ချောင်းဆုံမြို့နယ်မှ ကြက်ခြေနီစေတနာလုပ်အားရှင်များက ချောင်းဆုံမြို့နယ်၊ ကွမ်သဲကျေးရွာရှိ အသွားအလာကန့်သတ်စောင့်ကြည့်ရေးစခန်းတွင် အသွားအလာကန့်သတ်စောင့်ကြည့်မှုခံယူနေကြသူများအား စိတ်ပိုင်းဆိုင်ရာအားပေးကူညီပေးခြင်း၊ အစားအသောက်များပေးဝေခြင်း၊ ရောဂါကာကွယ်ရေးအတွက် ကျန်းမာရေးစောင့်ရှောက်မှုပေးခြင်း၊ လိုက်နာဆောင်ရွက်ရမည်များအား အသိပေးနှိုးဆော်ခြင်းနှင့် ပတ်ဝန်းကျင်သန့်ရှင်းရေးတို့ကို နေ့စဉ်ဆောင်ရွက်ပေးလျက်ရှိကြပါသည်။ ထို့အပြင် အသွားအလာကန့်သတ်စောင့်ကြည့်မှုခံယူပြီး သတ်မှတ်ရက်ပြည့်မြောက်၍ နေအိမ်သို့ပြန်ရာတွင် အခက်အခဲ ရှိသူများအား ချောင်းဆုံမြို့နယ်ကြက်ခြေနီအသင်းခွဲမှ လူနာတင်ယာဥ်ဖြင့် ၎င်းတို့၏နေအိမ်သို့ အခမဲ့ပို့ဆောင်ပေးခဲ့ကြသည်။

မိုင်းခတ်မြို့နယ်ကကြက်ခြေနီစေတနာလုပ်အားရှင်တွေကတော့ ဒီဇင်ဘာလ၇ရက်နေ့မှာ ရှမ်းပြည်နယ်အရှေ့ပိုင်း၊ မိုင်းခတ်မြို့မဈေးကို ဈေးဝယ်လာရောက်ကြတဲ့ မိဘပြည်သူများအတွက် နှာခေါင်းစည်းများအခမဲ့ပေးဝေခဲ့ကာ အပြင်ထွက်တဲ့အခါတိုင်းနှာခေါင်းစည်းဝတ်ဆင်အသုံးပြုဖို့ လိုအပ်ကြောင်းကို ဌာနဆိုင်ရာများမှတာဝန်ရှိသူများနဲ့အတူ ပူးပေါင်း နှိုးဆော်ခဲ့ကြပါတယ်။

၂၀၂၀ပြည့်နှစ် ဒီဇင်ဘာလ ၇ရက်နေ့က ရမ်းဗြဲမြို့နယ်၊ ပေါက်တောမြို့နယ်နှင့် မြောက်ဦးမြို့နယ်များ မှ ကြက်ခြေနီစေတနာလုပ်အားရှင်များသည်သက်ဆိုင်ရာမြို့နယ်အသီးသီးတွင် ရောဂါကာကွယ်ရေးအသိပညာပေးခြင်း၊ နှာခေါင်းစည်းဝတ်ဆင်ရန်နှိုးဆော်ခြင်း၊ နှာခေါင်းစည်းများအခမဲ့ပေးဝေခြင်းတို့ကို ဆောင်ရွက်ခဲ့ကြသည်။ ထို့ပြင် မောင်တောမြို့မှ ကြက်ခြေနီစေတနာ့လုပ်ရှင်များကလည်း မောင်တောမြို့နယ်ရှိ နယ်ခြားစောင့်ရဲတပ်ရင်း အမှတ်(၅)တွင် ကိုဗစ် ရောဂါကာကွယ်ရေးအတွက် ပိုးသတ်ဆေးဖြန်းခြင်းလုပ်ငန်းများကို မိတ်ဖက်လူမှုရေးအသင်းအဖွဲ့များ၊ ဌာနဆိုင်ရာများမှ တာဝန်ရှိသူများနှင့်အတူ ပူးပေါင်းဆောင်ရွက်ခဲ့ကြသည်။

