မိုးကုတ်မြို့နယ် ရွှေပူရပ်ကွက် အုန်းကိုင်းရပ်တွင် ယနေ့ နိုဝင်ဘာလ (၂) ရက် နံနက်‌ပိုင်းက တောင်ပြိုကျမှုဖြစ်ပွားခဲ့ရာ မိုးကုတ်မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များက ပိတ်မိနေသူများအား ရှာဖွေရာတွင် ပူးပေါင်း ကူညီခဲ့ပြီး ဒဏ်ရာရသူကို ရှေးဦးပြုစုပေးခဲ့တယ်လို့ မိုးကုတ်မြို့နယ်ကြက်ခြေနီ

အသင်းခွဲထံမှ သိရပါတယ်။

ထိုသို့ တောင်ပြိုကျရာတွင် ယာယီတဲအိမ်ပေါ်သို့ ပြိုကျခဲ့ခြင်းဖြစ်ပြီး ပိတ်မိနေသူ(၂)ဦးအားရှာဖွေကယ်ဆယ်ရာတွင် ဌာနဆိုင်ရာများ၊ ရပ်ကွက်အုပ်ချုပ်ရေးမှူများ၊ မီးသတ်တပ်ဖွဲ့များနှင့်အတူ ကြက်ခြေနီစေတနာလုပ်အားရှင်များက ကူညီခဲ့ကြပြီး ပိတ်မိနေသူ(၂)ဦးအနက် (၁)ဦးကို ကယ်ဆယ်နိုင်ခဲ့ပါတယ်။

"ရှာလို့တွေ့တဲ့သူရဲ့ ဒဏ်ရာတွေကို ရှေးဦးပြုစုပေးပြီး ဆေးရုံကိုပို့ပေးခဲ့တယ်။ သူတို့‌ေနတဲ့ အိမ်ကနေ ရှာလို့ရလာတဲ့ အိမ်ထောင်စု၊ မှတ်ပုံတင်နဲ့ ဖုန်း၊ ပိုက်ဆံအိတ်တွေ ကိုလည်း ပြန်ပေးခဲ့ပါတယ်"လို့လည်း မြို့နယ်ကြက်ခြေနီတပ်ဖွဲ့မှူး ထံမှ သိရပါတယ်။

မိုးကုတ်မြို့နယ်အတွင်း မိုးသည်းထန်စွာ ရွာသွန်းခြင်းကြောင့် ရေကြီး၊ ရေလျံမှုများ၊ မြေပြိုကျမှုများ မကြာခဏ ဖြစ်ပွားလေ့ရှိရာ မြို့နယ်မှ ကြက်ခြေနီစေတနာလုပ်အားရှင်များက ကယ်ဆယ်ရေးလုပ်ငန်းများတွင်ကူညီခြင်း၊ ထိခိုက်ဒဏ်ရာရသူများကို ရှေးဦးပြုစုခြင်း၊ ဆေးရုံသို့ ပို့ဆောင်ပေးခြင်းများအပြင် COVID-19 ရောဂါကာကွယ်ရေးလုပ်ငန်းများတွင်လည်း ဝိုင်းဝန်းကူညီ ဆောင်ရွက်လျက်ရှိပါတယ်။

ရန်ကုန်၊ ၂၀၂၁ခုနှစ်၊ အောက်တိုဘာ(၃၁)ရက်။

ရန်ကုန်တိုင်းဒေသကြီး ဒဂုံမြို့သစ်(မြောက်ပိုင်း)မြို့နယ်ကြက်ခြေနီအသင်းခွဲ၊ မြို့နယ်ကြက်ခြေနီတပ်ဖွဲ့မှပြုလုပ်သော ရှေးဦးပြုစုခြင်း(အခြေခံ)သင်တန်း(၁/၂၀၂၁)သင်တန်းဆင်းပွဲကို အောက်တိုဘာလ(၃၁)ရက်နေ့ နံနက်ပိုင်းက အဆိုပါ မြို့နယ်ကြက်ခြေနီ

