ကြာအင်းဆိပ်ကြီး၊ မေ ၂၉

ကရင်ပြည်နယ်၊ ကော့ကရိတ်ခရိုင်၊ ကြာအင်းဆိပ်ကြီးမြို့နယ်ကြက်ခြေနီအသင်းခွဲမှ ဒုတိယမြို့နယ် ကြက်ခြေနီတပ်ဖွဲ့မှူးဦးဝင်းကိုဦးဆောင်သော ကြက်ခြေနီစေတနာလုပ်အားရှင် ၈ဦးတို့သည် ၂၀၂ဝပြည့်နှစ်၊မေလ ၂၈ရက်နေ့တွင် သက်ဆိုင်ရာကျောင်းများမှ ဆရာ/ဆရာမများ၊ ကျောင်းအကျိုးတော်ဆောင်အဖွဲ့၊ ကျေးရွာလူငယ်အဖွဲ့တို့နှင့်အတူ ကော့ကရိတ်ခရိုင်၊ ကြာအင်းဆိပ်ကြီးမြို့နယ်ရှိ နေရပ်ပြန်ပြည်သူများထားရှိသည့် Quarantine နေရာများ ဖြစ်သည့် အထက ကျခတ်ချောင်း၊ အမကမူလွန်ကျောင်း၊အမက (၁) ကျောင်းဆောင်တို့ကို ဆေးဖြန်းရာတွင် ပါဝင်ကူညီဆောင်ရွက်ခဲ့ကြပါသည်။

ဘားအံမြို့ မေ ၂၇ ဘားအံမြို့ပေါ်ရှိလူသွားလာများလျက်ရှိသော မြို့နယ်ဌာနဆိုင်ရာစုပေါင်းရုံးရှေ့၊ ဘုရားကြီးဝန်းရှေ့နှင့် ကမ်းနားလမ်း ယာယီပျံကျစျေး ၃နေရာတို့တွင် နှာခေါင်းစည်းများတပ်ဆင်ရေးလှုပ်ရှားမှုအသိပညာပေးရေးတွင် ဘားအံမြို့နယ် ကြက်ခြေနီအသင်းခွဲမှ မြို့နယ်တပ်ဖွဲ့မှူးဦးဇေယျာမိုးမြင့်နှင့် ဒုတိယမြို့နယ်တပ်ဖွဲ့မှူးဒေါ်တင်မာနွယ်တို့ ဦးဆောင်သော စေတနာလုပ်အားရှင် ၆ ဦးတို့သည် ၂၀၂၀ ပြည့်နှစ်၊ မေလ ၂၆ ရက်နေ့တွင် ဘားအံမြို့နယ်ဌာနဆိုင်ရာတာဝန်ရှိသူများနှင့်အတူ နှာခေါင်းစည်းများစနစ်တကျ တပ်ရန်၊ နှာခေါင်းစည်းများမပါရှိသူများ၊ မတပ်လာသူများအားနှာခေါင်းစည်းများ ဝေငှပေးခြင်းနှင့် အသိပညာပေးခြင်းတို့ ပူးပေါင်းဆောင်ရွက်ခဲ့ကြပါသည်။

နေပြည်တော်၊မေ ၂၅

ပြည်ထောင်စုနယ်မြေနေပြည်တော်တွင်COVID-19ရောဂါကာကွယ်ရေးလုပ်ငန်းများတွင်အသုံးပြုရန်အတွက်
လိုအပ်သည့်ပစ္စည်းများကို အလှူရှင်များကလှူဒါန်းလျှက်ရှိရာ၂၀၂၀ပြည့်နှစ်၊မေလ ၂၃ ရက်နေ့က နေပြည်တော်ဇဗ္မူသီရိမြို့နယ် အ.ထ.က(၆) အသွားအလာကန့်သတ်စောင့်ကြည့်ရေးစခန်း၌ ပျဥ်းမနားမြို့နယ်ကြက်ခြေနီအသင်းခွဲဥက္ကဌ ဦးအောင်နိုင်ဦးက
ဆေးဖြန်းပုံး နှင့် ပိုးသတ်ဆေး (၅) ဂါလံ တစ်ပုံး(စုစုပေါင်းတန်ဘိုး ကျပ် ၆၀၀၀၀) အားလာရောက်လှူဒါန်းခဲ့ရာ ဒက္ခိဏခရိုင်ကြက်ခြေနီတပ်ဖွဲ့မှူး ဒေါ်ခင်မိုးမိုးက လက်ခံရယူခဲ့ကြောင်းသိရှိရပါသည်။

