မြန်မာနိုင်ငံကြက်ခြေနီအသင်းနှင့် ကမ္ဘာ့စားနပ်ရိက္ခာအစီအစဉ်တို့ ပူးပေါင်းကာ ရန်ကုန်မြို့၊ ရွှေပြည်သာမြို့နယ်ရှိ ရပ်ကွက် (၂၇) ခုတွင် နေထိုင်သည့် အိမ်ထောင်စုပေါင်း (၁၀၀,၂၄၂ ) စုအတွက် ဒုတိယအကြီမ် ဆန်ဖြန့်ဝေမှုကို ယခုလ (၁၈) ရက်နေ့မှစတင်ဆောင်ရွက်ခဲ့ရာ ယနေ့တွင် အမှတ် (၁၈) ရပ်ကွက်အတွင်းရှိ အိမ်ထောင်စု (၃,၇၅၄) စုအတွက် တစ်အိမ်ထောင်လျှင် ဆန် ၅၀ kg (၂၅) ပြည်နှုန်းဖြန့်ဝေပေးနိုင်ခဲ့ပါသည်။ အဆိုပါ ဆန်ဖြန့်ဝေခြင်းမှာ လက်ရှိဖြန့်ဝေပြီးသည်အထိ အိမ်ထောင်စု စုစုပေါင်း (၈၈,၇၂၄) စု လူဦးရေ (၃၄၀,၄၇၄) စုဖြစ်ပါသည်။ ဆက်လက်ပြီး ကျန်ရှိသည့်အိမ်ထောင်စုများကို မတ်လ ပထမပတ်အတွင်း ပြီးစီးအောင်ဖြန့်ဝေသွားမည်ဖြစ်ပါသည်။

၂၀၂၂ခုနှစ်၊ ဖေဖော်ဝါရီလ (၂၂)ရက်နေ့၊ ည(၁၁း၄၀)အချိန်ခန့်တွင် ရန်ကုန်တိုင်းဒေသကြီး၊ ဒဂုံ(မြို့သစ်)ဆိပ်ကမ်းမြို့နယ်၊ စက်မှုဇုန်(၂)၊ အမှတ်(၂) မက္ခရာမင်းသားကြီးလမ်းတွင် မီးလောင်မှုဖြစ်ပွားခဲ့ပါသည်။ ထိုမီးလောင်မှုဖြစ်ပွားရာနေရာသို့ ဒဂုံ(မြို့သစ်)ဆိပ်ကမ်းမြို့နယ် ကြက်ခြေနီစေတနာလုပ်အားရှင်များနှင့် နီးစပ်ရာမြို့နယ်များမှ ကြက်ခြေနီစေတနာလုပ်အားရှင်များသည် အချိန်မီသွားရောက်ကာ မီးငြိမ်းသတ်ရေးလုပ်ငန်းများတွင် ကူညီဆောင်ရွက်ပေးခြင်း၊ ထိခိုက်ဒဏ်ရာရရှိသူများအား ရှေးဦးပြုစုပေးခြင်းနှင့် စိတ်ပိုင်းဆိုင်ရာအားပေးကူညီပေးခြင်းတို့ကို ကူညီဆောင်ရွက်ပေးခဲ့ပါသည်။ ဖေဖော်ဝါရီလ (၂၃)ရက်နေ့တွင်လည်အခြားသောလိုအပ်သည်များကို ဆက်လက်ကူညီဆောင်ရွက်ပေးခဲ့ပါသည်။

ယခုကာလအတွင်း ကိုဗစ်ရောဂါကူးစက်မှုမြင့်တက်လာသည်နှင့်အမျှ ကူးစက်မှုလျော့ကျစေရေးအတွက် အသိပညာပေးခြင်းတို့ကို ကြက်ခြေနီစေတနာလုပ်အားရှင်များက နေရာအနှံ့အပြားတွင် တိုးမြှင့်ဆောင်ရွက်လာကြပါသည်။ ၂၀၂၂ခုနှစ် ဖေဖော်ဝါရီလ ၂၃ရက်နေ့က ရှမ်းပြည်နယ်အရှေ့ပိုင်း တာချီလိတ်မြို့နယ်ရှိ ဈေးများနှင့် လူအများသွားလာတတ်သောနေရာများတွင် ကြက်ခြေနီများက ပါးစပ်နှင့်နှာခေါင်းစည်းဝတ်ဆင်ရန်နှိုးဆော်ခြင်း၊ နှာခေါင်းစည်းများအခမဲ့ဖြန့်ဝေပေးခြင်း၊ မကြာခဏလက်ဆေးရန်နှိုးဆော်ခြင်းနှင့် ရောဂါကူးစက်မှုမဖြစ်ပွားစေရေးအတွက် လိုက်နာဆောင်ရွက်ရမည့်အချက်များအား အသိပညာပေးခြင်းတို့ကိုလည်းကောင်း၊ မြို့နယ်ကျန်းမာရေးဦးစီးဌာနတွင် ခရီးသွားရန်ကိုဗစ်ရောဂါပိုးလာရောက်စစ်ဆေးသူများမှ ရောဂါပိုးတွေ့ရှိလူနာများကို ကိုဗစ်ကုသရေးစင်တာများသို့ ပို့ဆောင်ကူညီပေးခြင်းတို့ကိုလည်းကောင်း ကူညီဆောင်ရွက်ပေးခဲ့ကြပါသည်။