ရှမ်းပြည်နယ်အရှေ့ပိုင်း၊ မိုင်းဖြတ်မြို့နယ်က ကြက်ခြေနီစေတနာလုပ်အားရှင်များကလည်း မြို့အဝင်အထွက်ဂိတ်တွေမှာ ဖြတ်သန်းသွားလာသူကြသူတွေကို ခရီးသွားမှတ်တမ်းကောက်ယူတာတွေ၊ နှာခေါင်းစည်း ဝတ်ဆင်အသုံးပြုဖို့နှိုးဆော်တာတွေနဲ့ ရောဂါကာကွယ်ရေး အသိပညာပေးတာတွေကို ဒီဇင်ဘာလ၇ရက်နေ့က ဆက်လက်ဆောင်ရွက်နေခဲ့ကြပါတယ်။

ဒီဇင်ဘာလ ၇ ရက်နေ့က မြိတ်မြို့နယ်ကြက်ခြေနီသူနာပြုတပ်ဖွဲ့ဒေသကြီး မြိတ်မြို့နယ်ကြက်ခြေနီသူနာပြုတပ်ဖွဲ့မှ မြို့နယ်ကြက်ခြေနီတပ်ခွဲမှူး ဦးဇေယျာမိုးနဲ့ ကြက်ခြေနီစေတနာလုပ်အားရှင် ၇ ဦးတို့ဟာတုံးဗျောငယ်ကျေးရွာသို့ သွားရောက်ခဲ့ပြီး COVID - 19 အသိပညာပေးခြင်း၊ ပိုစတာများကပ်ခြင်းတို့အပြင် လက်သန့်‌ေဆးရည်ဘူးများကိုလည်း ပေးအပ်ခဲ့ကြတယ်လို့ သိရပါတယ်။

ချောင်းဆုံမြို့နယ်ကြက်ခြေနီအသင်းခွဲဥက္ကဌ ဦးတင်လှိုင်ဦး ဦးဆောင်သော ကြက်ခြေနီစေတနာလုပ်အားရှင် (၉) ဦးတို့က ချောင်းဆုံမြို့နယ်၊ ကွမ်သဲကျေးရွာ CBFQ စခန်းရှိ အသွားအလာကန့်သတ်စောင့်ကြည့်မှုခံယူမည့်သူများအား နေရာချထားခြင်း၊ ကိုဗစ်-၁၉ ရောဂါ ကာကွယ်ရေးအတွက် အသိပညာပေးခြင်းနှင့် လိုအပ်သောကျန်းမာရေးစောင့်ရှောက်မှုပေးခြင်းတို့ကို မြို့နယ်ကိုဗစ်-၁၉ရောဂါ ထိန်းချုပ်ကုသရေးကော်မတီနှင့် နေ့စဉ်ပူးပေါင်းဆောင်ရွက်လျှက်ရှိကြသည်။