အသင်းခွဲ၌ ပြုလုပ်ခဲ့ပါသည်။

လူနာကို ကျွမ်းကျင်သောဆေးပညာရှင်ထံ မရောက်မီ သက်သာစွာနေထိုင်နိုင်စေရန်၊ အချိန်မီပြုစုစောင့်ရှောက်တတ်စေရန်၊ ရှေးဦးပြုစုနည်းအတတ်ပညာများ တတ်မြောက်စေရန် ရည်ရွယ်ကာ ဖွင့်လှစ်ခဲ့ခြင်းဖြစ်ပါသည်။

သင်တန်းဆင်းပွဲတွင် တိုင်းဒေသကြီးကြက်ခြေနီကြီးကြပ်မှုကော်မတီဥက္ကဌဦးကျော်မိုးကြည်၊ မြန်မာနိုင်ငံကြက်ခြေနီအသင်း ဒုတိယအထွေအတွင်းရေးမှူး ဒေါက်တာဒေါ်ညိုညိုဝင့် နှင့် မြို့နယ်စီမံအုပ်ချုပ်ရေးအဖွဲ့ ဥက္ကဌ ဦးညီညီအောင်တို့က အမှာစကားများ

ပြောကြားခဲ့ကြပါသည်။

ထို့နောက် သင်တန်းဆင်းလက်မှတ်များ၊ သင်တန်း ထူးချွန်ဆုနှင့် ငွေသားဆုများကို ပေးအပ်ချီးမြှင့်ခဲ့ကြပြီး ထူးချွန်ဆုရရှိသူ သင်တန်းသားတစ်ဦးက ကျေးဇူးတင်စကားပြောကြားခဲ့ပါသည်။

သင်တန်းဆင်းပွဲသို့ တိုင်းဒေသကြီးကြက်ခြေနီကြီးကြပ်မှုကော်မတီဥက္ကဌ၊ မြန်မာနိုင်ငံကြက်ခြေနီအသင်း ဒုတိယအထွေအတွင်းရေးမှူးနှင့် ‌ဘေးအန္တရာယ်ဆိုင်ရာစီမံခန့်ခွဲမှုဌာန ညွှန်ကြားရေးမှူး၊ မြို့နယ်စီမံအုပ်ချုပ်ရေးအဖွဲ့ ဥက္ကဌ၊ ဒုတိယတိုင်းကြက်ခြေနီတပ်ဖွဲ့မှူး၊ အရှေ့ပိုင်းခရိုင်ကြက်ခြေနီတပ်ဖွဲ့မှူး၊ မြို့နယ်ကြက်ခြေနီအသင်းခွဲဥက္ကဌ၊ ဒုတိယဥက္ကဌနှင့် အမှုဆောင်များ၊ မြို့နယ်ကြက်ခြေနီတပ်ဖွဲ့မှူးနှင့် ကြက်ခြေနီစေတနာလုပ်အားရှင်များ၊ သင်တန်းသား/သူများ တက်ရောက်ခဲ့ကြပါသည်။

အဆိုပါသင်တန်းကို အောက်တိုဘာလ(၁၅)ရက်နေ့မှ (၁၇)ရက်နေ့အထိ (၃)ရက်ကြာ ပြုလုပ်ခဲ့ပြီး မြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင် သင်တန်းသား/သူ(၃၉)ဦး တက်ရောက်ခဲ့ကြပါသည်။

ယခုကဲ့သို့ သင်တန်းဖွင့်လှစ်နိုင်ခဲ့ခြင်းကြောင့် သင်တန်းသား/သူများအနေ့နဲ့ ရှေးဦးပြုစုခြင်းကို ကျွမ်းကျင်စွာ တတ်မြောက်ပြီး ပြည်သူတွေကို ပိုမို အကျိုးပြုနိုင်မှာ ဖြစ်ပါတယ်လို့ မြို့နယ်ကြက်ခြေနီတပ်ဖွဲ့မှူး ကပြောကြားခဲ့ပါသည်။ ယခုသင်တန်းတွင် သင်တန်းထူးချွန်ဆုအတွက် ငွေသားဆုများချီးမြှင့်နိုင်ရန် အသင်းခွဲဥက္ကဌ၊ ဒုတိယဥက္ကဌနှင့်အမှုဆောင်များက လှူဒါန်းခဲ့ခြင်း ဖြစ်ပါသည်။