ယခုကဲ့သို့ ဆေးဖြန်းပုံး နှင့် ပိုးသတ်ဆေးများလှူဒါန်းပေးပါသော ပျဥ်းမနားမြို့နယ်ကြက်ခြေနီအသင်းခွဲဥက္ကဌ ဦးအောင်နိုင်ဦးအား မြန်မာနိုင်ငံကြက်ခြေနီအသင်းမှ ကျေးဇူးမှတ်တမ်းတင်အပ်ပါသည်။

ရန်ကုန်၊ မေ ၂၁ COVID-19 ရောဂါကာကွယ်ရေးလုပ်ငန်းများတွင် အသုံးပြုရန်အတွက် Woodside Myanmar Pte Ltd မှ မြန်မာနိုင်ငံကြက်ခြေနီအသင်းသို့ အလှူငွေ ပေးအပ်လှူဒါန်းပွဲ ကို ၂၀၂၀ပြည့်နှစ်၊ မေလ ၂၁ ရက်နေ့ နေ့လည်နာရီက ရန်ကုန်မြို့ရှိ အသင်းရုံးခွဲတွင်ပြုလုပ်ခဲ့ပါသည်။ ရှေးဦးစွာ Woodside Myanmar Pte Ltd (Acting Country Manager )ဦးနေလင်းဦး ကလှူဒါန်းရခြင်းအကြောင်းကိုရှင်းလင်းပြောကြားပြီး အမေရိကန်ဒေါ်လာ ၃၀,၀၀၀ ကိုလှူဒါန်းရာအသင်းဥက္ကဌ ဒေါက်တာမောင်မောင်မြင့် က လက်ခံရယူပြီး COVID-19 ရောဂါကာကွယ်ရေး လုပ်ငန်းများအတွက် အကျိုးရှိထိရောက်စွာအသုံးပြု သွားမည်ဖြစ်ပါကြောင်းပြောကြားကာ ဂုဏ်ပြုမှတ်တမ်းလွှာ ပြန်လည်ပေးအပ်ခဲ့ပါသည်။ အဆိုပါလှူဒါန်းပွဲသို့ အသင်းဥက္ကဌ ဒေါက်တာမောင်မောင်မြင့်နှင့်အတူ ဒုတိယဥက္ကဌ ဒေါက်တာဒေါ်အမယာမော်နိုင်၊ အချိန်ပြည့်အမှုဆောင်ဒေါ်ကြူကြူဝင်း၊ အထွေထွေအတွင်းရေးမှူးပါမောက္ခဒေါက်တာထင်ဇော်စိုး၊ အရင်းအမြစ်များစုစည်းအသုံးချရေးဌာနမှူး ဒေါ်မေစန္ဒာမျိုးနှင့် တာဝန်ရှိသူများတက်ရောက်ခဲ့ပြီး Woodside Myanmar Pte Ltd မှ Acting Country Manager ဦးနေလင်းဦးနှင့် Acting Finance Manager ဒေါ်စန္ဒာမိုး တို့တက်ရောက်ခဲ့သည်။ လှူဒါန်း‌ငွေများဖြင့် COVID-19 ရောဂါကာကွယ်ရေးလုပ်ငန်းများတွင်အသုံးပြုရန်အတွက် PPE ပစ္စည်များနှင့် အသိပညာပေးလုပ်ငန်းများတွင် အသုံးပြုသွားမည်ဖြစ်ရာ ယခုကဲ့သို့လှူဒါန်းမှုအတွက် မြန်မာနိုင်ငံကြက်ခြေနီအသင်း အနေဖြင့် Woodside Myanmarအားလှိုက်လှဲစွာ ကျေးဇူးတင်ရှိပါသည်။

