တနင်္သာရီတိုင်းဒေသကြီး မြိတ်မြို့နယ်ကြက်ခြေနီအသင်းခွဲ မြို့နယ်ကြက်ခြေနီတပ်ဖွဲ့မှ မြို့နယ်ကြက်ခြေနီတပ်ခွဲမှူး ဦးဇေယျာမိုးနဲ့ ကြက်ခြေနီစေတနာလုပ်အားရှင် ၆ ဦးတို့ဟာ မြိတ်တောင်အလယ်ပိုင်းရပ်ကွက်မှာ COVD -19‌ေရာဂါဆိုင်ရာ လိုက်နာရမည့်အချက်များကို အသံချဲ့စက်နဲ့ အသိပညာပေး ဆော်ဩကြပြီး အများမြင်သာတဲ့ နေရာများမှာ အသိပညာပေး ပိုစတာကပ်တာတွေကို ဒီဇင်ဘာလ ၂၁ ရက်နေ့က ပြုလုပ်ခဲ့ကြပါတယ်။

၂၀၂၀ပြည့်နှစ် ဒီဇင်ဘာလ ၂၁ရက်နေ့က ရှမ်းပြည်နယ်အရှေ့ပိုင်း၊ တာချီလိတ်မြို့နယ်ကကြက်ခြေနီစေတနာလုပ်အားရှင်တွေက မိုင်းကိုး အခြေခံပညာအထက်တန်းကျောင်း၊ ပုန်းထွန်အခြေခံပညာအထက်တန်းကျောင်းခွဲ တွေမှာဖွင့်ထားတဲ့ Quarantine Center တွေမှာ ကျန်းမာရေးကူညီစောင့်ရှောက်ပေးတာတွေ၊ စိတ်ပိုင်းဆိုင်ရာအားပေးကူညီတာတွေ၊ အစားအသောက်စီစဉ်ပေးတာတွေကို ဆောင်ရွက်ခဲ့ကြသလို အတည်ပြုလူနာတွေနေထိုင်ခဲ့တဲ့ အခန်းတွေကို ပိုးသတ်ဆေးဖြန်းတာတွေနဲ့ သန့်ရှင်းရေးကိုလည်း စနစ်တကျ ဆောင်ရွက်ခဲ့ကြပါတယ်။

မိုင်းယောင်းမြို့နယ်ကကြက်ခြေနီစေတနာလုပ်အားရှင်တွေက မိုင်းယောင်းမြို့လူစည်ကားရာနေရာတွေကနေ ဖြတ်သန်းသွားလာသူအချို့နဲ့ ဈေးတွေကို ဈေးဝယ်လာရောက်ကြသူတွေကို နှာခေါင်းစည်းတွေအခမဲ့ဖြန့်ဝေပေးတာတွေ ရောဂါကာကွယ်ရေးအသိပညာပေးတာတွေ ဆောင်ရွက်လျက်ရှိနေကြသလို ကိုဗစ်ရောဂါကြောင့် ဆေးရုံတွေမှာကုသမှုခံယူပြီး ပြန်လည်နေကောင်းကျန်းမာလာသူတွေကိုလည်း နေအိမ်များဆီသို့ အသီးသီးပို့ဆောင်ကူညီပေးလျက်ရှိနေကြပါတယ်။

၂၀၂၀ပြည့်နှစ် ဒီဇင်ဘာလ၁၉ရက်နေ့က ကချင်ပြည်နယ် မံစီမြို့နယ်ကြက်ခြေနီအသင်းခွဲဥက္ကဌ ဦးသိန်းကြည် ဦးဆောင်သော ကြက်ခြေနီစေတနာလုပ်အားရှင်များနှင့် မံစီမြို့နယ်အတွင်းရှိ ကျေးရွာများမှရပ်မိရပ်ဖများ၊ မိတ်ဖက်လူမှုရေးအသင်းအဖွဲ့များ ပူးပေါင်းကာ ဗန်းမော်မြို့နယ်မှ ညောင်ပင်သာကျောင်းတိုက်၊ မင်းစည်ဘုန်းတော်ကြီးကျောင်း၊ ရေရှင်ပရဟိတကျောင်း၊ ရောဘတ်မိဘမဲ့ဂေဟာ၊ AGဧဝံဂလိ ကလေးသူငယ်စောက်ရှောက်ရေးဂေဟာ၊ RC-စစ္စတာရ်သီလရှင်ကျောင်း၊ တံခွန်တိုင် စာသင်တိုက်များသို့ မြန်မာငွေကျပ် ၁၂သိန်းခန့်တန်ဖိုးရှိ ဆန်အိတ် ၁၂ပြည်ဝင်အိတ်(၇၀)၊ပိန်းဥ(၄)အိတ်၊ကျောက်ဖရုံသီး အလုံး(၁၀၀)၊ရွှေဖရုံသီး အလုံး(၁၂၀) တို့ကို သွားရောက်ထောက်ပံ့လှူဒါန်းပေးခဲ့ကြသည်။