မြန်မာနိုင်ငံကြက်ခြေနီအသင်း (၈၄)ကြိမ်မြောက် ကြက်ခြေနီ ဗဟိုကောင်စီအစည်းအဝေး ဖွင့်ပွဲအခမ်းအနားကို ၂၀၂၁ ခုနှစ်၊ အောက်တိုဘာလ (၂၈) ရက်၊ နံနက်က Video Conferencing စနစ်ဖြင့် ကျင်းပပြုလုပ်ခဲ့ပါသည်။ အဆိုပါ ကြက်ခြေနီဗဟိုကောင်စီအစည်းအဝေး ဖွင့်ပွဲအခမ်းအနားသို့ ကျန်းမာရေးဝန်ကြီးဌာန၊ ဒုတိယဝန်ကြီး ပါမောက္ခဒေါက်တာအေးထွန်း၊ အသင်းဥက္ကဌဒေါက်တာ မောင်မောင်မြင့်၊ ဒုတိယဥက္ကဌ ဒေါက်တာဒေါ်အမယာမော်နိုင်၊ အချိန်ပြည့် / အချိန်ပိုင်း အလုပ်အမှုဆောင်များ၊ နှီးနွယ်ဝန်ကြီးဌာန များမှ ညွှန်ကြားရေးမှူးချုပ်များနှင့် ဖိတ်ကြားထားသူများ၊ ကြက်ခြေနီဗဟိုကောင်စီဝင် ပြည်နယ်နှင့် တိုင်းဒေသကြီး များမှ ကြီးကြပ်မှုကော်မတီဥက္ကဋ္ဌများနှင့် ကြက်ခြေနီတပ်ဖွဲ့မှူးများ၊ အပြည်ပြည်ဆိုင်ရာ ကြက်ခြေနီ ကော်မတီနှင့် အပြည်ပြည်ဆိုင်ရာ ကြက်ခြေနီနှင့် လခြမ်းနီ အသင်းများ ဖက်ဒရေးရှင်းမှ တာဝန်ရှိသူများ၊ မိတ်ဖက်အမျိုးသား အသင်းများမှ ဌာနေကိုယ်စားလှယ်များ၊ အသင်းမှ အထွေထွေအတွင်းရေးမှူး၊ ဒုတိယအထွေထွေ အတွင်းရေးမှူးများ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ တက်ရောက်ခဲ့ကြပါသည်။ အခမ်းအနား၌ ဒုတိယဝန်ကြီးက အဖွင့်မိန့်ခွန်းပြောကြားခဲ့ပြီး အသင်းဥက္ကဌက အသင်း၏ လုပ်ငန်းဆောင်ရွက် နေမှု အခြေအနေများကို ရှင်းလင်းတင်ပြခဲ့ကာ မှတ်တမ်းတင်ဓါတ်ပုံရိုက်ကူး၍ ဖွင့်ပွဲအခမ်းအနားကို ပြီးမြောက် အောင်မြင်ခဲ့ပါသည်။

မြန်မာနိုင်ငံကြက်ခြေနီအသင်း ဥပဒေ ၂၀၁၅ အရ ကြက်ခြေနီဗဟိုကောင်စီအစည်းအဝေးကို အနည်းဆုံး တစ်နှစ် တစ်ကြိမ် ကျင်းပပြုလုပ်ခြင်းဖြစ်ပြီး မြန်မာနိုင်ငံကြက်ခြေနီအသင်း၏ ၂၀၂၁ - ၂၀၂၅ မဟာဗျူဟာ လုပ်ငန်းစဉ်များနှင့် ပတ်သက်၍ ဆောင်ရွက်ရမည့် လုပ်ငန်းများ ကို တင်ပြဆွေးနွေး သွားကြမည် ဖြစ်ပါသည်။

