မြန်မာနိုင်ငံကြက်ခြေနီအသင်း မိသားစုပြန်လည်ဆက်သွယ်ပေးရေးဌာနမှ ပြုလုပ်သော ရွှေ့ပြောင်းသွားလာခြင်းနှင့် နေရပ်စွန့်ခွာနေထိုင်ခြင်းဆိုင်ရာ(အဆင့်မြင့်)သင်တန်းဖွင့်ပွဲ အခမ်းအနားကို ဇွန်လ(၂၃)ရက်နေ့ နံနက်ပိုင်းက ရန်ကုန်မြို့ရှိ Central Hotel ၌ ပြုလုပ်ခဲ့ပါသည်။

     သင်တန်းဖွင့်ပွဲတွင် အသင်းဒုတိယဥက္ကဌဒေါက်တာဒေါ်အမယာမော်နိုင်က အမှာစကား ပြောကြားရာတွင် မြန်မာနိုင်ငံကြက်ခြေနီအသင်းသည် အခြေအနေအမျိုးမျိုး၊ ပုံစံအမျိုးမျိုးနှင့် ဆင်းရဲဒုက္ခများ တွေ့ကြုံခံစားနေရသူများကို လူသားချင်းစာနာထောက်ထားမှု အကူအညီများပေးလျက်ရှိပါကြောင်း၊လူမှုကရုဏာအကူအညီ လိုအပ်နေသည့် ရွေ့ပြောင်းသွားလာသူများကို စနစ်တကျ ကူညီဆောင်ရွက်နိုင်ရန် သင်တန်းကို ပြုလုပ်ခြင်း ဖြစ်ပြီး သင်တန်းမှ သိရှိရသည်များကို မိမိတို့ဒေသတွင်းမှ ကြက်ခြေနီစေတနာလုပ်အားရှင်များအား အသိပညာများ ပြန်လည် ဖြန့်ဝေ ပေးစေလိုကြောင်းဖြင့် ပြောကြားခဲ့ပါသည်။

     သင်တန်းဖွင့်ပွဲသို့ အသင်းဒုတိယဥက္ကဌနှင့်အတူ အချိန်ပြည့်အလုပ်အမှုဆောင် ပါမောက္ခ‌ဒေါက်တာဒေါ်မြသူ၊ ဒုတိယအထွေထွေအတွင်းရေးမှူး ဒေါက်တာတင်ထွန်းအောင်၊ လူသားအရင်းအမြစ်ဌာန ညွှန်ကြားရေးမှူး

ဒေါ်ချမ်းမင်းဦး၊ အဖွဲ့အစည်းဆိုင်ရာ ဖွံ့ဖြိုးတိုးတက်ရေးဌာန ညွန်ကြားရေးမှူး ဒေါက်တာဒေါ်လင်းလင်းသက်၊

စီမံခန့်ခွဲရေးဌာန ညွန်ကြားရေးမှူး ဦးမြင့်ထွန်းဟန်၊ ဘေးအန္တရာယ်ဆိုင်ရာ စီမံခန့်ခွဲမှုဌာန ဒုတိယညွှန်ကြားရေးမှူး ဒေါ်မိုးသီတာဝင်း၊ အပြည်ပြည်ဆိုင်ရာကြက်ခြေနီကော်မတီမှ တာဝန်ရှိသူများ၊ အပြည်ပြည်ဆိုင်ရာကြက်ခြေနီနှင့် လခြမ်းနီအသင်းများ ဖက်ဒရေးရှင်းမှ Coordinator Ms.Marie Marrique ၊ ဆွီဒင်နိုင်ငံကြက်ခြေနီအသင်း ဌာနေကိုယ်စားလှယ် Mr.Rico၊ ရွှေ့ပြောင်းသွားလာခြင်းနှင့် နေရပ်စွန့်ခွာနေထိုင်ခြင်းစီမံချက်မှ ဝန်ထမ်းများ၊ သင်တန်းသား၊ သူများ တက်ရောက်ကြပါသည်။

     ရွှေ့ပြောင်းသွားလာသူများနှင့် နေရပ်စွန့်ခွာရသူများ၏ လိုအပ်ချက်ကို ပိုမိုသိရှိနားလည်နိုင်စေရန်နှင့် လူသားချင်းစာနာထောက်ထားမှုလုပ်ငန်းများကို စနစ်တကျ ကူညီဆောင်ရွက်နိုင်ရန် ရည်ရွယ်ကာ သင်တန်းကို ပြုလုပ်ခြင်း ဖြစ်ပါသည်။ ဇွန်လ(၂၃)ရက်မှ ဇွန်လ(၂၄)ရက်နေ့အထိ (၂)ရက်တာ ပြုလုပ်မည့် အဆိုပါသင်တန်းသို့ တိုင်းဒေသကြီး၊ ပြည်နယ်(၁၇)ခုမှ မြို့နယ်ကြက်ခြေနီတပ်ဖွဲ့မှူး (၃၂)ဦး တက်ရောက်ကြမည် ဖြစ်ပါသည်။