၂၀၂၀ခုနှစ်၊ ဒီဇင်ဘာလ ၁၉ရက်နေ့က ရခိုင်ပြည်နယ်၊ မြောက်ဉီး မြို့နယ်ကြက်ခြေနီတပ်ဖွဲ့မှူး ဉီးမြင့်အေး ဦးဆောင်သော ကြက်ခြေနီစေတနာလုပ်အားရှင်များက မြောက်ဦးမြို့ရှိ တိုက်ပွဲရှောင်စခန်း၊ မြို့ပေါ်ရပ်ကွက်ရှိ လူအများဖြတ်သန်းသွားလာရာ နေရာများနှင့် မြို့အဝင်ဂိတ်များတွင် လက်သန့်စင်ဆေးရည်ဖြင့် အသုံးပြုစေခြင်း၊ နှာခေါင်းစည်းများအခမဲ့ပေးဝေခြင်း၊ ကိုဗစ်၁၉ရောဂါ နှင့် ပတ်သတ်သော ကျန်းမာရေးအသိပညာပေးခြင်း၊ လက်ကမ်းစာစောင်များဝေခြင်း၊ ကိုယ်အပူချိန်တိုင်းပေးခြင်းတို့ကို နေ့စဉ် ဆောင်ရွက်လျှက်ရှိကြသည်။

ကရင်ပြည်နယ်၊ ဘားအံမြို့နယ်၊ ဒုံသမိတံတားစစ်ဆေးရေးဂိတ်၌ ခရီးသည်များ၏ ကိုဗစ်-၁၉ ရောဂါ စစ်ဆေးထားမှုများအား ပြန်လည်စာရင်းသွင်းပေးခြင်း၊ နှာခေါင်းစည်းများပေးဝေခြင်းနှင့် ကျန်းမာရေးအသိပညာပေးခြင်းတို့ကို ဘားအံမြို့နယ်မှ ကြက်ခြေနီတပ်ခွဲမှူး ဦးစောကျော်အဲခလိန်းနှင့် ကြက်ခြေနီစေတနာလုပ်အားရှင် ၃ ဦးတို့က ဒုံသမိတံတားပိတ်ဆို့ရှာဖွေရေးအဖွဲ့နှင့် နေ့စဉ်ပူးပေါင်းဆောင်ရွက်လျက်ရှိသည်။

ဒီဇင်ဘာလ ၁၇ ရက်နေ့က ကရင်ပြည်နယ်၊ လှိုင်းဘွဲမြို့ဝင်ဂိတ်တွင် ခရီးသွားပြည်သူများအား ကျန်းမာရေးနှင့်အားကစားဝန်ကြီးဌာနမှထုတ်ဝေသော ကိုဗစ်-၁၉ ရောဂါကာကွယ်ရေးလမ်းညွှန်ချက်များကို အသိပေးနှိုးဆော်ခြင်း၊ ကိုယ်အပူချိန်တိုင်းတာပေးခြင်းနှင့် ခရီသွားရာဇဝင်များစစ်ဆေးပေးခြင်း၊ ထောက်ခံစာများစစ်ဆေးပေးခြင်းနှင့် အမည်စာရင်းများမှတ်တမ်းသွင်းပေးခြင်းတို့ကို လှိုင်းဘွဲမြို့နယ်မှ ကြက်ခြေနီတပ်ဖွဲ့မှူး ဦးဝင်းဇော်နှင့်ကြက်ခြေနီစေတနာလုပ်အားရှင် ၃ ဦးတို့က ဌာနဆိုင်ရာများမှတာဝန်ရှိသူများနှင့် နေ့စဉ်ပူးပေါင်း ဆောင်ရွက်လျက်ရှိသည်။