ရွှေကူ၊ မေ ၁၈ ကချင်ပြည်နယ်၊ ရွှေကူမြို့နယ်၊ နောင်မိုကျေးရွာရှိ အသွားအလာကန့်သတ်စောင့်ကြည့်ရေးစခန်းမှ တိုင်းရင်းသားပြည်သူများအား ရွှေကူမြို့နယ်ကြက်ခြေနီအသင်းခွဲမှ မြို့နယ်ကြက်ခြေနီတပ်ဖွဲ့မှူးဦးမြင့်ဦး ခေါင်းဆောင်သော ကြက်ခြေနီစေတနာလုပ်အားရှင် ၁၂ဦးက မေလ ၁၇ ရက်က COVID-19 ရောဂါကာကွယ်ရေးအသိပညာပေးခြင်း၊ စိတ်ပိုင်းလူမှုပိုင်းဆိုင်ရာအားပေးကူညီပေးခြင်း၊ အာဟာရကျွေးမွေးခြင်း၊ တစ်ကိုယ်ရေသန့်ရှင်းရေးနှင့် ပတ်ဝန်းကျင်သန့်ရှင်ရေး အကြောင်းပြောကြားခြင်းများပြုလုပ်ခဲ့ပါသည်။

ဘိုကလေးမြို့နယ်ကြက်ခြေနီအသင်းခွဲမှ ကြက်ခြေနီစေတနာလုပ်အားရှင်များသည် ၂၀၂၀ပြည့်နှစ် မေလ ၈ရက်နေ့တွင်ကျရောက်သော ကမ္ဘာ့ကြက်ခြေနီနေ့ကို ဂုဏ်ပြုသောအားဖြင့် ဧရာဝတီတိုင်းဒေသကြီး၊ ဘိုကလေးမြို့နယ်အတွင်းရှိ လူအများဖြတ်သန်းသွားလာနိုင်သောနေရာများတွင် COVID-19 ရောဂါကာကွယ်ရေး အသိပညာပေးခြင်း၊ လိုက်နာဆောင်ရွက်ရမည့်အချက်များအားအသံချဲ့စက်ဖြင့်နှိုးဆော်ခြင်းတို့ကိုဆောင်ရွက်ခဲ့ပြီး ရှေးဟောင်းသမိုင်းဝင် ရန်ပြေမာန်ပြေ အောင်စကြာစေတီတော်ကြီးပရဝုဏ်အတွင်း သန့်ရှင်းရေးပြုလုပ်ခြင်းတို့အား မေလ ၈ရက်နေ့တွင် ဆောင်ရွက်ခဲ့ကြသည်။

နေပြည်တော်၊ မေ ၆

၂၀၂၀ပြည့်နှစ်၊ မေလ ၆ ရက်နေ့က ပြည်ထောင်စုနယ်မြေ၊နေပြည်တော် ဒက္ခိဏခရိုင်ကြက်ခြေနီတပ်ဖွဲ့မှူး ဒေါ်ခင်မိုးမိုးဦးဆောင်သော ဇမ္ဗူသီရိမြို့နယ်ကြက်ခြေနီအသင်းခွဲမှ တပ်ဖွဲ့ဝင်များ၊ ကြက်ခြေနီစေတနာလုပ်အားရှင်များသည် ဇမ္ဗူသီရိမြို့နယ်၊ ဓာတုဇယ ဓာတ်ပေါင်းစုစေတီတော် ဗောဓိညောင်ပင်တွင် ကဆုန်လပြည့်ဗုဒ္ဓနေ့ ညောင်ရေသွန်းကုသိုလ်ပြု ဘုရားဖူးလာကြသူများအား
COVID-19 ရောဂါကာကွယ်ရေးအတွက် နှာခေါင်းစည်းများဖြန့်ဝေခြင်း၊ ကိုယ်အပူချိန်တိုင်းတာခြင်း၊ စနစ်တကျလက်ဆေးခြင်းအသိပညာပေး
ခြင်းများကို မြို့နယ်ပြည်သူ့ကျန်းမာရေးဦးစီးဌာနမှ ကျန်းမာရေးဝန်ထမ်း
များ ၊ ဌာနဆိုင်ရာများနှင့်ပူးပေါင်းကာ ဆောင်ရွက်ခဲ့ကြကြောင်း သိရှိရပါသည်။

