၂၀၂၂ခုနှစ်၊ ဖေဖော်ဝါရီလ (၂၂)ရက်နေ့၊ ည(၁၁း၄၀)အချိန်ခန့်တွင် ရန်ကုန်တိုင်းဒေသကြီး၊ ဒဂုံ(မြို့သစ်)ဆိပ်ကမ်းမြို့နယ်၊ စက်မှုဇုန်(၂)၊ အမှတ်(၂) မက္ခရာမင်းသားကြီးလမ်းတွင် မီးလောင်မှုဖြစ်ပွားခဲ့ပါသည်။ ထိုမီးလောင်မှုဖြစ်ပွားရာနေရာသို့ ဒဂုံ(မြို့သစ်)ဆိပ်ကမ်းမြို့နယ် ကြက်ခြေနီစေတနာလုပ်အားရှင်များနှင့် နီးစပ်ရာမြို့နယ်များမှ ကြက်ခြေနီစေတနာလုပ်အားရှင်များသည် အချိန်မီသွားရောက်ကာ မီးငြိမ်းသတ်ရေးလုပ်ငန်းများတွင် ကူညီဆောင်ရွက်ပေးခြင်း၊ ထိခိုက်ဒဏ်ရာရရှိသူများအား ရှေးဦးပြုစုပေးခြင်းနှင့် စိတ်ပိုင်းဆိုင်ရာအားပေးကူညီပေးခြင်းတို့ကို ကူညီဆောင်ရွက်ပေးခဲ့ပါသည်။ ဖေဖော်ဝါရီလ (၂၃)ရက်နေ့တွင်လည်အခြားသောလိုအပ်သည်များကို ဆက်လက်ကူညီဆောင်ရွက်ပေးခဲ့ပါသည်။

ယခုကာလအတွင်း ကိုဗစ်ရောဂါကူးစက်မှုမြင့်တက်လာသည်နှင့်အမျှ ကူးစက်မှုလျော့ကျစေရေးအတွက် အသိပညာပေးခြင်းတို့ကို ကြက်ခြေနီစေတနာလုပ်အားရှင်များက နေရာအနှံ့အပြားတွင် တိုးမြှင့်ဆောင်ရွက်လာကြပါသည်။ ၂၀၂၂ခုနှစ် ဖေဖော်ဝါရီလ ၂၃ရက်နေ့က ရှမ်းပြည်နယ်အရှေ့ပိုင်း တာချီလိတ်မြို့နယ်ရှိ ဈေးများနှင့် လူအများသွားလာတတ်သောနေရာများတွင် ကြက်ခြေနီများက ပါးစပ်နှင့်နှာခေါင်းစည်းဝတ်ဆင်ရန်နှိုးဆော်ခြင်း၊ နှာခေါင်းစည်းများအခမဲ့ဖြန့်ဝေပေးခြင်း၊ မကြာခဏလက်ဆေးရန်နှိုးဆော်ခြင်းနှင့် ရောဂါကူးစက်မှုမဖြစ်ပွားစေရေးအတွက် လိုက်နာဆောင်ရွက်ရမည့်အချက်များအား အသိပညာပေးခြင်းတို့ကိုလည်းကောင်း၊ မြို့နယ်ကျန်းမာရေးဦးစီးဌာနတွင် ခရီးသွားရန်ကိုဗစ်ရောဂါပိုးလာရောက်စစ်ဆေးသူများမှ ရောဂါပိုးတွေ့ရှိလူနာများကို ကိုဗစ်ကုသရေးစင်တာများသို့ ပို့ဆောင်ကူညီပေးခြင်းတို့ကိုလည်းကောင်း ကူညီဆောင်ရွက်ပေးခဲ့ကြပါသည်။

မြန်မာနိုင်ငံကြက်ခြေနီအသင်း၊ WASH ယူနစ်မှ ရှမ်းပြည်နယ်တောင်ပိုင်းကြက်ခြေနီကြီးကြပ်မှုကော်မတီ၊ တောင်ကြီးမြို့နယ်ကြက်ခြေနီအသင်းခွဲမှ တာဝန်ရှိသူများ၊ ကြက်ခြေနီစေတနာလုပ်အားရှင်များနှင့် ပူးပေါင်းကာ ၂၀၂၂ခုနှစ် ဖေဖော်ဝါရီလ (16)ရက်နေ့မှစတင်ပြီး တောင်ကြီးမြို့နယ်ရှိ နေရပ်စွန့်ခွာစခန်း (41)ခုမှ ပြည်သူပေါင်း (8356)ဦးအတွက် အရေးပေါ်လိုအပ်သည့် သောက်ရေ၊သုံးရေများကို ဝယ်ယူဝေငှပေးလျက်ရှိရာ တစ်ရက်လျှင် လူတစ်ဦးအတွက်(15)လီတာနှုန်းဖြင့် လျာထားဖြန့်ဝေပေးလျက်ရှိနေပါသည်။