ရန်ကုန်၊ ဒီဇင်ဘာ ၁၇ ဒီဇင်ဘာလ ၁၆ရက်နေ့က စတင်ကာ ရန်ကုန်တိုင်းဒေသကြီးအတွင်းရှိ ရန်ကုန်ပြည်သူ့ဆေးရုံကြီး ကိုဗစ်ကုသရေးစင်တာမှာ တစ်လတိတိ လုပ်အားပေးတာဝန်ထမ်းဆောင်ဖို့အတွက် ပဲခူးတိုင်းဒေသကြီးက ကြက်ခြေနီစေတနာလုပ်အားရှင် ၃၆ဦးတို့ရောက်ရှိခဲ့ကြပါတယ်။ အဆိုပါ ကြက်ခြေနီစေတနာလုပ်အားရှင်တွေကို ဂုဏ်ပြုတဲ့အနေနဲ့ ပဲခူးတိုင်းဒေသကြီးအစိုးရအဖွဲ့မှ ‌ငွေကျပ်(၁၀၈၀၀၀ဝ)တို့ကိုလည်းကောင်း၊  တိုင်းကြက်ခြေနီကြီးကြပ်မှုကော်မတီမှ ငွေကျပ်(၃၆၀၀၀ဝ)တို့ကိုလည်းကောင်း၊ သာယာဝတီခရိုင်ကြက်ခြေနီသူနာပြုတပ်ဖွဲ့၊ အုပ်ချုပ်ရေးအဖွဲ့မှ ငွေကျပ်(၃၀၀၀၀၀) နှင့်Sport Shirtတို့ကိုလည်းကောင်း၊ ပဲခူးခရိုင်ကြက်ခြေနီသူနာပြုတပ်ဖွဲ့၊ အုပ်ချုပ်ရေးအဖွဲ့မှ ငွေကျပ်(၂၀၀၀၀၀)တို့ကိုလည်းကောင်း၊ ဒိုက်ဦးမြို့နယ်ကြက်ခြေနီသူနာပြုတပ်ဖွဲ့ ဒု-မြို့နယ်တပ်ဖွဲ့မှူးဦးအေးချိုမိသားစုမှ ငွေကျပ်(၂၀၀၀၀၀)သိန်းတို့ကိုလည်းကောင်း၊ တိုင်းဒေသကြီး ကြက်ခြေနီကြီးကြပ်မှုကော်မတီ အတွင်းရေးမှူး၊ တိုင်းဒေသကြီးကြက်ခြေနီသူနာပြုတပ်ဖွဲ့အုပ်ချုပ်ရေးအဖွဲ့၊ တိုင်းတပ်ဖွဲ့မှူး ဒေါက်တာနေမျိုးနှင့် တွဲဘက်အတွင်းရေးမှူးဦးသိန်းအောင်တို့က track suit၊ Scrub Suitနှင့်waist coatတို့ကိုလည်းကောင်း အသီးသီးဂုဏ်ပြုပေးအပ်ခဲ့ကြပါတယ်။ ရန်ကုန်ပြည်သူ့ဆေးရုံကြီးရဲ့ ကိုဗစ်ကုသရေးစင်တာမှာ ကိုဗစ်ရောဂါခံစားနေရတဲ့လူနာတွေကို ကူညီစောင့်ရှောက်ဖို့၊ အစားအသောက်နဲ့နေရာထိုင်ခင်းကူညီစီစဉ်ပေးဖို့နဲ့ ကျရာတာဝန်ကို လူမှုဝန်ထမ်းစိတ်အပြည့်နဲ့ ထမ်းဆောင်ဖို့ ပဲခူးတိုင်းဒေသကြီး မြို့နယ်အသီးသီးက ကြက်ခြေနီစေတနာလုပ်အားရှင် ၃၆ဦးတို့ဟာ ရန်ကုန်တိုင်းဒေသကြီးသို့ထွက်ခွာလာခဲ့ကြတာ ဖြစ်ပါတယ်။