မန္တလေး၊ မေ ၆

၂၀၂၀ပြည့်နှစ်၊‌ မေလ ၆ ရက်နေ့ကမန္တလေးတိုင်းဒေသကြီး၊သပိတ်ကျင်းမြို့နယ်ကြက်ခြေနီအသင်းခွဲမှ ဒုတိယမြို့နယ်ကြက်ခြေနီတပ်ဖွဲ့မှူးဒေါ်ဝါဝါထွန်း ဦးဆောင်သော ကြက်ခြေနီစေတနာလုပ်အားရှင်များသည် လေးမိုင်အခြေခံပညာအထက်တန်းကျောင်းတွင်ဖွင့်ထားသော အသွားအလာကန့်သတ်စောင့်ကြည့်ရေးစခန်းတွင်နယ်စပ်ဒေသမှပြန်လည်ဝင်ရောက်လာသူများအား COVID-19ရောဂါကာကွယ်ရေးအတွက်ကိုယ်အပူချိန်တိုင်းတာခြင်းကို ဆောင်ရွက်ပေးခဲ့ကြပါသည်။

ဖားကန့်၊မိုးကောင်း၊ မေ ၁ မြန်မာနိုင်ငံကြက်ခြေနီအသင်းမှ ကြက်ခြေနီစေတနာလုပ်အားရှင်များသည် နိုင်ငံတဝန်းတွင် COVID-19 ရောဂါကာကွယ်ရေးကို ပါဝင်ဆောင်ရွက်လျက်ရှိပြီး ကချင် ပြည်နယ်မှ ကြက်ခြေနီစေတနာလုပ်အားရှင်များသည်လည်း ပြည်နယ်အတွင်းရှိမြို့နယ်၊ ရပ်ကွက်နှင့် ကျေးရွာများမကျန် သွားရောက်ဆောင်ရွက်လျက်ရှိပါသည်။ ၂၀၂၀ပြည့်နှစ်၊ မေလ ၁ ရက်နေ့က ဖားကန့်မြို့နယ်ကြက်ခြေနီအသင်းခွဲမှ မြို့နယ်ကြက်ခြေနီတပ်ဖွဲ့မှူးဦးရဲအောင်ဦးဆောင်သော ကြက်ခြေနီစေတနာလုပ်အားရှင် ၈ ဦးသည် ဖားကန့်မြို့နယ်အတွင်းရှိ အသွားအလာကန့်သတ်စောင့်ကြည့်ရေးစခန်းများမှ ပြည်သူများအား ထောက်ပံ့ပစ္စည်းပေးအပ်ခြင်း၊ ကျန်းမာရေးအသိပညာပေးခြင်း၊ စိတ်ပိုင်းလူမှုပိုင်းဆိုင်ရာအားပေးကူညီခြင်းများကို ရပ်ကျေးအုပ်ချုပ်ရေးမှူး၊ မြို့နယ်ပြည်သူ့ကျန်းမာရေးဦးစီးဌာနမှ ဝန်ထမ်းများနှင့် ပူးပေါင်းဆောင်ရွက်ခဲ့သည်။ အလားတူမိုးကောင်းမြို့နယ်ကြက်ခြေနီအသင်းခွဲမှ ဒုတိယမြို့နယ်ကြက်ခြေနီတပ်ဖွဲ့မှူးဦးမျိုးအောင် ဦးဆောင်သော ကြက်ခြေနီစေတနာလုပ်အားရှင် ၂ဦးသည် နမ္မတီးမြို့လမ်းဆုံ၊လမ်းခွ၊ RC