ရန်ကုန်၊ အောက်တိုဘာလ (၄) ရက်။

မြန်မာနိုင်ငံအတွင်း COVID-19 ကုသရေးလုပ်ငန်းများတွင် အသုံးပြုရန်အတွက် မြန်မာထိုင်းစီးပွားရေးလုပ်ငန်းရှင်များအသင်း (Thai Business Association of Myanmar -TBAM) က မြန်မာနိုင်ငံကြက်ခြေနီအသင်းသို့ အောက်ဆီဂျင်ဆလင်ဒါ (၄၇) လီတာ အလုံးရေ (၃၀၀) လှူဒါန်းပွဲကို ၂၀၂၁ ခုနှစ်၊ စက်တင်ဘာလ (၂၇) ရက်နေ့က Virtual စနစ်ဖြင့်ပြုလုပ်ခဲ့ပါသည်။

လှူဒါန်းပွဲအခမ်းအနား အဖွင့်အမှာစကားကို မြန်မာနိုင်ငံဆိုင်ရာ ထိုင်းနိုင်ငံသံအမတ်ကြီး H.E Mrs. Suphatra Sirmaitreephithak ၊ TBAM ဥက္ကဌ Mr. Sorasak Keeratichokechaikul နှင့် ထိုင်းနိုင်ငံကြက်ခြေနီအသင်း အထွေထွေအတွင်းရေးမှူး H.E. Mr. Tej Bunnag တို့မှ ပြောကြားခဲ့ပြီး မြန်မာနိုင်ငံ ကြက်ခြေနီအသင်း အထွေထွေအတွင်းရေးမှူး ပါမောက္ခဒေါက်တာထင်ဇော်စိုးမှ လှူဒါန်းမှု အတွက် ကျေးဇူးတင်စကား ပြန်လည်ပြောကြားခဲ့ပါသည်။

အဆိုပါအခမ်းအနားကို မြန်မာနိုင်ငံဆိုင်ရာ ထိုင်းနိုင်ငံသံအမတ်ကြီးနှင့် တာဝန်ရှိသူများတက်ရောက် ခဲ့ကြပြီး မြန်မာနိုင်ငံကြက်ခြေနီအသင်းမှ အထွေထွေအတွင်းရေးမှူးနှင့် တာဝန်ရှိသူများ တက်ရောက် ခဲ့ပါသည်။

လှူဒါန်းရရှိသည့် အောက်ဆီဂျင်ဆလင်ဒါများကို စက်တင်ဘာလ (၇) ရက်နေ့နှင့် စက်တင်ဘာလ (၁၈) ရက်နေ့တို့တွင် ရန်ကုန်တိုင်းဒေသကြီး ခရိုင်ကြက်ခြေနီကြီးကြပ်မှုကော်မတီ ခရိုင်လေးခရိုင်အတွက် ဆလင်ဒါအလုံးရေ (၂၇၀) လုံးကိုလည်းကောင်း၊ လှိုင်သာယာ ပြည်သူ့ဆေးရုံကြီး အတွက် ဆလင်ဒါအလုံးရေ (၂၀) လုံးကိုလည်းကောင်း၊ အသင်း (ရန်ကုန်ရုံးခွဲ) တွင် ဆလင်ဒါအလုံးရေ (၁၀) လုံးတို့ကိုလည်းကောင်း လွှဲပြောင်းပေးအပ်ခဲ့ပါသည်။

မြန်မာ-ထိုင်း စီးပွားရေးလုပ်ငန်းရှင်များအသင်းအနေဖြင့် အခမဲ့ အောက်ဆီဂျင်အရည်ပြန်လည် ဖြည့်တင်းခြင်းများ ကိုလည်း တစ်နေ့လျှင် ဆလင်ဒါ အလုံး (၆၀)နှုန်းဖြင့် (၅) လအထိ ဆောင်ရွက်ပေး သွား မည်ဖြစ်ပါသည်။

၂၀၂၁ခုနှစ်၊စက်တင်ဘာလ ၃၀ရက်နေ့က ရခိုင်ပြည်နယ်၊ စစ်တွေမြို့နယ်ရှိ ထူးအထူးကုဆေးခန်းတွင် ဆေးကုသမှုခံယူနေသူလူနာတစ်ဦး အရေးပေါ်သွေးလိုအပ်သဖြင့် စစ်တွေမြို့နယ်ကြက်ခြေနီဒုတိယတပ်ဖွဲ့မှူး ဒေါ်စံကျော့ခိုင်မှ “O” သွေးတစ်လုံး သွားရောက်လှူဒါန်းပေးခဲ့ပါသည်။