ရန်ကုန်တိုင်းဒေသကြီး၊ လှိုင်ကိုဗစ်ကုသရေးစင်တာတွင် လုပ်အားပေးကြမည့် ရှမ်းပြည်နယ်(မြောက်ပိုင်း)မှ ကြက်ခြေနီစေတနာလုပ်အားရှင် (၃၁) ဦးအတွက် ကိုဗစ်၁၉ ရောဂါကာကွယ်ရေး အသိပညာ‌ပေး သင်တန်းကို ၂၀၂၀ပြည့်နှစ်၊ ဒီဇင်ဘာ ၆ ရက်၊ နေ့လည်ပိုင်းတွင် ကမာရွတ်မြို့နယ်ရှိ၊ အသွားအလာကန့်သတ်စောင့်ကြည့်ရာနေရာဖြစ်သည့် ပညာရေးတက္ကသိုလ်လေ့ကျင့်ရေးအထက်တန်းကျောင်း ၌ ပြုလုပ်ခဲ့ပါသည်။ ရှေးဦးစွာ မြန်မာနိုင်ငံကြက်ခြေနီအသင်း ဒုတိယ အထွေထွေအတွင်းရေးမှူး ဒေါက်တာဦးတင်ထွန်း‌အောင်က ကျန်းမာရေးဝန်ကြီးဌာနကထုတ်ပြန်ထားသည့် ကိုဗစ်၁၉ကာကွယ်ရေးစနစ်တကျလုပ်ဆောင်ရမည့်အချက်များကိုရှင်းလင်းပြောကြားခြင်း၊ အသွားအလာကန့်သတ်စောင့်ကြည့်ရာနေရာမှတာဝန်ရှိသူများက PPE စနစ်တကျဝတ်ဆင်နည်းနှင့် စွန့်ပစ်နည်းကိုလက်တွေ့သရုပ်ပြခဲ့ကြပြီး ကြက်ခြေနီစေတနာလုပ်အားရှင်များကလည်း PPE စနစ်တကျဝတ်ဆင်နည်းနှင့် စွန့်ပစ်နည်းကိုလက်တွေ့လိုက်ပါဆောင်ရွက်ခဲ့ကြပါသည်။ကိုဗစ်၁၉ရောဂါကာကွယ်ရေးအသိပညာပေးသင်တန်းသို့ အသင်းဒုတိယအထွေထွေအတွင်းရေးမှူးနှင့်အတူ ဘေးအန္တရာယ်ဆိုင်ရာစီမံခန့်ခွဲမှု ဌာနညွှန်ကြားရေးမှူးဒေါ်စန်းစန်းမော်၊ အဖွဲ့အစည်းဆိုင်ရာဖွံ့ဖြိုးတိုးတက်ရေးဌာန ညွှန်ကြားရေးမှူးဒေါက်တာဒေါ်လင်းလင်းသက်နှင့်တာဝန်ရှိသူများတက်ရောက်ခဲ့ကြသည်။ ယင်းနောက် ညနေပိုင်းတွင် ရှမ်းပြည်နယ်(မြောက်ပိုင်း)မှကြက်ခြေနီစေတနာလုပ်အားရှင်များသည် ဆေးသုတေသနဦးစီးဌာန(ရန်ကုန်)တွင် ကိုဗစ်၁၉ ရောဂါရှိမရှိSwap Testရယူစစ်ဆေးမှုများခံယူခဲ့ကြပါသည်။

တနင်္သာရီတိုင်းဒေသကြီး ပုလောမြို့နယ်ကြက်ခြေနီအသင်းခွဲဒုတိယဥက္ကဌ ဦးခင်မောင်ဦး ဦးဆောင်တဲ့ ကြက်ခြေနီစေတနာလုပ်အားရှင်များဟာ ဗိုလ်ချုပ်လမ်း၊ မြို့မစျေး၊ အမှတ်(၃)ရပ်ကွက်သိမ်ဝလမ်း၊ ကမ်းနားလမ်း၊ စပယ်လမ်းတလျှောက်တို့မှာ ပြည်သူများအား COVID-19ရောဂါကာကွယ်ဖို့ နှာခေါင်းစည်းများပေးဝေခဲ့ကြတယ်လို့ သိရပါတယ်။ ဒါ့အပြင် အသိပညာပေး ပိုစတာများကပ်ခြင်း၊ အသိပညာပေးသီချင်းနဲ့ အသိပညာပေးတာတွေကို ဒီဇင်ဘာလ ၆ ရက်နေ့က ပြုလုပ်ခဲ့ကြပါတယ်။

သံဖြူဇရပ်မြို့နယ်မှ ကြက်ခြေနီစေတနာလုပ်အားရှင်များက စနေ၊ တနင်္ဂနွေနေ့များနှင့် နေ့ထူးနေ့မြတ်များတွင် ကျိုက်ခမီမြို့၊ ကျိုက်ခမီရေလယ်ဘုရားတွင် ဘုရားဖူးပြည်သူများအား ကျန်းမာရေးစောင့်ရှောက်မှုပေးလျှက်ရှိသည်။