ယာယီခိုလှုံရာစခန်း၊ မြို့ဦး ယာယီခိုလှုံရာစခန်းများတွင် စခန်းတာဝန်ခံများနှင့်တွေ့ဆုံကာ COVID-19 ရောဂါအသိပညာပေးခြင်း၊ နေရပ်စွန့်ခွာပြည်သူများအား ကိုယ်ပူချိန်တိုင်းပေးခြင်းတို့ကိုပြုလုပ်ခဲ့သည်။ ဆက်လက်ပြီး မိုးကောင်းမြိုနယ်ကြက်ခြေနီအသင်းခွဲမှ ကြက်ခြေနီတပ်ကြပ်ကြီးဦးဇင်ဝင်းထွဋ်ဦးဆောင်သော ကြက်ခြေနီစေတနာလုပ်အားရှင်၂ဦးက လွဲလောကျေးရွာတွင် လက်ကမ်းစာစောင်မျှဝေခြင်း၊ အခြေခံပညာအထက် တန်းကျောင်းအမှတ်-၂ရှိ အသွားအလာကန့်သတ်စောင့်ကြည့်ရေးစခန်းတွင် တစ်နေ့တာ စောင့်ကြည့်မှုကို သက်ဆိုင်ရာ အဖွဲ့များနှင့် ပူးပေါင်းလုပ်ဆောင်ခြင်း၊ ကြက်ခြေနီတပ်စုမှူးဒေါ်နွေဦးမမ နှင့် အဖွဲ့သည် ကဝါးယံ၊ လဘန်ကထောင်၊ စေတုန်ကျေးရွာများတွင် COVID-19 ရောဂါအသိပညာပေးပိုစတာကပ်ခြင်း၊ အသိပညာပေးခြင်းတို့ကိုဆောင်ရွက်ခြင်း၊ ကြက်ခြေနီတပ်ကြပ်ကြီးဦးသိန်းဌေးဦးဆောင်သော ကြက်ခြေနီစေတနာလုပ်အားရှင် ၄ဦးသည် ဆားမှော်ကျေးရွာရှိအသွားအလာကန့်သတ်စောင့်ကြည့်ရေးစခန်းတွင် တစ်ရက်တာ စောင့်ကြည့်မှုကို သက်ဆိုင်ရာအဖွဲ့များနှင့် ပူးပေါင်းလုပ်ဆောင်ခြင်း၊ ကြက်ခြေနီတပ်ခွဲမှူးဒေါ်နီနီအောင်ဦးဆောင်သော ကြက်ခြေနီစေတနာလုပ်အားရှင် ၉ဦးသည် မြို့နယ်အတွင်းရှိအသွားအလာကန့်သတ်စောင့်ကြည့်ရေးစခန်းတွင်တစ်ရက်တာစောင့်ကြည့်မှုကို သက်ဆိုင်ရာအဖွဲ့နှင့် ပူးပေါင်းလုပ်ဆောင်ခြင်း၊ COVID-19 ရောဂါအသိပညာပေးပိုစတာကပ်ခြင်း၊ သက်ကြီးရွယ်အိုအဘိုးအဘွားများအား ကိုယ်အပူချိန်တိုင်းပေးခြင်း၊ မြို့နယ်ဘူတာရုံတွင် ခရီးသွားပြည်သူများအား စာရင်းကောင်းယူခြင်းတို့ကို သက်ဆိုင်ရာအဖွဲ့များနှင့် ပူးပေါင်းဆောင်ရွက်ခဲ့ပါသည်။