အဆိုပါ သွေးလှူဒါန်းမှုသည် ဒေါ်စံကျော့ခိုင်၏ (၈)ကြိမ်မြောက် လှူဒါန်းမှုဖြစ်ကြောင်း သိရှိရပါသည်။

၂၀၂၁ခုနှစ်၊ စက်တင်ဘာလ (၂၉) ရက်နေ့က ပြည်ထောင်စုနယ်မြေ နေပြည်တော်၊ ဇေယျာသီရိမြို့နယ်ကြက်ခြေနီအသင်းမှ ကြက်ခြေနီစေတနာလုပ်အားရှင်များသည် ဇေယျာသီရိမြို့နယ်၌ ဆိုင်ကယ်မတော်တဆမှုကြောင့် ဦးခေါင်းဒဏ်ရာရလူနာ (၁)ဦးကို ရှေးဦးပြုစုပေးပြီး နေပြည်တော်ပြည်သူ့ဆေးရုံကြီးကုတင် (၁၀၀၀) သို့ ကရုဏာရှင် လူမှုကူညီရေးပရဟိတအသင်းလူနာတင်ယာဥ်ဖြင့် ကူညီပို့ဆောင်ပေးခဲ့ပါသည်။

ထို့အတူ ပုဗ္ဗသီရိမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည်လည်း ပုဗ္ဗသီရိမြို့နယ်၌ COVID-19ရောဂါကာကွယ်ဆေးထိုးနှံရာတွင် ကျန်းမာရေးဝန်ထမ်းများနှင့်အတူ လိုအပ်သည်များကို နေ့စဥ်ကူညီပေးလျှက်ရှိပါသည်။

စက်တင်ဘာလ (၃၀) ရက်နေ့ကလည်း လယ်ဝေးမြို့နယ်ကုတင်(၁၀၀)ပြည်သူ့ဆေးရုံတွင် အစာအိမ်သွေးကြောပေါက်လူနာအတွက် အရေးပေါ်သွေးလိုအပ်နေကြောင်း အကူအညီတောင်းခံသဖြင့် နေပြည်တော်မှ ကြက်ခြေနီစေတနာလုပ်အားရှင်များက သွေးလှူရှင်ရှာ‌ဖွေပြီး နေပြည်တော်ကြက်ခြေနီကြီးကြပ်မှုကော်မတီမှ လူနာတင်ယာဉ်ဖြင့် ဆေးရုံသို့ သွားရောက်ကာ အရေးပေါ်လိုအပ်နေသည့် (B)သွေး(၁)လုံးကို လှူဒါန်းနိုင်ရန် ကူညီခဲ့ပါသည်။

၂၀၂၁ခုနှစ်၊ စက်တင်ဘာလ ၃၀ရက်နေ့က မွန်ပြည်နယ်၊ မော်လမြိုင်မြို့နယ် ဇာနည်ဘွားဆေးရုံတွင် ဆေးကုသမှုခံယူနေသော လူနာတစ်ဦး “B”သွေးတစ်လုံးအရေးပေါ်လိုအပ်သဖြင့် မုဒုံမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်တစ်ဦးကလည်းကောင်း၊ စက်တင်ဘာလ ၂၇ရက်နေ့က မော်လမြိုင်ဆေးရုံကြီးတွင် ဆေးကုသမှုခံယူနေသော လူနာများအတွက် “AB”သွေးတစ်လုံး၊ “O”သွေး(၄)လုံး လိုအပ်သဖြင့် မုဒုံမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များက သွားရောက်လှူဒါန်းပေးခဲ့ကြပါသည်။

ထို့ပြင် စက်တင်ဘာလ(၃၀)ရက်နေ့နံနက် ၆နာရီခန့်က အသက်(၇၁)နှစ်အရွယ် အမျိုးသမီးတစ်ဦး ရန်ကုန်တွင် ဆေးကုသရန်အတွက် မွန်ပြည်နယ်ကြက်ခြေနီကြီးကြပ်မှုကော်မတီမှ ကြက်ခြေနီစေတနာလုပ်အားရှင်များက လူနာတင်ယာဉ်ဖြင့် ရန်ကုန်သို့ ပို့ဆောင်ပေးခဲ့ကြပါသည်။

အလားတူ စက်တင်ဘာလ (၃၀)ရက်နေ့က သံဖြူဇရပ်မြို့နယ်၊ ကျိုက်ခမီဆေးရုံတွင် ဆေးကုသမှုခံယူနေသော လူနာတစ်ဦးအား သံဖြူဇရပ်ဆေးရုံသို့ လွှဲပြောင်းပေးရန်လိုအပ်သဖြင့် ကျိုက်ခမီမြို့မှ ကြက်ခြေနီစေတနာလုပ်အားရှင်များက ကြက်ခြေနီလူနာတင်ယာဉ်ဖြင့် ပို့ဆောင်ကူညီပေးခဲ့ကြပြီး စက်တင်ဘာလ (၂၉)ရက်နေ့က ဘီးလင်းမြို့နယ်ကြက်ခြေနီစေတနာလုပ်အားရှင်များက နေပြည်တော်တွင် ဆေးကုသမှုခံယူခဲ့သောလူနာတစ်ဦးအား သွားရောက်ခေါ်ဆောင်ပြီး ဘီးလင်းမြို့သို့ ပို့ဆောင်ကူညီပေးခဲ့ကြပါသည်။

ရန်ကုန်၊ စက်တင်ဘာလ (၃၀) ရက်။

မြန်မာနိုင်ငံကြက်ခြေနီအသင်းနှင့် အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများ ဖက်‌ဒရေးရှင်းတို့ ပူးပေါင်း၍ Partnership Review Talk ဆွေးနွေးပွဲကို ၂၀၂၁ခုနှစ်၊ စက်တင်ဘာလ(၂၈)ရက်နေ့မှ (၃၀) ရက်

နေ့ထိ အွန်လိုင်းမှ ပြုလုပ်ခဲ့ပါသည်။

အဆိုပါ ဆွေးနွေးပွဲတွင် ၂၀၁၈ ခုနှစ်မှ ၂၀၂၀ ပြည့်နှစ်အတွင်း ပူးပေါင်း ဆောင်ရွက်ပြီးစီးခဲ့သည့် လုပ်ငန်းများ၊ ၂၀၂၁ ခုနှစ်အတွင်း ဆောင်ရွက်လျက်ရှိသည့် လုပ်ငန်းများ၊ ဆက်လက်ပြီး ပူးပေါင်းဆောင်ရွက်နိုင်မည့် လုပ်

ငန်းများနှင့် နှစ်ဦးနှစ်ဖက် လိုက်နာ စောင့်ထိန်းရမည့် အခြေခံစံ သတ်မှတ်ချက်များအကြောင်းကို ဆွေးနွေးညှိနှိုင်းခဲ့ပါသည်။

(၃) ရက်တာပြုလုပ်သည့် အဆိုပါဆွေးနွေးပွဲသို့ အသင်းဥက္ကဌ ဒေါက်တာမောင်မောင်မြင့်နှင့်အတူ ဒုတိယဥက္ကဌ ဒေါက်တာ ဒေါ်အမယာမော်နိုင်၊ အချိန်ပြည့်အချိန်ပိုင်းအလုပ်အမှုဆောင်များ၊ အထွေထွေအတွင်းရေးမှူး၊ ဒုတိယအထွေထွေအတွင်းရေးမှူးများ၊ ညွှန်ကြားရေးမှူးများ၊ ဌာနမှူးများ၊ ဒုတိယညွှန်ကြားရေးမှူး များနှင့် ဝန်ထမ်းများတက်ရောက်ခဲ့ပြီး အပြည်ပြည်ဆိုင်ရာ ကြက်ခြေနီနှင့် လခြမ်းနီအသင်းများဖက်ဒရေးရှင်းမှ Asia Pacific Deputy Regional Director Ms. Gwen Pang နှင့် အတူ Myanmar Country Head Of Delegation Mr. Joy Singhal၊ ဝန်ထမ်းများ တက်ရောက်ဆွေးနွေးခဲ့ပါသည်။